Read tshiluba Danyele 2 Bible Online

Danyele 2 - tshiluba bible

Danyele 2

¹Mu tshidimu tshibidi tshia bukokeshi bua Nebukadenesâ, yeye Nebukadenesâ wakalota bilota; mutshima wandi wakahampakana, kakadi ne tulu ku mesu.

²Hashishe, mukelenge wakela dî bua kubikilabo batempi ba mbuku, bamanyi ba malu a mitoto, bena muhongo ne Bena Kasada, bua bobo bajinguluile mukelenge bilota biandi. Nunku bakabuela, bakimana ku mpala kua mukelenge.

³Mukelenge wakabambila ne, Nakulota tshilota, mutshima wanyi udi utata bua kumanya tshilota etshi.

⁴Hashishe, Bena Kasada bakandamuna mukelenge mu muaku wa Bena Alama ne, Mukelenge, wikale ne muoyo tshiendelele! Wawile bantu bebe tshilota, nunku netukujinguluiletshi.

⁵Mukelenge wakakudimuna Bena Kasada dî ne, Dî diakumana kuhatuka mukana muanyi ne, Binuahanga kundesha tshilota ne dijingulula diatshi, nebanukose bituha bituha, nebavuishe nsubu yenu bu diala.

⁶Kadi binuandesha tshilota ne dijingulula diatshi, nenuangate maha ne matabisha ne butumbi bunene kundi. Nunku nungambile tshilota ne dijingulula diatshi.

⁷Bakamuandamuna tshiakabidi ne, Mukelenge awile bantu bandi tshilota, ne tuetu netumuleshe dijingulula diatshi.

⁸Mukelenge wakabandamuna dî ne, Ndi mumanye bulelela ne nudi nukeba kulehesha diba bualu bua nudi numona ne dî diakumana kuhatuka mukana muanyi ne,

⁹Binuikala kanuyi nungambila tshilota etshi, mukenji au umuehele neunukuate bonso. Bualu bua nuakuhunga dî bua kuamba mei a mashimi ne a kudinga nʼau ku mpala kuanyi, tô ne hakudimuka bualu. Nunku nungambile tshilota, nemmanye ne nudi bamanye mua kundesha dijingulula diatshi.

¹⁰Bena Kasada bakandamuna mukelenge ne, Kakuena muntu ha buloba udi mua kulesha mukelenge bualu ebu, bualu bua kakuena mukelenge, nansha bikaleye muntu muhite bunene ne bukole, ukadi muebeshe muena mbuku, mumanyi wa malu a mitoto, anyi Muena Kasada bualu bua nunku.

¹¹Ebu mbualu bukole budi mukelenge ukonka, ne kakuena udi mua kubulesha mukelenge, anu nzambi idi kayiyi mishikame munkatshi mua ba ha buloba.

¹²Bua bualu ebu mukelenge wakafua tshiji, wakafika munda bikole, wakela mukenji wandi bua kubutulabo bena meji bonso ba mu Babulona.

¹³Nunku mukenji eu wakaya kuonso bua bena meji bashihibue, bakakeba Danyele ne balunda bandi bua kubashiha.

¹⁴Hashishe, Danyele wakahingisha ditaba dia meji ne dia budimu kudi Aliyoka, kapitene ka masalayi akadi alama mukelenge, kakadi kaya bua kushiha bena meji ba mu Babulona.

¹⁵Wakambila Aliyoka, kapitene ka mukelenge, ne, Bualu kai mukenji wa mukelenge udi mukole nunku? Nunku Aliyoka wakamanyisha Danyele muanda eu.

¹⁶Danyele wakabuela muakadi mukelenge, wakasengelela mukelenge bua yeye amuleheshile tshikondo bua amanye mua kulesha dijingulula dia tshilota.

¹⁷Ku nyima Danyele wakaya ku nsubu kuandi, wakamanyisha Hananiya, Mishaele ne Azaliya, balunda bandi, bualu ebu,

¹⁸bua bobo balombe luse kudi Nzambi wa mu diulu mu bualu ebu busokoka; bua Danyele ne balunda bandi kabafu diatshimue ne bena meji bakuabo ba mu Babulona.

¹⁹Hashishe, bualu ebu busokoka buakasokolodibua kudi Danyele mu tshikena kumona butuku. Mu diba adi Danyele wakatumbisha Nzambi wa mu diulu.

²⁰Danyele wakamba ne, Dina dia Yehowa ditumbishibue kashidi ne kashidi, bualu bua meji ne bukole mbiandi.

