Read tshiluba Lewitiki 7 Bible Online

Lewitiki 7 - tshiluba bible

Lewitiki 7

¹Eu udi mukenji wa mulambu wa disambuka dia mikenji, etshi ntshintu tshidi tshitambe tshijila.

²Nebashihele mulambu wa disambuka dia mikenji kudibo bashihela mulambu wa kuosha ha kahia, muakuidi neamiamine mashi ku nseke yonso ya tshioshelu.

³Neafile dianyi dionso ne mukala udi ne dianyi ne dianyi didi dibuikila bintu bia munda,

⁴tumuma tubidi ne dianyi diatu didi hehi ne bituntuku bia bibelu ne lukutu lua mutshima ne lua tumuma yeye neanumushe,

⁵neabioshe ha tshioshelu bu mulambu wa kuoshila Yehowa ha kahia eu udi mulambu wa disambuka dia mikenji.

⁶Bana balume bonso ba bakuidi nebaudie mu muaba wa tshijila, etshi ntshintu tshitambe tshijila.

⁷Mulambu wa disambuka dia mikenji udi bu mulambu wa kubuikila nʼau bubi bua bantu, mukenji umue udi wisuika, muakindi udi ufila mulambu wa kubuikila nʼau bubi bua bantu neangate tshituha tshia munyinyi tshidi tshishale.

⁸Muakuidi udi ufila mulambu wa kuosha ha kahia wa muntu mukuabo, yeye mene neangate tshiseba tshia mulambu wa kuosha udiye ufila.

⁹Muakuidi udi ufila mulambu wa bukula budibo balamba mu nfulu ne mu tshivuadi ne mu dilonga, yeye mene neangate bintu ebi bionso.

¹⁰Mulambu wonso wa bukula budi busangisha ne manyi, anyi mulambu wa bukula nkayabu, newikale wa bana balume ba Alona, muntu tshituha tshiandi muntu tshituha tshiandi.

¹¹Eu udi mukenji wa mulambu wa kuvuisha nʼau ditalala udibo bafila kudi Yehowa.

¹²Biafila muntu mulambu eu bua kubakidila Nzambi, yeye nealue kabidi ne mikata ya bukula budi kabuyi ne luevene busangisha ne manyi, ne mikata ya bukula budi kabuyi ne luevene miela manyi ha mutu, ne mikata ya bukula bubotesha budi busangisha ne manyi.

¹³Yeye neafile mulambu wandi wa mikata ya bukula budi ne luevene ne mulambu wa kuvuisha nʼau ditalala bua kusakidileye nʼai Nzambi.

¹⁴Neafile tshituha tshia mulambu ne mulambu bu mulambu udibo bakuha ku mesu kua Yehowa, netshikale kudi muakuidi udi umiamine mashi a mulambu wa kuvuisha nʼau ditalala.

¹⁵Yeye neadie munyinyi wa mulambu wandi wa kubisha nʼau ditalala bua kusakidileye nʼau Nzambi mu dituku didiye ufila mulambu wandi, kashiyi nansha katuha kakese tô ne dinda.

¹⁶Kadi bikala mulambu wandi wa kuditshiha nʼau anyi mulambu udiye ufila ku disua diandi, yeye neaudie mu dituku didiye ûfila ne tshituha tshidi tshishale yeye neatshidie makelela,

¹⁷kadi bikala tshituha tshia munyinyi wa mulambu tshishale tô ne ku dituku disatu, nebatshioshe mu kahia.

¹⁸Biadieye tshituha tshia munyinyi wa mulambu wa kuvuisha nʼau ditalala tshidi tshishale tô ne ku dituku disatu, kabena bitabusha mulambu wandi, kabena baubala, netshikale bu tshintu tshibole, ne mundi udi udia munyinyi neadituadile bubi buandi.

¹⁹Munyinyi udi utuanganaa ne tshintu tshibi, kabena mua kûdia, nebawoshe mu kahia. Muntu yonso udi mudijidile udi mua kudia munyinyi eu,

²⁰kadi mundi udi kayi mudijidile udi udia munyinyi wa mulambu wa kuvuisha nʼau ditalala udibo bafila kudi Yehowa, nebumushe mundi eu munkatshi mua bana babo.

²¹Bialenga mundi tshianza tshiandi ha tshintu tshidi ne bukoya, nansha bukoya bua mundi nansha bukoya bua nyama nansha tshintu tshikuabo tshidi ne bukoya, ne biadieye munyinyi wa mulambu wa kuvuisha nʼau ditalala udibo bafila kudi Yehowa, nebamumushe munkatshi mua bana babo.

²²Yehowa wakambila Mose ne,

²³Wambile Bena Isalele ne, Kanudi dianyi dia ngombe anyi dia mukoko anyi dia mbushi.

²⁴Dianyi dia tshintu tshidifuile ne dianyi dia tshintu tshihandibue kudi nyama nudi mua kuenza nʼadi mudimu mukuabo, kadi kanudi dianyi adi.

²⁵Muntu yonso udi udia dianyi dia nyama udibo bafila bu mulambu wa kuoshila Yehowa ha kahia, nebamumushe munkatshi mua bana babo.

²⁶Kanudi mashi, nansha a nyunyu nansha a nyama mu nsubu yenu.

²⁷Muntu yonso udi udia mashi nebamumushe munkatshi mua bana babo.

²⁸Yehowa wakambila Mose ne,

²⁹Wambile Bena Isalele ne, Muntu udi ufila mulambu wa kuvuisha nʼau ditalala kudi Yehowa nealue ne tshituha tshia mulambu wa kuvuisha nʼau ditalala,

³⁰yeye nealue ne mulambu wa kuoshila Yehowa ha kahia mu bianza biandi, nealue ne dianyi ne tshiadi, nebatshinyukule bu mulambu udibo banyukula ku mesu kua Yehowa.

³¹Muakuidi neoshe dianyi ha tshioshelu, kadi tshiadi netshikale tshia Alona ne bana bandi balume.

³²Nenuhe muakuidi diboko dia balume dia nyama wa mulambu wa kuikisha nʼau ditalala udibo banyukula ku mesu kua Yehowa.

³³Muntu wa munkatshi mua bana balume ba Alona udi ufila mashi ne dianyi bia mulambu wa kuvuisha nʼau ditalala neikale ne diboko dia balume bu tshintu tshiandi.

³⁴Bualu bua meme nakangata tshiadi tshidibo banyukula ne diboko didibo bakuha munkatshi mua milambu ya Bena Isalele, nakabifila kudi Alona muakuidi ne bana bandi balume bu bituha biabo tshiendelele.

³⁵Etshi ntshintu tshia tshijila tshia Alona ne tshia bana bandi balume munkatshi mua milambu ya Yehowa idibo bosha ha kahia mu dituku diakabasunguleye bua kuenzelabo Yehowa mudimu wa buakuidi,

³⁶Yehowa wakela mukenji wandi kudi Bena Isalele bua kubahabo tshintu etshi mu dituku diakabasunguleye. Etshi ntshintu tshiabo tshiendelele mu bikondo biabo bionso.

³⁷Eu udi mukenji wa mulambu wa kuosha ha kahia ne wa mulambu wa bukula ne wa mulambu wa kubuikila nʼau bubi ne wa mulambu wa kusambuka kua mikenji, ne wa tshijila tshia bakuidi, ne wa mulambu wa kuvuisha nʼau ditalala,

³⁸wakambila Yehowa Mose mu mukuna wa Sinai mu dituku diakeleye mukenji wandi kudi Bena Isalele bua kufilabo milambu yabo kudi Yehowa mu tshihela tshia Sinai.