Read tshiluba Yelemiya 52 Bible Online

Yelemiya 52 - tshiluba bible

Yelemiya 52

¹Sedekiya wakadi ne bidimu makumi abidi ne tshimue hakabangeye kukokesha; wakakokesha bidimu dikumi ne tshimue mu Yelushalema. Dina dia mamu andi diakadi Hamutala, muana mukashi wa Yelemiya wa ku Libena.

²Yeye wakenza malu akadi mabi ku mesu kua Yehowa, bu muakenza Yehoyakima.

³Tshiji tshia Yehowa tshiakatema bikole kudi Bena Yelushalema ne Bena Yuda tô ne hakahiteye ku mesu kuandi. Sedekiya wakatombokela mukelenge wa Babulona.

⁴Mu tshidimu tshia tshitema tshia bukokeshi buandi, mu ngondo wa dikumi, mu dituku dia dikumi dia ngondo, Nebukadenesâ, mukelenge wa Babulona, ne masalayi andi onso, wakalua kuluangana ne Bena Yelushalema; bakasaku bitudilu biabo, ne bakasa lumbu lua kuba tshintshimika nseke yonso ne bielelu bia nvita.

⁵Bakatshintshimika musoko to ne ku tshidimu tshia dikumi ne tshimue tshia bukokeshi bua Sedekiya.

⁶Mu ngondo muinai, mu dituku dia tshitema dia mu ngondo eu, tshiole tshiakadi tshikole mu musoko ne kakuakadi bia kudia bua bena buloba kudia.

⁷Hashishe bakashimbula tshituha tshia ngumbu ya musoko, ne bena nvita bonso bakanyema, bakaluhuka mu musoko butuku, bahatukilamu mu nshila wa ku tshibi tshia hankatshi ha ngumbu ibidi, wakayila hehi ne tshibidi tshia mukelenge; (mu diba adi Bena Kasada bakadi batshintshimika musoko mu nseke yonso); bakayila mu nshila wa ku tshibanda tshia Alabâ.

⁸Kadi masalayi a Bena Kasada akalonda mukelenge mu nyima, akaheta Sedekiya mu mpata ya Yeleko, ne masalayi andi onso akamulekela, akatangadika.

⁹Nunku bakakuata mukelenge, bakaya nʼandi kudi mukelenge wa Babulona ku Libela mu buloba bua Hamata, ne yeye wakamulumbu luisha.

¹⁰Mukelenge wa Babulona wakashiha bana ba Sedekiya ku mpala kuandi. Wakashiha kabidi baminyampala ba Yuda bonso ku Libela.

¹¹Wakashiha mesu a Sedekiya; ne mukelenge wa Babulona wakamusuika mu nkanu, wakaya ngandi ku Babulona, wakamubuesha mu nsubu wa lukanu tô ne ku dituku dia lufu luandi.

¹²Mu ngondo muitanu, mu dituku dia dikumi dia ngondo—tshidimu tshiakadi tshidimu tshia dikumi ne tshitema tshia bukokeshi bua mukelenge Nebukadenesâ, mukelenge wa Babulona—Nebuzaladana, kapitene ka bansentedi ba masalayi, mukuatshishi wa mukelenge wa Babulona, wakalua ku Yelushalema.

¹³Yeye wakoshesha nsubu wa Yehowa ne nsubu ya mukelenge; wakayoshesha ne nsubu yonso ya mu Yelushalema, nsubu minene yonso mene ne kahia.

¹⁴Masalayi onso a Bena Kasada akadi kudi kapitene ka bansentedi ba masalayi akashimbula ngumbu ya Yelushalema yakunyunguluka musoko.

¹⁵Nebuzaladana, kapitene ka masalayi au, wakaya ne bantu batambe buhele, wakabahesha mu buhika; wakaya ne bantu bakadi bashala mu musoko ne bakuabo bakumuka kudi Sedekiya bua kudifila kudi mukelenge wa Babulona hohamue ne bena mabaya hakuabo bakadi bashala.

¹⁶Kadi Nebuzaladana, kapitene ka masalayi, wakashiya bakuabo bena buloba abu bahite buhele bua kuikalabo bahempi ba mionshi ya tumuma tua nvinyo ne ba bidime ba mu madimi.

¹⁷Bena Kasada bakatshibula makunshi a tshiamu tshia mitaku bituha akadi mu nsubu wa Yehowa, bitekelu bia tshiowelu ne tshiowelu tshia tshiamu tshia mitaku biakadi mu nsubu wa Yehowa; bakaya ne biamu biabi bia mitaku bionso ku Babulona.

¹⁸Bakaya ne ngesu kabidi ne tukasu tua bianza, biamu bia kujima nʼabi minda, malonga, nkutu ne bintu bionso bia tshiamu tshia mitaku biakenzabo nʼabi mudimu mu ntempelo.

