Read tshiluba Yehezekele 27 Bible Online

Yehezekele 27 - tshiluba bible

Yehezekele 27

¹Di dia Yehowa diakalua kundi ne,

²Wewe kabidi, muana wa muntu, ashila Tulo muadi,

³ambila Tulo, udi mushikame ku tshibuelelu tshia ku mai manene, udi ngendʼa mushinga munkatshi mua bantu ha bungi badi mu maloba a ku muelelu wa mai manene, ne, Mukelenge Yehowa udi wamba ne, Wewe, Tulo, wakuamba ne, Bulengele buanyi budi bulengele tshishiki.

⁴Matshika a buloba buebe akadi anu munkatshi mua mai manene, bibaki bebe bakakuibaka bilengele tshishiki.

⁵Bakahanda mabaya ebe onso a kuenza nʼau matu a mitshi ya cyprès ya ku Senî, bakangata mutshi wa cêdre ku mukuna wa Lebanona bua kusongela mutshi wa kusuikaku bilulu bia buatu.

⁶Bakasonga nkaya yebe ku mitshi ya telebinta ya ku Bashana; bakenza biendedi biebe ne mabaya a nsanga ya ku bisanga bia Kitima, mikale ne mibanga milamikaku.

⁷Tshilulu tshiebe tshia kuendesha nʼatshi buatu tshiakadi tshilulu tshia lin tshilengele tshia ku Ejipitu tshiela ne malenda, tshikale bu dibendela diebe; tshilulu tshia ntenta tshia ha mutu ha buatu tshiakadi tshifike ne tshikunze tshia ku bisanga bia Elisha.

⁸Bantu ba ku Sidona ne ba ku Âwada bakadi bitshi bebe; Tulo, bena meji bebe bakadi munkatshi muenu, bakukukuatshila mudimu bu bena yenda bebe.

⁹Bakulu ba ku Gebala ne bena lungenyi bandi bakadi munkatshi muenu bua kujika mitanta yebe ne kamonyi; matu onso akadi enda ha mai manene ne bena matu bakadi munkatshi muenu bua kuhanyishangana nʼebe bintu biebe.

¹⁰Bantu ba ku Pelasa, Luda ne Puta bakadi mu tshisumbu tshia masalayi ebe, bakadi baluanganyi bebe ba nvita; bakakudika ngabu yabo ne bifulu biabo bia biamu ku bimanu biebe, bakalesha bakuabo butumbi buebe.

¹¹Bantu ba ku Âwada ne ba ku Heleke bakadi ha mutu ha ngumbu yebe bua kutentekela nseke yonso, bantu ba ku Gamada bakadi mu bibumba biebe; bakakudika ngabu yabo ku bimanu biebe ku nseke yonso, bakavuisha bulengele buebe bulengele tshishiki.

¹²Ba ku Tâshishi bakenduluka nʼebe mushinga bualu bua bintu biebe bivule bia mishindu yonso, bakashintakasha nʼebe biamu biabo bia argent, bia tshiamu tshifike, tshia étain ne tshia lutende ku bintu biebe.

¹³Ba ku Yawana, Tubala ne Mesheke bakenduluka nʼebe mushinga; bakashintakasha nʼebe bahika ne malonga a tshiamu tshia mitaku ku bintu biebe biwakenduluka nʼabi.

¹⁴Bena Togâma bakashintakasha nʼebe tubalu tudi tuambula majitu, tubalu tua nvita ne nyama ya mpunda,[8] ku bintu biebe biwakenduluka nʼabi.

¹⁵Bantu ba ku Dedana bakenduluka nʼebe mushinga; bantu ba mu maloba mangi a ku muelelu wa mai bakakukuatshila mudimu bu bangendʼa mushinga; bakalua kûdi ne milambu ya mibanga ne mitshi ya ébéne.

¹⁶Ba ku Sulia bakenduluka nʼebe mushinga bualu bua bintu bivule biwakenza ku bianza biebe; bakashintakasha nʼebe mabue a grenat, bintu bia kuina nʼabi bilulu bikunze, bilulu biakadi ne malenda, bilulu bia lin bilengele, mabue a corail ne a rubis, ku bintu biwakenduluka nʼabi.

¹⁷Ba mu Yuda ne ba mu buloba bua Isalele bakenduluka nʼebe mushinga; bakashintakasha nʼebe blé wa ku Minita, dihula, buitshi, manyi ne manyi a kulaba, ku bintu biwakenduluka nʼabi.

