Read tshiluba Yehezekele 43 Bible Online

Yehezekele 43 - tshiluba bible

Yehezekele 43

¹Ku nyima kua malu â yeye wakalua nʼanyi ku tshibuelelu tshiakadi tshitangila ku luseke lua esete.

²Ekumona! Butumbi bua Nzambi wa Isalele buakadi bufuma ku luseke lua esete. Tshiona tshia dî diandi tshiakadi bu tshiona tshia mai a bungi; ne buloba buakadi bukenka ne butumbi buandi.

³Tshinfuanyi tshinakamona tshiakadi bu tshinfuanyi tshinakamona hakalueye bua kushiha musoko, ne bu tshinfuanyi tshinakamona ku muelelu wa musula wa Kebâ; nakatua mpala wanyi hanshi.

⁴Butumbi bua Yehowa buakabuela munda mua ntempelo mu nshila wa ku tshibuelelu tshidi tshitangua ku luseke lua esete.

⁵Nyuma wakangambula, wakalua nʼanyi mu tshiendelu tshia munda, ekumona! Butumbi bua Yehowa buakusha ntempelo tente.

⁶Nakunvua mukuabo ungambila dî diakafuma mu nsubu wa tshitendelelu, muntu wakadi muimane hehi nʼanyi.

⁷Yeye wakangambila ne, Muana wa muntu, eu mmuaba wa nkuasa wanyi wa butumbi, eu mmuaba wa makasa anyi kudiatau, muaba undualua kushikama munkatshi mua Bena Isalele tshiendelele. Bena Isalele kabanyangi dina dianyi dia tshijila kabidi, nansha bobo bine, nansha bakelenge babo, ku masandi abo ne mpingu, ne ku bitalu bia banfumu babo hafuabo.

⁸Bakadinyanga hakatekabo mushiku wabo wa mbelu hehi ne mushiku wanyi wa mbelu, ne dikunshi diabo hehi ne dikunshi dianyi, ne bakadi anu ne lumbu hankatshi hanyi nʼabo. Bakunyanga dina dianyi dia tshijila ku malu a bundu akuenzabo. Bua malu â onso nakubashihesha mu tshiji tshianyi.

⁹Mpindiu bumushe masandi abo a kutendelela kuabo kua mpingu ku mpala kuanyi ne bitalu bia banfumu babo, bateke malu â kule, ne meme nenshikame munkatshi muabo tshiendelele.

¹⁰Wewe kabidi, muana wa muntu, lesha Bena Isalele ntempelo eu, tshifundu tshiandi ne tshidikishilu tshiandi, bua bundu bubakuate bua malu onso akenzabo.

¹¹Bikalabo ne bundu bua malu onso akenzabo, ubamanyishe bua tshifundu tshia kuasa nʼatshi nsubu wa ntempelo, miaba ya kuhatukila ne ya kubuelela, bilele bia kulondamu, kulongolola kua kutendelela ne mikenji yandi; funda malu au onso ku mesu kuabo bua bobo balonde dilongolola dia malu andi onso, batumikile mikenji yandi yonso ne benze malu au onso.

¹²Eu mmukenji bua ntempelo: nseke yonso idi inyunguluka muaba eu wa ha mutu ha mukuna ikale miaba mitambe tshijila. Mona biebe ne, Eu ndi mukenji bua ntempelo.

¹³Eku nkuidikisha kua tshioshelu tshia milambu ku luidi lua coudées, luidi lua coudées ludi coudée umue ne ntanta wa tshianza. Tshitekelu tshiatshi tshikale coudée umue mu bule buatshi, coudée umue mu butshiama buatshi, ne tshikale ne muhimbu bunene bua ntanta wa tshianza ku mibangu yatshi; tshitaku tshiatshi tshia muinshi mua tshioshelu tshikale nunku.

¹⁴Ku mutu kua tshitekelu tshia muinshi tô ne ku tshia tshioshelu tshia ha mutu hatshi kuikale coudées ibidi, ne butshiama bua tshituha etshi buikale coudée umue. Ku mutu kua tshituha etshi tshidi tshihite bukese tô ne ku tshituha tshia ha mutu hatshi tshidi tshihite bunene kuikale coudées inai, butshiama buatshi buikale coudée umue.

¹⁵Matshua a tshioshelu a ha mutu hatshi ikale coudées inai mu bule bua mulu; nsengu inai ikale ha mutu ha matshua, lusengu ne lusengu luikale ne bule bua coudée umue.

¹⁶Matshua a tshioshelu ikale ne bule bua coudées dikumi ne ibidi ne butshiama bua coudées dikumi ne ibidi, nseke yau inai ikale bunene bumue.

¹⁷Tshituha tshia tshioshelu tshia muinshi mua matshua tshikale bunene bumue ne nseke yatshi inai, coudées dikumi ne mai mu bule buatshi ne coudées dikumi ne inai mu butshiama buatshi; tshikale ne muhimbu bunene bua tshituha tshia coudée munyunguluke nseke yatshi inai. Tshibandilu tshia ku tshioshelu tshikale ku luseke lua esete.

¹⁸Hashishe yeye wakangambila ne, Muana wa muntu, Mukelenge Yehowa udi wamba ne, Ei idi mikenji bua tshioshelu mu dituku didibo batshijadika, bua kufidilahu milambu ya kuosha ne bua kumiaminabu mashi.

¹⁹Mukelenge Yehowa udi wamba ne, Uheshe bakuidi ba Bena Lewi, tunkanunuma tua Sadoka, badi ha buihi nʼanyi bua kunkuatshila mudimu, mulumʼa ngombe bu mulambu wa kubuikila nʼau bubi.

²⁰Angata mashi andi makuabo, laba ku nsengu inai ya tshioshelu, ne ku matumba anai a tshituha tshia tshioshelu tshidi muinshi mua matshua, ne ku mihimbu idi mitshinyunguluke; nunku lengesha tshioshelu ne utshiumushile bubi.

²¹Hashishe angata mulumʼa ngombe wa mulambu wa kubuikila nʼau bubi, umuoshe mu muaba musungula wa mu luhangu lua ntempelo udi kauyi mu tshitendelelu.

²²Halua dituku dibidi, fila mpumbu wa mbushi udi kayi ne tshilema bu mulambu wa kubuikila nʼau mibi; nunku tshioshelu ne tshilengeshibue bu muakalengeshibuatshi ku mulambu wa mulumʼa ngombe.

²³Hawamana kutshilengesha, fila mulumʼa ngombe udi kayi ne tshilema, ne tshimpanga tshia mu tshisumbu tshia mikoko tshidi katshiyi ne tshilema.

²⁴Hawalua ne munyinyi wabi ku mpala kua Yehowa, bakuidi belehu luehu ne bobo babifile bu mulambu wa kuoshela Yehowa.

²⁵Tô ne hahita matuku muanda mutekete longolola mpumbu wa mbushi buatshia-buatshia bu mulambu wa kubuikila nʼau bubi; bobo balongolole kahidi mulumʼa ngombe udi kayi ne tshilema ne tshimpanga tshia mu tshisumbu tshia mikoko tshidi katshiyi ne tshilema.

²⁶Tô ne hahita matuku muanda mutekete balengeshe tshioshelu ne hatshiumushile bubi buatshi, nunku, batshijidile.

²⁷Hashika matuku au, ku dituku dia muanda mukulu tô ne tshiendelele bakuidi bafile milambu yenu ha tshioshelu, milambu yenu ya kuoshela Yehowa, milambu yenu ya kuvuisha nʼai ditalala kabidi; Mukelenge Yehowa udi wamba ne, Meme nenuitabushe.