Read tshiluba Yehezekele 29 Bible Online

Yehezekele 29 - tshiluba bible

Yehezekele 29

¹Mu tshidimu tshia dikumi, mu ngondo wa dikumi, mu dituku dia dikumi ne dibidi dia ngondo, dî dia Yehowa diakalua kundi ne,

²Muana wa muntu, tangisha mpala webe kudi Palô, mukelenge wa Ejipitu, umubele, ne bonso ba mu Ejipitu.

³Ela dî diebe, amba ne, Mukelenge Yehowa udi wamba ne, Ndi nʼebe tshilumbu, wewe Palô, mukelenge wa Ejipitu, wewe ngandu munene udi ulala munkatshi mua misulu yebe, wamba ne, Musulu eu nguanyi mene, nakudienzelau nkayanyi.

⁴Nengele ndobo mu mbanga yebe, nendamike mishiha ya mu misulu yebe ku mabamba ebe; nenkuhatule munkatshi mua misulu yebe, ne mishiha yonso ya mu misulu yebe idi ilamata ku mabamba ebe.

⁵Nenkuele mu tshihela tshia lusenga, wewe ne mishiha yonso ya mu misulu yebe. Neuhone mu mpata wa hatuhu, kabena batubula tshitalu tshiebe, kabena bakujika. Nakukuha bu bia kudia kudi nyama ya ha buloba ne kudi nyunyu ya mulu.

⁶Nunku Bena Ejipitu bonso nebamanye ne, Meme ndi Yehowa. Bualu bua bakadi tshieyemenu tshitekete bu disele kudi ba tshisamba tshia Bena Isalele;

⁷hakakukuatabo mu tshianza, wewe wakatshibuka, wakahanda maha abo onso; hakakueyemenabo, wakatshibuka, wakazakasha milemba yabo yonso.

⁸Nunku Mukelenge Yehowa udi wamba ne, Mona, nenkutumine muele wa nvita, nenkûmushile nʼau bantu ne nyama.

⁹Buloba bua Ejipitu nebuikale tshihela tshia hatuhu ne tshikulu; nunku nebamanye ne, Ndi Yehowa. Bualu bua wewe wakuamba ne, Musulu wa Nile nguanyi, meme nakudienzelau nkayanyi;

¹⁰mona, meme ndi nkudiula ne misulu yebe, nenvuishe buloba bua Ejipitu tshihela tshia hatuhu ne tshikulu, ku Migedola tô ne ku Siene, ne ku butshika bua Atiopa kabidi.

¹¹Kakuena dikasa dia muntu dihitshilamu, kakuena dikama dia nyama dihitshilamu; kakuena muntu washikamamu tô ne hahita bidimu makumi anai.

¹²Nenvuishe buloba bua Ejipitu tshihela munkatshi mua maloba makuabo akubutuka, ne bidimu makumi anai misoko yabu neyishale bikulu munkatshi mua misoko yakubutuka; nentangadishe Bena Ejipitu munkatshi mua bisamba bia bantu, nembamuangalashe munkatshi mua maloba makuabo.

¹³Nunku Mukelenge Yehowa udi wamba ne, Hahita bidimu makumi anai, nensangishe Bena Ejipitu bua kubumusha munkatshi mua bantu muakadibo batangadishibue.

¹⁴Nengumushe Bena Ejipitu mu buhika bua kubaha diakalengele, nembahingashe mu buloba bua Patelosa, mu buloba bua bangabanga; nebikalemu bu bukelenge buhuekele.

¹⁵Nebuhite makelenge makuabo onso buhuekele; kabuena budibandisha ha mitu ha bisamba bia bantu kabidi; nembakeheshe bua bobo kabamanyi mua kukokesha bisamba bia bantu kabidi.

¹⁶Kabuena buikala tshieyemenu kudi Bena Isalele kabidi, tshivulukidi tshia bubi buabo, hahinganabo bua kubakeba; nebamanye ne, Meme ndi Mukelenge Yehowa.

¹⁷Mu tshidimu tshia makumi abidi ne muanda mutekete mu ngondo wa kumudilu, mu dituku dia kumudilu dia ngondo, dî dia Yehowa diakalua kundi ne,

¹⁸Muana wa muntu, Nebukadenesâ, mukelenge wa Babulona, wakenzesha masalayi andi mudimu mukole mu nvita yandi ne Bena Tulo. Mutu wa muntu yonso wakalua dikunyi, diaha dia muntu yonso diakadi ne mabuba; kadi yeye kakaheta difutu, ne masalayi andi kâkangata difutu, bua mudimu wakenzabo wa nvita ne Bena Tulo.

¹⁹Nunku Mukelenge Yehowa udi wamba ne, Mona, nenfile buloba bua Ejipitu kudi Nebukadenesâ, mukelenge wa Babulona; yeye neaye kuabo ne biuma biabo bivule, neabuhaule, neabunyenge bintu biabu; ne bintu ebi nebikale difutu dia masalayi andi.

²⁰Mukelenge Yehowa udi wamba ne, Nakumuha buloba bua Ejipitu bu difutu dia mudimu wakungenzeleye, bualu bua bakunkuatshila mudimu.

²¹Mu dituku adi nemmeneshile ba mu tshisamba tshia Bena Isalele lusengu; nenkuhe hukole bua kubulula mukana muebe munkatshi muabo bua wewe kuakula bimpe; nunku nebamanye ne, Meme ndi Yehowa.