Read tshiluba Yelemiya 13 Bible Online

Yelemiya 13 - tshiluba bible

Yelemiya 13

¹Yehowa wakangambila ne, Ya biebe, ule mukaba wa tshilamba tshia lin, ûsuike mu tshifuka tshiebe, kûtu mu mai nansha.

²Nunku nakula mukaba bu mu dî dia Yehowa, nakausuika mu tshifuka tshianyi.

³Dî dia Yehowa diakalua kundi tshiakabidi ne,

⁴Angata mukaba uwakula, udi mu tshifuka tshiebe, juka, uye ku musulu wa Pelata, ûsokokeku mu mutanta wa dibue.

⁵Nunku nakaya, nakausokoka hehi ne musulu wa Pelata, bu muakangambila Yehowa.

⁶Hakahita matuku a bungi, Yehowa wakangambila ne, Juka biebe, uye ku musulu wa Pelata, wangateku mukaba unakakuambila bua kûsokokaku.

⁷Nunku nakaya ku musulu wa Pelata, nakumbula, nakangata mukaba mu muaba unakausokoka; ne, monai, mukaba wakumana kunyanguka, kawakadi ne mudimu kabidi.

⁸Mu diba adi dî dia Yehowa diakalua kundi ne,

⁹Yehowa udi wamba ne, Nenyange dihetu dia Bena Yuda ne dihetu dinene dia Bena Yelushalema muomumue.

¹⁰Bantu aba babi badi bahidia kunvua mei anyi, badi benda mu tshitshu tshia mu mitshima yabo, bakalonda nzambi mikuabo bua kuyikuatshilabo mudimu ne bua kuyitendelelabo, nebikale bu mukaba eu udi kauyi ne mudimu kabidi.

¹¹Bualu bua bu mudi mukaba ulamatangana ne tshifuka tshia muntu, nunku Yehowa udi wamba ne, Nakulamakasha Bena Isalele bonso ne Bena Yuda bonso kundi, bua bobo bikale kundi bu bantu banyi, bu dina dianyi, bu butumbi buanyi ne bu buneme buanyi; kadi bobo kabakunvua.

¹²Nunku ubambile dî edi ne, Yehowa, Nzambi wa Isalele, udi wamba ne, Mulondo wonso neûle tente ne nvinyo. Nebakukonke ne, Katuena bamanye ne, Mulondo wonso neûle tente ne nvinyo, anyi?

¹³Hashishe wewe neubambile ne, Yehowa udi wamba ne, Monai, nenkuatshishe bantu bonso ba ha buloba maluvu, kudi bakelenge badi bashikame mu nkuasa wa Davidi, bakuidi ne baprofete ne ba mu Yelushalema bonso.

¹⁴Yehowa udi wamba ne, Nembatutakashangane, batatu ne bana babo hohamue; tshiena mbafuila luse, tshiena mbasungila, luse kaluena lunkuata bua bualu buabo, kakuena tshintu tshidi mua kunkanda bua meme kubabutula.

¹⁵Unvuai, telejai matshu, kanuikadi ne dihetu, bualu bua Yehowa wakuamba dî diandi.

¹⁶Tumbishai Yehowa Nzambi wenu, diambedi yeye kayi muanze kunutumina mîdima, diambedi makasa enu kayi manze kulenduka ha mutu ha mikuna idi ne mîdima, ne hantshidi nukeba munya, yeye neawandamune bua kuikalau mufitu, neauvuishe mîdima mikole.

¹⁷Kadi binuahidia kunyua dî diandi, mutshima wanyi neudile mu musokoko bualu bua dihetu dienu; binsonshi bia bungi bia ku mesu kuanyi nebihueke hanshi, bualu bua bakukuata tshisumbu tshia mikoko ya Yehowa mu buhika.

¹⁸Wambile mukelenge ne mukelenge mukashi mamu wandi mumuledi ne, Nudihuekeshe bikole, nushikame hanshi; bualu bua bintu bilengele bidi biasa ha mitu henu, tshifulu tshienu tshia bukelenge tshihite bulengele, biakuhona hanshi.

¹⁹Bakinshila bibi bia ku misoko ya ku Sude, kakuena muntu wakunzulula kabidi; bakuya ne ba mu Yuda mu buhika, buonso buabo mene; bakuya ne buonso buabo mene.

²⁰Banduluka, umone badi bafume ku node. Tshisumbu tshia mikoko tshiakukuhabo tshidi hanyi, tshisumbu atshi tshilengele?

²¹Newambe tshinyi hatekabo bantu ha mutu hebe baudi mumane kuyisha bua kuikalabo balunda bebe? Kanyinganyinga kakena kakukuata bu didinyenga dia mukashi udi wamba kulela, anyi?

²²Biwadikonka mu mutshima webe ne, Malu â onso akunkuata bua tshinyi? Mbua malu mabi ebe a bungi badi bavula bivualu biebe, ne dikenga didi dikukuata to ne ku bikankanyi biebe.

²³Muena Atiopa udi mua kuandamuna dikoba diandi, anyi nkashama udi mua kuandamuna matoba andi, anyi? Nunku nuenu batu benza malu mabi nenumanye mua kuenza malu makane.

²⁴Nunku nembatangadishe bu mudi bisote bijimina ku mpala kua luhehele lua mu tshihela.

²⁵Yehowa udi wamba ne, Elu nduseke luebe lua buhianyi, ne tshituha tshinakukuidikishila, bualu bua wakumpua meme muoyo, wakueyemena mashimi.

²⁶Nunku nenkuvule bilulu ku mesu kuebe, bundu buebe nebumueneke.

²⁷Nkutangila malu mabi ebe, masandi ebe, mei a kusamina kuebe kua masandi, bundu bua masandi ebe, ha mutu ha mikuna ya mu mpata. Mulau newikale kûdi, Yelushalema! Musangu neulehe bule bishi kuyi muanze kutokeshibua?