Read tshiluba Yelemiya 1 Bible Online

Yelemiya 1 - tshiluba bible

Yelemiya 1

¹Â mmei a Yelemiya, muana wa Hilekiya, muakuidi wa munkatshi mua bakuidi bakadi ku Anatota mu buloba bua Benyamina.

²Dî dia Yehowa diakalua kudiye mu matuku a Yoshiya, muana wa Amona, mukelenge wa Yuda, mu tshidimu tshia dikumi ne tshisatu tshia bukokeshi buandi.

³Dî edi diakalua kudiye kabidi mu matuku a Yehoyakima, muana wa Yoshiya, mukelenge wa Yuda; diakashala tô ne kunshikidilu kua tshidimu tshia dikumi ne tshimue tshia bukokeshi bua Sedekiya, muana wa Yoshiya, mukelenge wa Yuda, ne tô ne hakayabo ne Bena Yelushalema mu buhika mu ngondo muitanu.

⁴Dî dia Yehowa diakalua kundi, diamba ne,

⁵Diambedi tshiyi muanji kukufuanyikisha munda mua mamu webe nakakumanya, ne diambedi kuyi muanji kuhatuka munda muandi nakajidila; nakakusungula muprofete wa bisamba bia bantu.

⁶Mu diba adi nakamba hanyi ne, Aka, Mukelenge Yehowa! Mona, tshiena mua kuakula bimpe, bualu hua ntshidi anu muana.

⁷Kadi Yehowa wakangambila ne, Kuambi ne, Ntshidi anu muana; bualu bua neuye kudi muntu yonso kundi nkutuma, newambe mei onso anakuambila.

⁸Yehowa wakamba ne, Kuikadi ne buowa kudibo, hualu bua ndi nʼebe bua kukuhandisha.

⁹Mu diba adi Yehowa wakolola tshianza tshiandi, wakalenga mukana muanyi. Yehowa wakangambila kabidi ne, Mona, nakuteka mei anyi mukana muebe;

¹⁰mona, lelu eu nakukuteka ha mutu ha bisamba ne makelenge, bua kujula ne bua kushimbula, bua kubutula ne bua kunyanga, bua kuasa ne bua kukuna.

¹¹Dî dia Yehowa diakalua kundi kabidi ne, Yelemiya, udi umona tshinyi? Nakamuitaba ne, Ndi mmona mulangala wa mutshi wa amande.

¹²Yehowa wakangambila ne, Wakumona bimpe, bualu bua ndi ndama dî dianyi bua kudishikisha.

¹³Dî dia Yehowa diakalua kundi tshiakabidi diamba ne, Udi umona tshinyi? Nakamuitaba ne, Ndi mmona luesu lunene lua mai adi asaba, ne mpala walu udi utangila ku node.

¹⁴Hashishe Yehowa wakangambila ne, Makenga neahatuke mafume ku node; nealue kukuata bonso badi bashikame mu buloba ebu.

¹⁵Yehowa wakamba ne, Mona, ndi mbikila ba mu meku onso a mu makelenge a ku node; nebalue, buonso buabo nebajadike nkuasa yabo ya bunfumu ku bibuelelu bia ku bibi bia mu Yelushalema, bua kushimbulabo ngumbu idi inyungulula musoko ku nseke yonso, ne bua kuluishabo bena misoko yonso ya mu Yuda.

¹⁶Nembambile mei onso a kulumbulula kuanyi bua malu mabi abo onso, bualu bua bakundekela, bakuoshila nzambi mikuabo musenga wa manananshi, bakutendelela bintu biakusongabo ne bianza biabo.

¹⁷Nunku suika mukaba mu tshimono tshiebe, juka, ubambile mei onso andi nkuambila. Kuzakadi bua bualu buabo, bua meme tshikuzakashi ku mpala kuabo.

¹⁸Mona, lelu eu ndi nkuvuisha bu musoko wa lumbu, ne bu dikunshi dia tshiamu, ne bu bimanu bia tshiamu tshia mitaku ku mpala kua bena buloba aba bonso, ku mpala kua bakelenge ba Yuda, ku mpala kua baminyampala babo, ku mpala kua bakuidi babo, ne kua bantu ba hatuhu ba mu buloba ebu.

¹⁹Yehowa wakamba ne, Nebaluangane nʼebe, kadi kabena bakuhita bukole; bualu bua meme ndi nʼebe bua kukuhandisha.