Read tshiluba Yelemiya 29 Bible Online

Yelemiya 29 - tshiluba bible

Yelemiya 29

¹Â mmei a mu mukanda mufume ku Yelushalema wakatuma Yelemiya muprofete kudi bakadi bashala ba munkatshi mua bakulu bakaya mu buhika, ne kudi bakuidi, baprofete ne bantu bonso bakadi Nebukadenesâ mumushe ku Yelushalema bua kuya nʼabo mu buhika ku Babulona.

²Wakatuma mukanda hakumukabo mu Yelushalema kudi Yekoniya mukelenge, mukelenge mukashi mamuʼandi mumuledi, bantu bandi batungula, baminyampala ba mu Yuda ne ba mu Yelushalema, bena mabaya ne batudi ba biamu.

³Wakautuma mu bianza bia Elasa, muana wa Shafana, ne Gemaleya, muana wa Hilekiya udi Sedekiya, mukelenge wa Yuda, mutume ku Babulona kudi Nebukadenesâ, mukelenge wa Babulona, wamba ne,

⁴Yehowa wa misumba, Nzambi wa Isalele, udi wambila bantu bonso bakumushisheye mu Yelushalema bua kubuelabo mu buhika mu Babulona dî edi ne,

⁵Asai nsubu, nushikamemu; nukune bintu mu madimi, nudie mamuma abi.

⁶Nubake bakashi, nulele nʼabo bana ba balume ne bana ba bakashi, nuangatshile bana benu balume bakashi, nufile bana benu ba bakashi ku mabaka, bua bobo balele bana ba balume ne bana ba bakashi; nuvulangane muaba au, kanukebi.

⁷Nukebe kuvuishila musoko unakanutuma mu buhika ditalala, nûlombele diakalengele kudi Yehowa; bua bikalau ne ditalala, nuenu nenuikale ne ditalala.

⁸Bualu bua Yehowa wa misumba, Nzambi wa Isalele, udi wamba ne, Kanuitabushi bua baprofete badi munkatshi muenu ne bena mbuku banudinge; kanuteleji matshu enu ku bilota bidibo balota.

⁹Bualu bua badi banuambila mei a mashimi mu dina dianyi. Yehowa udi wamba ne, Tshiakubatuma.

¹⁰Bualu bua Yehowa udi wamba ne, Hakumbanyina Babulona bidimu makumi muanda mutekete, nendue kunudi, nenshikishe dî dianyi dimpe dinakunuambila, nennuhingashe mu muabu eu.

¹¹Yehowa udi wamba ne, Bua ndi mumanye meji andi nnuelela, adi meji a kunuvuisha ditalala, kaena a kunuvuisha diyoyo; adi bua kunuha ditekemena mu matuku atshidi ku mpala.

¹²Nenumbikile, nenulue kuntendelela, ne nennûnvuile.

¹³Nenunkebe ne nenumpete, hanuankeba ne mitshima yenu mijima.

¹⁴Yehowa udi wamba ne, Nengitabushe bua nuenu nunsangane, nenkudimune buhika buenu, nennusangishe bua kunûmusha mu bisamba bionso ne mu miaba yonso inakunuihata; nendue nʼenu kabidi mu muaba unakanuangata hanakanutuma mu buhika.

¹⁵Bualu bua nuakuamba ne, Yehowa wakutubishila baprofete mu Babulona;

¹⁶edi ndî didi Yehowa wamba bua mukelenge udi mushikame mu nkuasa wa bukelenge wa Davidi, ne bua bantu bonso badi bashikame mu musoko eu, bana benu mene badi kabayi baluhuke nʼenu bua kuya mu buhika.

¹⁷Yehowa wa misumba udi wamba ne, Monai, nembatumine muele wa nvita, tshiole ne tshihuhu; nembavuishe bu mamuma mabi a nfigi adibo kabayi mua kudia bualu bua adi atamba bubi.

¹⁸Nembihate ne muele wa nvita, tshiole ne tshihuhu, ne nembafile bua kuikalabo bu tshidi tshikuatshisha buowa munkatshi mua makelenge onso a ha buloba, nebikale bu tshintu tshiela mulau, tshidi tshibakemesha, tshidibo babingila ne tshidibo bahenda kudi ba munkatshi mua bisamba bionso bia bantu kunabatuma.

¹⁹Bualu bua Yehowa udi wamba ne, Kabakutumikila mei anyi anakabatumina kudi bantu banyi baprofete, njuka bianyi ne lunkelu bua kubatuma; kadi kabakasua kunvua.

²⁰Nunku unvuai dî dia Yehowa, nuenu bonso badi mu buhika, banakumusha mu Yelushalema bua kubatuma mu Babulona.

²¹Yehowa wa misumba, Nzambi wa Isalele, udi wamba bualu bua Ahaba, muana wa Kolaya, ne bua Sedekiya, muana wa Maseya, badi banuambila mei a mashimi mu dina dianyi ne, Monai, nembafile mu bianza bia Nebukadenesâ, mukelenge wa Babulona, ne yeye neabashihe ku mesu kuenu.

²²Bua bualu buabo, ba mu Yuda badi mu buhika mu Babulona nebabange kuela bantu bakuabo mulau, bamba ne, Yehowa akuvuishe bu Sedekiya ne bu Ahaba badi mukelenge wa Babulona muoshe mu kahia!

²³Yehowa udi wamba ne, Bualu bua bantu aba bakuenza malu a hatuhu mu Isalele, bakuenda masandi ne bakashi ba bena mutumba nʼabo; bakuamba mei a mashimi mu dina dianyi andi tshiyi mubambile bua kuambabo; meme nyeye udi mumanye bualu ebu ne udi mumanyi wabu.

²⁴Wambile Shemaya, Muena Nehelama, ne,

²⁵Yehowa wa misumba, Nzambi wa Isalele, udi wamba ne, Bualu bua wewe wakutuma mikanda mu dina diebe kudi bantu bonso ba mu Yelushalema ne kudi Sefanya muakuidi, muana wa Maseva, ne kudi bakuidi bakuabo bonso, wakufunda ne,

²⁶Yehowa wakukusungula bu muakuidi mu muaba wa Yehoyada muakuidi, bua balombodi bikale mu nsubu wa Yehowa ne ha mutu ha muntu yonso munale udi udivuisha muprofete ne bua kumubuesha mu nkanu ne mu tshikunyi.

²⁷Nunku bualu kai kuena muanze kubela Yelemiya, muena musoko wa Anatota, udi udivuisha muprofete munkatshi muenu?

²⁸Bualu hua yeye wakututumina tuetu ba mu Babulona dî ne, Buhika ebu nebulehe musangu mule, nunku asai nsubu, nushikamemu, nukune bintu mu madimi, nudie mamuma abi.

²⁹Safanya muakuidi wakabala mukanda eu mu matshu a Yelemiya muprofete.

³⁰Mu diba adi dî dia Yehowa diakalua kudi Yelemiya ne,

³¹Utumine badi mu buhika ebu ai edi ne, Yehowa udi wamba bua Shemaya, Muena Nehelama ne, Bualu bua Shemaya wakunuambila mei a, ne meme tshiena mumutume nansha, ne yeye wakunuenzesha bua nuenu kueyemena mei a mashimi;

³²nunku Yehowa udi wamba ne, Monai, nenkengeshe Shemaya, Muena Nehelama, ne bana bandi kabidi. Yeye kena wikala ne muntu umuehele washala munkatshi mua bantu aba, ne kena umona diakalengele dindi nvuishila bantu banyi, bualu bua yeye wakuamba mei a kutombokela nʼau Yehowa.