¹⁸Ba mu Damaseke bakenduluka nʼebe mushinga bualu bua bintu bivule biwakenza ku bianza biebe, ne bua biuma biebe bikumbana bia mishindu yonso, bakendulukangana nʼebe mushinga bua nvinyo ya ku Helebone ne miosa mitoke ya mikoko.

¹⁹Ba mu Uzala bakakuhanyisha tshiamu tshifike tshinonoke, casse ne roseau.[9]

²⁰Ba mu Dedana bakenduluka nʼebe mushinga bua mbulankete ya kuambika ha nyima ha tubalu.

²¹Ba mu Alaba ne bakokeshi ba mu Kedâ bakakukuatshila mudimu wa bungendʼa mushinga; bakakuhanyisha bana ba mikoko, bimpanga ne mbushi.

²²Bangendʼa mushinga ba ku Sheba ne Lama bakendulukangana nʼebe mushinga; bakashintakasha nʼebe bintu bia muhuya muimpe bitambe mushinga mukole, mabue a mushinga mukole matamba bulengele ne or, ku bintu biwakenduluka nʼabi.

²³Ba mu Halana, Kane, Edene, Sheba, Ashû ne Kilemada bakendulukangana nʼebe.

²⁴Bakendulukangana nʼebe mushinga bua bilulu bia mushinga mukole, tuzaku tufike tuakadi ne malenda mimpe, bilulu bia mibidi ya mushindu ne mushindu ne mionshi miluke bikole; bangendʼa mushinga bebe bakalua ne bintu ebi.

²⁵Matu a ku Tâshishi akatuala bintu biebe biwakenduluka nʼabi. Nunku wewe wakushibua tente, bakakusha ne majitu a bungi munkatshi mua mai manene.

²⁶Bitshi bebe bakukuhitshisha mu mai male; luhehele lua ku esete luakukutshibula hawakadi munkatshi mua mai manene.

²⁷Biuma biebe, bintu biebe bia kuhana ne bintu biudi wenduluka nʼabi mushinga, bena matu bebe, bena yenda bebe, bajiki ba kamonyi mu mitanta yebe, bangendʼa mushinga bebe, ne masalayi ebe adi munkatshi muenu, tshisumbu tshia bantu bonso badi munkatshi muenu, nebadine munkatshi mua mai manene mu dituku dia kubutuka kuebe.

²⁸Hunvuabo kudila kua bena yenda bebe, maloba a ku muelelu wa mai manene neazakale.

²⁹Bonso badi bita matu, bena matu bonso ne bena yenda bonso ba ha mai manene nebahatuke mu matu abo, nebimane ku muelelu wa mai manene,

³⁰nebabandishe dî diabo bua kukudila, nebakuashile muadi ne kanyinganyinga kakole; nebele buloba mu mitu yabo, nebadibonde mu butue.

³¹Nebakungule mitu yabo bua bualu buebe, nebadiluatshishe bilulu bikayabala; nebakuashile muadi ne kanyinganyinga kakole ka mutshima ne muadi mutambe bukole.

³²Mu kudila kuabo nebakuashile muadi bua bualu buebe, nebakudile bamba ne, Musoko kai wakadi bu Tulo, musoko eu wakahuwishabe munkatshi mua mai manene?

³³Hawakaluhula bintu biebe mu mai manene, wewe wakukutshisha nʼabi bantu ba bungi, wakavuisha bakelenge ba ha buloba babanji ku dikumbana dia biuma biebe ne dia bintu biwakenduluka nʼabi mushinga.

³⁴Mu tshikondo etshi hawakutshibuka ha mai manene, mu ndondo wa mai, bintu biebe biwakenduluka nʼabi mushinga ne tshisumbu tshia bantu bebe biakadina nʼebe mu mai manene.

³⁵Bonso badi bashikame ku muelelu wa mai bakukema bua bualu buebe, ne banfumu babo bakukuatshika buowa butambe bukole, badi banyenga mpala yabo bua ntatu yabo.

³⁶Bangendʼa mushinga ba munkatshi mua bantu badi bakubingila, bualu bua wakufua biebe, kubutuka kuebe kudi kukuatshisha bantu buowa, ne kuena wikala ne muoyo kabidi tshiendelele.