Read tshiluba Lewitiki 8 Bible Online

Lewitiki 8 - tshiluba bible

Lewitiki 8

¹Yehowa wakambila Mose ne,

²Angata Alona ne bana bandi balume badi nʼandi ne bilulu ne manyi adibo bela ha mutu ne mulume wa ngombe wa mulambu wa kubuikila nʼau bubi ne bimpanga bibidi ne tshisaka tshia mampa adi kâyi ne luevene,

³ubikile bantu bonso ku mbelu kua ntenta wa kusangakena.

⁴Mose Wakenza bu muakamuambila Yehowa; bantu bonso bakasangakena ku mbelu kua ntenta wa kusangakena.

⁵Mose wakambila bantu ne, Ebu mbualu buakamba Yehowa bua tuetu tuenze.

⁶Mose wakalua ne Alona ne bana bandi balume, wakabowesha ne mai.

⁷Wakaluatshisha Alona kazaku, wakamuela mukaba, wakamuluatshisha tshikowelu ne efoda, wakamuela mukaba wa efoda, wakamusuika hamʼbidi handi.

⁸Wakamuluatshisha tshilulu tshia ha tshiadi, wakateka Ulima ne Tumima mu tshilulu tshia ha tshiadi,

⁹wakasa tshifulu ku mutu kuandi, wakasuika tshitotolo tshia tshiamu tshia or, tshintu tshia tshijila, ku mpala kua tshifulu, bu muakambila Yehowa Mose.

¹⁰Mose wakangata manyi adibo bela ha mutu, wakantumina manyi ku nsubu wa tshitendelelu ne ku bintu bionso biakadimu, wakadidila.

¹¹Wakantumina manyi ku tshioshelu misangu muanda mutekete ne ku malonga atshi onso ne ku tshiowelu ne ku tshitaku tshiatshi bua kubijidila.

¹²Wakela Alona manyi ha mutu handi, wakamujidila.

¹³Mose wakalua ne bana balume ba Alona, wakabaluatshisha tuzaku, wakabasuika ne mikaba, wakabasa bifulu ku mitu yabo, bu muakambila Yehowa Mose.

¹⁴Wakalua ne mulume wa ngombe wa mulambu wa kubuikila nʼau bubi; ne Alona ne bana bandi balume bakatentekasha bianza biabo ha mutu ha ngombe wa mulambu wa kubuikila nʼau bubi.

¹⁵Mose wakamushiha, wakangata mashi, wakitaba ku nsengu ya ku tshioshelu ne munu wandi, wakajidila tshioshelu, wakela mashi ku tshitaku tshia tshioshelu bua kutshijidila, bua kubuikila bubi bua bantu.

¹⁶Wakangata dianyi dionso diakadi ha bintu bia munda ne lukutu lua mutshima ne tumuma tubidi ne dianyi diatu, Mose wakabisha ha tshioshelu.

¹⁷Kadi ngombe ne tshiseba tshiandi ne munyinyi wandi ne tunvi tuandi yeye wakabioshila ku butshika bua tshitudilu, bu muakambila Yehowa Mose.

¹⁸Wakalua ne tshimpanga tshia kuosha ha kahia, Alona ne bana bandi bakatentekasha bianza biabo ha mutu ha tshimpanga.

¹⁹Mose wakatshishiha, wakantumina mashi ku tshioshelu.

²⁰Mose wakasaya tshimpanga, wakosha mutu ne bituha bia munyinyi ne dianyi.

²¹Wakuvuwa bintu bia munda ne bioku ne mai, Mose wakosha tshimpanga tshijima ha tshioshelu, eu udi mulambu udi utua dihembu, mulambu wa kuoshila Yehowa ha kahia, bu muakambila Yehowa Mose.

²²Wakalua ne tshimpanga tshikuabo, tshimpanga tshia kujidila kua bakuidi; Alona ne bana bandi balume bakatentekasha bianza biabo ha mutu ha tshimpanga.

²³Mose wakatshiawila, wakangata mashi atshi, wakâlaba ku lusongo lua ditshu dia ku tshianza tshia balume dia Alona ne ku tshiala tshia ku tshianza tshia balume ne ku munu munene wa dikasa diandi dia balume.

²⁴Bakalua ne bana balume ba Alona; Mose wakateka mashi ku nsongo ya matshu abo ya ku tshianza tshia balume ne ku biala biabo bia ku tshianza tshia balume ne ku bana banene babo ba ku makasa a balume, Mose wakantumina mashi ku tshioshelu.

²⁵Wakangata dianyi ne mukala wakadi ne dianyi ne dianyi dionso dia ha mutu ha bintu bia munda ne lukutu lua mutshima ne tumuma tubidi ne dianyi diabi ne tshibelu tshia ku tshianza tshia balume,

²⁶wakangata mukala umue wakadi kauyi ne luevene ne mukata wakadi ne manyi mela ha mutu ne mukata mukuabo mu tshisaka tshiakadi ne mampa adi kâyi ne luevene ku mesu kua Yehowa, wakayiteka ha mutu ha dianyi ne ha tshibelu;

²⁷wakateka bintu bionso mu bianza bia Alona ne mu bianza bia bana bandi balume, bakabinyukula bu mulambu udibo banyukula ku mesu kua Yehowa.

²⁸Mose wakangata bintu mu bianza biabo, wakabisha ha tshioshelu tshia mulambu wa kahia, ebi mbintu bia kujidila nʼabi bakuidi bu tshintu tshidi tshitua dihembu kudi Yehowa eu udi mulambu wa kuoshila Yehowa ha kahia.

²⁹Mose wakangata tshiadi, wakatshinyukula ku mesu kua Yehowa: etshi ntshintu tshia Mose tshia ku tshimpanga tshia kujidila nʼatshi bakuidi, bu muakambila Yehowa Mose.

³⁰Mose wakangata manyi adibo bela ha mutu, ne mashi akadi ha tshioshelu wakabimiamina ha Alona ne ha bilulu biandi ne ha bana bandi balume ne ha bilulu biabo, wakajidila Alona ne bilulu biandi ne bana bandi balume ne bilulu bia bana bandi balume bakadi nʼandi.

³¹Mose wakambila Alona ne bana bandi balume ne, Nulambe munyinyi mu mai a kahia ku mbelu kua ntenta wa kusangakena, nûdie ne mampa adi mu tshisaka tshidi ne bintu bia tshijila bu munakamba ne, Alona ne bana bandi balume nebaudie.

³²Munyinyi udi mushale ne mampa adi mashale nubioshe mu kahia.

³³Kanuluhuki ku tshibi tshia ntenta wa kusangakena matuku muanda mutekete tô ne hanuashikisha matuku a kujidila kuenu, bualu bua Yehowa neanujidile matuku muanda mutekete.

³⁴Tuakuenza lelu bu muakamba Yehowa bua kunubuikidila bubi.

³⁵Nenuikale ku mbelu kua ntenta wa kusambakena munya ne butuku tô matuku muanda mutekete, nutumikile dî dia Yehowa bua kanufu bienu, bualu bua Yehowa wakangambila nunku.

³⁶Alona ne bana bandi balume bakenza mei onso akamba Yehowa mukana mua Mose.