Read tshiluba Yehezekele 23 Bible Online

Yehezekele 23 - tshiluba bible

Yehezekele 23

¹Dî dia Yehowa diakalua kundi kabidi ne,

²Muana wa muntu, bakashi babidi bakadiku, bana ba difu dimue.

³Bakalonda malu a masandi mu Ejipitu; bakalonda malu a masandi hakatshidibo bansongakashi. Mu buloba abu balume bakakamata mabele abo, ne bakalenga bianza biabo ha biadi bia bumama buabo.

⁴Mena abo akadi Ohola, muanʼa bute, ne Oholiba, muakunyʼandi. Bakalua banyi, bakalela bana ba balume ne bana ba bakashi. Mena abo akadi nunku: Samalea udi Ohola,[6] ne Yelushalema udi Oholiba.[7]

⁵Ohola wakalonda malu a masandi hakadiye wanyi, wakatamba kulesha dinanga kudi bamunangi bandi, kudi Bena Ashû mene, bena mutumba nʼandi,

⁶bakadi baluate bilulu bikunze, bakadi ba-gouverneur ne miloho, buonso buabo bakadi bansongalume balengele, bakenda babande ha nyima ha tubalu.

⁷Yeye wakadifila kudibo mu masandi, buonso buabo bakadi balume bahite bulengele ba munkatshi mua Bena Ashû; wakadinyanga ne mpingu ya bantu aba bakatambeye kunanga.

⁸Katshia ku matuku akatumeye mu Ejipitu, kena muanze kulekela masandi andi; bualu bua ku bunsongakashi buandi bakasangila nʼandi bulalu, bakalenga bianza biabo ku mabele a bumama buandi, bakatamba kulonda nʼandi malu a masandi.

⁹Bua malu â nakamufila mu bianza bia bamunangi bandi, mu bianza bia Bena Ashû mene bakatambeye kunanga.

¹⁰Bobo bakamuvula bivualu biandi, bakakuata bana bandi ba balume ne ba bakashi, bakamushiha ne muele wa nvita; ne hakamulumbuluishabo, lumu luandi luakanyanguka munkatshi mua bakashi bakuabo.

¹¹Muakunyʼandi Oholiba wakamona muanda eu, kadi yeye wakatamba mukuluʼandi kunyanguka ku lukuka, ne masandi andi akahita a mukuluʼandi bukole.

¹²Yeye wakatamba kunanga Bena Ashû, ba-gouverneur ne miloho, bena mutumba nʼandi, baluate bivualu bihite bulengele, bende ha nyima ha tubalu, buonso buabo bakadi bansongalume balengele.

¹³Nakatangila bu muakadinyangeye, bakashi aba babidi bakaya mu nshila umue.

¹⁴Yeye wakavudisha masandi andi; bualu bua wakamona mindidimbi ya balume mifunda ha bimanu bia nsubu, bifuanyikishi bia Bena Kasada bifundahu ne mukubu mukunze-kunzû,

¹⁵badijingila mikaba mu bifuka biabo, badijingila bitambala bile ku mitu yabo, buonso buabo bakamueneka bu bakokeshi, bafuanangane ne mindidimbi ya Bena Babulona, ba mu buloba bua Bena Kasada muakaledibuabo.

¹⁶Hakabatangileye, wakatamba kubananga, wakabatumina ba-messager bandi mu buloba bua Bena Kasada.

¹⁷Hashishe Bena Babulona bakahia kudiye, bakasangila nʼandi bulalu mu dinanga, bakamunyanga ne masandi abo, ne yeye wakanyanguka kudibo, ne mutshima wandi wakabahidia.

¹⁸Wakasokolola masandi andi nunku, wakamuenesha butaka buandi; bua malu â mutshima wanyi wakamuhidia, bu muakahidia mutshima wanyi mukuluʼandi.

¹⁹Kadi wakavudisha masandi andi, uvuluka biandi matuku a bunsongakashi buandi, hakalondeye malu a masandi mu buloba bua Ejipitu.

²⁰Wakatamba kunanga balume bakenda nʼandi masandi, bakadi ne lukuka lua mubidi bu lukuka lua nyama ya mpunda ne lua balume ba tubalu.

²¹Nunku wakavuluisha bantu bua malu a masandi a mu bunsongakashi buebe, hakakamatabo mabele ebe kudi Bena Ejipitu, ne hakalengabo ha tshiadi tshia bunsongakashi buebe.

²²Nunku, Oholiba, Mukelenge Yehowa udi wamba ne, Mona, nenjule bakunangi bua kubuelabo mukoso, bobo mene badi mutshima webe uhidia, nembajule bafume ku nseke yonso bua kukuluishabo:

²³Bena Babulona ne Bena Kasada bonso, ba mu Pekoda ne Shoa ne Koa ne Bena Ashû bonso nebalue nʼabo diatshimue, bansongalume balengele, buonso buabo ba-gouverneur ne miloho, bakokeshi ne bena meji, buonso buabo benda ha nyima ha tubalu.

²⁴Nebalue kukuluisha ne bielelu bia nvita, makalu a nvita ne makalu a hatuhu ne tshisumbu tshia bantu; nebaluangane nʼebe nvita bakunyunguluke nseke yonso, bikala ne ngabu wa ha tshiadi ne wa ku diboko ne tshifulu tshia tshiamu. Nenfile dikosa dia tshilumbu tshiebe mu bianza biabo, ne bobo nebalumbuluishe bu mudi kulumbulula kuabo.