¹⁹Muomumue, bakaya ne mpanza, malonga a kutuadilamu kahia, malonga makuabo, ngesu, bitekelu bia minda, nkutu ne bitembue—tshintu tshiakadi tshia tshiamu tshia or, kapitene ka masalayi kakaya nʼatshi bua or watshi; tshintu tshia tshiamu tshia argent, kakaya nʼatshi bua argent watshi.

²⁰Makunshi abidi, tshiowelu tshimue, ngombe ya tshiamu tshia mitaku dikumi ne ibidi yakadi muinshi mua tshiowelu bu bitekelu biatshi, biakenzabo kudi mukelenge Solomo bua kubiteka mu nsubu wa Yehowa—bintu ebi bionso biakadi ne bujitu bua tshiamu tshia mitaku buakadibo kabayi mua kuidikisha.

²¹Dikunshi ne dikunshi dia makunshi au abidi diakadi ne bule bua coudées[11] dikumi ne muanda mukulu, kubulunga kua dikunshi kuakadi coudées dikumi ne ibidi; muhimbu wa dikunshi wakadi bu ntanta wa minu inai; munda muadi muakadi mutuhu.

²²Tshilenga tshia tshiamu tshia mitaku tshiakadi ha mutu ha dikunshi ne dikunshi; bule bua tshilenga ne tshilenga buakadi coudées itanu, ne bakalengesha bilenga ebi ne bifuanyikishi bia mionshi mihindakasha ne bia tumuma tua grenades biakafulabo ne tshiamu tshia mitaku. Dikunshi dibidi diakadi ne bifuanyikishi bia mionshi mihindakasha ne bia grenades muomumue ne dikunshi dikuabo.

²³Mamuma a grenades makumi tshitema ne asambombo akadi mu nseke yonso ya makunshi, mamuma onso a grenades akadi hamʼbidi ha bifuanyikishi bia mionshi mihindakasha akadi lukama.

²⁴Kapitene ka masalayi kakakuata Selaya, muakuidi munene, ne Sefanya, muakuidi muibidi, ne balami basatu bakadi balama mishiku ya mbelu ya nsubu.

²⁵Kakakuata muntu mutungula wakadi ha mutu ha bena nvita, kakamûmusha ku musoko, ne bantu muanda mutekete ba ha buihi ne mukelenge bakamonaku mu musoko; kakakuata secrétaire wa kapitene ka masalayi wakadi ne mudimu wa kufunda mena a bantu ba mu buloba bakabuela mu busalayi; ne bantu makumi asambombo ba bena buloba abu bakamonaku mu musoko.

²⁶Nebuzaladana, kapitene ka bansentedi ba masalayi, wakakuata bantu aba. Wakaya nʼabo kudi mukelenge wa Babulona ku Libela.

²⁷Mukelenge wa Babulona wakabakina, wakabashiha ku Libela mu buloba bua Hamata. Nunku bakumusha Bena Yuda mu buloba buabo, bakaya nʼabo mu buhika.

²⁸Ebu mbungi bua bantu bakadi Nebukadenesâ muye nʼabo mu buhika: mu tshidimu tshia muanda mutekete, Bena Yuda binunu bisatu ne makumi abidi ne basatu.

²⁹Mu tshidimu tshia dikumi ne muanda mukulu tshia bukokeshi bua Nebukadenesâ, wakumusha bantu nkama muanda mukulu ne makumi asatu ne bantu babidi ku Yelushalema bua kuya nʼabo mu buhika.

³⁰Mu tshidimu tshia makumi abidi ne tshisatu tshia bukokeshi bua Nebukadenesâ, Nebuzaladana, kapitene ka masalayi au, wakaya ne Bena Yuda nkama muanda mutekete ne makumi anai ne bantu batanu, wakababuesha mu buhika. Bantu aba bonso bakadi bantu binunu binai ne nkama isambombo.

³¹Mu tshidimu tshia makumi asatu ne muanda mutekete tshia mu buhika bua Yehoyakina, mukelenge wa Yuda, mu ngondo wa dikumi ne muibidi, mu dituku dia makumi abidi ne atanu dia ngondo, Ewile-melodaka, mukelenge wa Babulona, mu tshidimu tshia kumudilu tshia bukokeshi buandi, wakabandisha Yehoyakina, mukelenge wa Yuda, wakamuhatula mu nsubu wa lukanu.

³²Wakamuambila mei a kalolo, wakajadika nkuasa wandi wa bukelenge ha mutu ha nkuasa ya bakeleye bakuabo bakadi nʼandi mu Babulona,

³³wakamûmusha bilulu biandi bia lukanu. Yehoyakina wakadia bia kudia biandi ku mpala kua mukelenge matuku onso a muoyo wandi.

³⁴Mukelenge wa Babulona wakamuha dikuatshisha ku dituku ku dituku, tshituha tshia bintu bia buatshia-buatshia tô ne ku dituku dia lufu luandi. Wakenza nunku matuku onso a muoyo wandi.