Read tshiluba Danyele 10 Bible Online

Danyele 10 - tshiluba bible

Danyele 10

¹Mu tshidimu tshisatu tshia bukokeshi bua Kolesha, mukelenge wa Pelasa, bualu bukuabo buakabulula kudi Danyele, wakabikilabo ne Beleteshasâ. Bualu ebu buakadi bulelela, buakamulesha bua nvita minene. Yeye wakateleja matshu andi ku bualu ebu, wakajingalula tshikena kumona.

²Mu matuku au, meme Danyele nakadi ndiladila mbingu isatu.

³Tshiakadia bia kudia bimpe, munyinyi ne nvinyo kabiakabuela mukana muanyi, tshiakadilaba manyi hamʼbidi, tô ne hakashika mbingu isatu mijima.

⁴Mu matuku makumi abidi ne anai a ngondo wa kumudilu, hanakadi ku muelelu wa musulu munene wa Hidekela,[6]

⁵nakabanduluka, nakatangila, eku mona, muntu wakadiku, muluate bilulu bia lin, musuike mukaba wa or wa mushinga mukole wa ku Ufasa.[7]

⁶Mubidi wandi wakadi ukenka bu dibue dia chrysolite, mpala wandi bu muele wa nvula, mesu andi bu bimunyi bia kahia! maboko ne makasa andi bu tshiamu tshia mitaku tshinonoke, tshiona tshia mei andi tshiakadi bu tshiona tshia musumba wa bantu.

⁷Meme Danyele, nkayanyi nakamona tshikena kumona; bantu bakadi nʼanyi kabakamona tshikena kumona etshi, kadi kuzakala kukole kuakabakuata, bakanyema bua kusokoma.

⁸Bakanshiya nkayanyi, nakamona tshikena kumona etshi tshinene, tshiakadi ne bukole munda muanyi; bualu bua bulengele bua mpala wanyi buakandamuka ne buakanyanguka, bukole buanyi buakajimina.

⁹Kadi nakunvua tshiona tshia mei andi; ne hanakunvua tshiona tshia mei andi, nakafua tshihuka nakatua mpala wanyi hanshi.

¹⁰Monai! Tshianza tshiakandenga, tshiakantuishisha binu bianyi hanshi ne bianza kabidi.

¹¹Yeye wakangambila kabidi ne, Danyele muntu munangibue bikole, teleja matshu ebe ku mei andi nkuambila, bika biebe, bualu bua bakantuma kudi mpindiu. Hakangambileye dî edi, nakimana uzakala.

¹²Hashishe, yeye wakangambila ne, Danyele kutshinyi nansha! Bualu bua dituku diwakateka mutshima webe ku dijingulula dia malu â ne diwakadihuekesha ku mpala kua Nzambi webe, yeye utu unvua mei ebe: nakulua bua kulomba kuebe.

¹³Muanjelo-mulami wa bukelenge bua Pelasa wakantantamena matuku makumi abidi ne dimue; kadi Mikaele umue wa banfumu ba banjelo, wakalua kunkuatshisha; nakamushiya mu, muaba au ne muanjelo-mulami wa banfumu ba Pelasa.

¹⁴Mpindiu nakulua bua kukujinguluila malu adi akuata bana benu mu matuku alualua; bualu bua tshikena kumona etshi tshidi tshikulesha malu a mu matuku adi kayi manji kulua.

¹⁵Hakayikileye nʼanyi, ungambila mei â, nakinama hanshi, tshiyi ngakula.

¹⁶Mona! Mukuabo wakadi ne tshinfuanyi tshia muana wa muntu wakalenga ku mishiku yanyi; nakabulula mukana muanyi, nakayikila ne wakadi wimana ku mpala kuanyi, nakamuambila ne, Mukelenge wanyi, bua tshikena kumona etshi kanyinganyinga kakunkuata, tshiena kabidi ne bukole.

¹⁷Meme muntu wa mukelenge, ndi mua kuakula ne mukelenge wanyi munyi? Mpindiu tshiena ne bukole munda muanyi, nkadi muhungile.

¹⁸Hashishe mukuabo wakadi ne tshinfuanyi tshia muntu, wakandenga tshianza ne wakankolesha.

¹⁹Yeye wakamba ne, Wewe muntu munangibue bikole, kutshinyi nansha! Ditalala dikale kûdi! Ikala ne bukole, tantamana biebe! Hakangambileye dî edi nakakoleshibua, nakamba ne Mukelenge wanyi akule biandi, bualu bua wakunkolesha.

²⁰Yeye wakamba ne, Wewe udi mumanye bualu bunakuluila kûdi, anyi? Mpindiu nempingane bua kuluangana ne muanjelo-mulami wa Bena Pelasa. Hanashikisha nʼandi nvita, muanjelo-mulami wa Bena Gelika nealue

²¹Kadi nenkuambile mei adi mafunda mu mukanda wa bushuwa; kakuena mukuabo udi unkuatshisha bua kuluangana nʼabo, anu Mikaele, muanjelo-mulami wenu.