²⁵Nengikale nʼebe tshiji tshikole, ne bobo nebakuelele malu mabi mu tshifika munda tshiabo; nebakukose diulu ne matshu, bana benu badi bashala nebashihibue ne muele wa nvita. Nebakuate bana bebe ba balume ne ba bakashi bua kuya nʼabo, ne bana benu badi bashala nebahie mu kahia.

²⁶Nebakuvule bilulu biebe, nebakunyenge bilenga biebe bia mushinga mukole.

²⁷Nunku nenkuleshe malu ebe a tshikama, ne masandi awakalua nʼau ku buloba bua Ejipitu; nunku wewe kuena utangisha mesu ebe kudiu ne kuena uvuluka Ejipitu kabidi.

²⁸Bualu bua Mukelenge Yehowa udi wamba ne, Tangila, nenkufile mu bianza bia baudi ukina, mu bianza bia bantu badi mutshima webe uhidia.

²⁹Bobo nebakuenzele malu mu lukinu luabo, nebakunyenge bintu bionso biwakuheta ku mudimu webe, nebakushiye butaka kuyi ne bivualu. Nebakufuishe bundu bua masandi ebe, malu ebe a tshikama ne a masandi mene.

³⁰Nebakuenzele malu â bualu bua wewe wakenda masandi ne ba mu bisamba bia bantu hawakadinyanga ne ditendelela dia mpingu yabo.

³¹Wewe wakulonda mu nshila wakenda mukuluʼebe wa bakashi; nunku nenteke luhanza luandi mu tshianza tshiebe.

³²Mukelenge Yehowa udi wamba ne, Newikale ne bua kunua luhanza lua mukuluʼebe wa bakashi, ludi lua ndondo ne ludi lunene; newikale bu tshintu tshidibo bahetula ne tshidibo baseka, bualu bua ludi tente.

³³Makenga ne kanyinganyinga nebikukuate, luhanza ludi lukuatshisha bantu buowa ne kubutuka, ludi luhanza lua mukuluʼebe Samalea mene.

³⁴Mukelenge Yehowa udi wamba ne, Wewe neulunue ne neumane bionso bidimu, neulumane tô ne bisekeseke bialu, neuhande mabele ebe; bualu bua nakuamba nunku.

³⁵Bua malu â Mukelenge Yehowa udi wamba ne, Bualu bua wakumpua muoyo, wakungela nyima, nunku wewe neudituadile makenga adi alonda malu ebe a tshikama ne a masandi.

³⁶Yehowa wakankonka ne, Muana wa muntu, neulumbuluishe Ohola ne Oholiba, anyi? Nunku ubamanyishe bua malu mabi abo.

³⁷Bualu bua bakuenda masandi, ne mashi adi ha bianza biabo; bakulonda malu a masandi ne mpingu yabo; bakuela bana babo ba balume bakandelelabo mu kahia bu milambu ya kuoshela mpingu.

³⁸Baku ngenzela malu makuabo kabidi: bakunyanga tshitendelelu tshianyi dituku adi diodimue, bakunyanga matuku anyi a mbingu.

³⁹Bualu bua bakashihabo bana bakalelabo bu mulambu wa kufila kudi mpingu, mu dituku adi diodimue bakabuela mu tshitendelelu tshianyi bua kutshinyanga; ne mona, bakenza nunku mu nsubu muanyi.

⁴⁰Bualu bukuabo kabidi: wewe wakatuma mukenji bua kubikila bantu badi bafuma kule, wakabatumina messager, ne mena, bakalua; ne bua bualu buabo wakowa mai, wakalaba bintu bikunze ku mesu, wakadilengesha ne bilenga,

⁴¹wakashikama ha bulalu bulengeshibue, buikale ne mesa malongolola ku mpala kuabu, bawakateka musenga wanyi wa manananshi ne manyi anyi.

⁴²Diyoyo dia tshisumbu tshinene tshia bakadi basanka ne banaya diakunvuikaku; ne bakalua ne tshisumbu tshia bantu ba hatuhu basangisha ne tshisumbu tshia bakuatshiki ba maluvu bafume ku tshihela; bakabela nkanu ku maboko abo ne bakabasa bifulu bia bukelenge bilengele ku mitu yabo.

⁴³Hashishe nakamba dî edi bualu bua mukashi eu wakamana kukola mu malu a masandi ne, Mpindiu nebalonde nʼandi malu a masandi, ne yeye nende nʼabo, anyi?

⁴⁴Bakaya kudiye bu mudi bantu bakaya kudi muena masandi; bobo baye kudi Ohola ne Oholiba, bakashi aba ba masandi.

⁴⁵Bantu bakane nebabahishe ne dihisha didibo bahisha nʼadi bakashi ba masandi ne dihisha dia bakashi badi bamatshisha mashi a bakuabo hanshi; bualu bua badi bakashi ba masandi, ne mashi adi ha bianza biabo.

⁴⁶Bualu bua Mukelenge Yehowa udi wamba ne, Nendue ne tshisumbu tshia bantu bua kubaluisha, nembafile kudibo bua kubakuatshisha buowa ne bua kunyengabo bintu biabo.

⁴⁷Tshisumbu atshi tshia bantu netshibakume ne mabue, netshibashihe ne miele yabo ya nvita; nebashihe bana babo ba balume ne ba bakashi, neboshe nsubu yabo ne kahia.

⁴⁸Nunku nendekeshe malu a tshikama mu buloba ebu, bua bakashi bonso badimuke biabo, kabalondi malu enu a tshikama.

⁴⁹Difutu dienu nedikale makenga bua malu enu a tshikama, ne nenukenge bualu bua kutendelela kuenu kua mpingu; nenumanye ne, Meme ndi Mukelenge Yehowa.