Read tshiluba Yelemiya 28 Bible Online

Yelemiya 28 - tshiluba bible

Yelemiya 28

¹Mu tshidimu atshi mene, ku tshibangidilu tshia bukokeshi bua Sedekiya, mukelenge wa Yuda, mu tshidimu tshiabu tshinai ne ngondo wabu muitanu, Hananya, muana wa Azû, muprofete wa ku musoko wa Gibeona, wakangambila ai mu nsubu wa Yehowa, ku mesu kua bakuidi ne bantu bonso ne,

²Yehowa wa misumba, Nzambi Isalele udi wamba ne, Nakutshibula muishi wa tshikokedi wa mukelenge wa Babulona.

³Diambedi bidimu bibidi kabiyi bianze kukumbana, nempingashe mpanza yonso yakadi nsubu wa Yehowa, yakumushabo kudi Nebukadenesâ, mukelenge wa Babulona, ne yakayeye nʼai ku Babulona.

⁴Yehowa udi wamba ne, Nempingashe kabidi mu muaba eu Yekoniya, muana wa Yehoyakima, mukelenge wa Yuda, ne ba mu Yuda to bakayabo nʼabo mu buhika ku Babulona; bualu bua nentshibule mutshi wa tshikokedi wa mukelenge wa Babulona.

⁵Hashishe Yelemiya muprofete wakakudimuna Hananya muprofete dî ku mpala kua bakuidi ne kua bantu bonso bakadi bimana mu nsubu wa Yehowa.

⁶Yelemiya muprofete wakamuambila ne, Amen. Yehowa enze nunku, Yehowa enze mei ebe awakuamba, bua kuhingasheye mpanza yakadi mu nsubu wa Yehowa ne honso hakadi mu buhika mu Babulona, abihingashe ku muaba eu.

⁷Kadi unvua biebe dî edi dindi nkuambila mu matshu ebe ne matshu a bantu bonso.

⁸Baprofete bakadiku ku mpala kuanyi ne ku mpala kuebe, mu matuku a kale, bakamba mei a kuhisha nʼau bisamba bia bungi ne makelenge manene, mei a kubadimusha bua nvita, bua makenga ne bua tshihuhu.

⁹Hamba muprofete dî bua ditalala, halua dî dia muprofete dilelela, nunku nebamanye bua muprofete eu ne, Yehowa udi mumutume bulelela.

¹⁰Hashishe Hananya muprofete wakumusha mutshi wa tshikokedi mu nshingu wa Yelemiya muprofete, wakautshibula.

¹¹Hananya wakamba dî edi ku mesu kua bantu bonso ne, Yehowa udi wamba ne, Nentshibule muomumue mutshi wa tshikokedi wa Nebukadenesâ, mukelenge wa Babulona, bua kumusha mu nshingu ya bantu ba mu bisamba bionso diambedi bidimu bibidi kabiyi bianze kukumbana. Yelemiya muprofete wakaya mu nshila wandi.

¹²Hakadi Hananya muprofete mumane kutshibula mutshi wa tshikokedi wakadi ha nshingu wa Yelemiya muprofete, dî dia Yehowa diakalua kudi Yelemiya ne,

¹³Ya wambile Hananya ne, Yehowa udi wamba ne, Wewe wakutshibula mutshi wa tshikokedi udibo benze ne mitshi, kedi newikale ne mutshi wa tshikokedi tshia tshiamu mu muaba wau.

¹⁴Bualu bua Yehowa wa misumba. Nzambi wa Isalele, udi wamba ne, Meme nakuteka mutshi wa tshikokedi wa tshiamu mu nshingu ya ba mu bisamba ebi bionso, bua bakuatshile Nebukadenesâ, mukelenge wa Babulona, mudimu; nebamukuatshile mudimu bulelela, nakumana kufila nyama yonso ya mu mpata mu bianza biandi kabidi.

¹⁵Yelemiya muprofete wakambila Hananya muprofete ne, Unvua biebe, Hananya! Yehowa kakukutuma nansha; kadi wewe udi wenzesha bantu aba bua kueyemenabo mei a mashimi.

¹⁶Nunku Yehowa udi wamba ne Mona, nenkûmushe ha buloba; tshidimu etshi neufue biebe, bualu bua wakuamba mei a kutombokela nʼau Yehowa.

¹⁷Nunku Hananya muprofete wakafua tshidimu atshi mene mu ngondo wa muanda mutekete.