²¹Yeye udi ukudimuna bikondo ne bidimu; udi umusha bakelenge, udi ujadika bakelenge; udi ufila meji kudi bena meji, ne lungenyi kudi badi bamanye mua kujingulula malu.

²²Udi usokolola malu adi makole ne adi masokoka; udi mumanye malu adi mu mîdima, munya utu wikala nʼandi kaba kamue.

²³Ndi nkusakidila, ndi nkutumbisha, wewe Nzambi wa bankambua banyi, wakumpa meji ne bukole, ne mpindiu wakummanyisha bualu butuakulomba kûdi; bualu bua waku tumanyisha bualu abu bua mukelenge.

²⁴Nunku Danyele wakabuela kudi Aliyoka, wakatumabo kudi mukelenge bua kushiheye bena meji ba mu Babulona. Wakabuela muakadiye, wakamuambila ne, Kushihi bena meji ba mu Babulona nansha. Unfikisha kudi mukelenge, meme nendeshe mukelenge dijingulula dia tshilota tshiandi.

²⁵Hashishe, Aliyoka wakaya ne Danyele kudi mukelenge lukasa, wakamuambila ne, Nakumona muntu munkatshi mua bantu ba ku Yuda bakabueshabo mu buhika udi mua kujingulula mukelenge tshilota tshiandi.

²⁶Mukelenge wakebesha Danyele, wakadibo babikila ne Beleteshasâ, ne, Wewe udi mua kummanyisha tshilota tshinakulota ne dijingulula diatshi, anyi?

²⁷Danyele wakakudimuna mukelenge ne, Bualu busokoka budi mukelenge muebeshe mbualu budi bena meji, bamanyi ba malu a mitoto, bena buloshi ne batempi ba mbuku kabayi bamanye mua kumujinguluilabo.

²⁸Kadi Nzambi udiku mu diulu udi usokolola malu masokoka, ne yeye wakumanyisha mukelenge Nebukadenesâ malu akadi ha kulua mu matuku atshidi ku mpala. Tshilota tshiebe ne bikena kumona biwakumona ku mutu webe mu bulalu bidi nunku:

²⁹Wewe, mukelenge, wakadi welangana meji mu bulalu buebe a malu atshidi ku mpala; yeye au udi usokolola malu masokoka wakukulesha malu atshidi ku mpala.

³⁰Kadi meme hanyi bualu ebu busokoka kabuakusokolodibua kundi bua meji andi nʼau adi mahite a bantu bakuabo, kadi mbua dijingulula dimanyishibue kudi mukelenge, ne bua wewe umanye meji adi mu mutshima webe.

³¹Wewe, mukelenge, wakatangila, ekumona, luhingu lunene! Luhingu alu luakadi lunene be ne luakadi lukenka ne dinkenke dikole, luakimana ku mpala kuebe; tshinfuanyi tshialu tshiakakukuatshisha buowa.

³²Mutu wa luhingu alu wakadi wa tshiamu tshia or muimpe, tshiadi tshialu ne maboko alu biakadi bia tshiamu tshia argent, dilu dialu ne bibelu bialu biakadi bia tshiamu tshia mitaku.

³³Mikolo yalu yakadi ya tshiamu tshifike; makasa alu akadi tshituha tshiamu tshifike, tshituha dima.

³⁴Wewe wakadi mutangile tô ne hawakamona dibue diumuke, tshianza tshia muntu katshiyi tshidinga, diakalututa ku makasa alu akadi a tshiamu tshifike ne dima bisangishe, diakâtshibula bituha bituha.

³⁵Hashishe, tshiamu tshifike, dima, tshiamu tshia mitaku, tshiamu tshia argent ne tshiamu tshia or biakatshibuka bituha bituha diatshimue; biakalua bu bisote bidi bihehuka mu bishihuidi mu tshidimu tshia munya. Luhehele luakabihehula, bua muanda eu kabakasangana nansha katuha kabi kabidi; kadi dibue adi diakakuma luhingu diakalua mukuna munene, diakusha buloba bujima tente.

³⁶Ke muakadi tshilota nanku; netulonde dijingulula diatshi ku mpala kua mukelenge.

³⁷Wewe, mukelenge, udi mukelenge wa bakelenge, udi Nzambi wa mu diulu muhe bukelenge, bukokeshi, bukole ne butumbi.

³⁸Yeye wakufila bukua bantu mu bianza biebe, nyama ya mu mpata, nyunyu ya mulu, ne miaba yonso idibi tushikame, wakauteka wewe mukokeshi ku mutu kuabi. Wewe mume udi mutu au wa or.

³⁹Ku nyima kuebe bukelenge bukuabo, buhite buebe buhuekela, nebubike; hashishe, bukelenge buisatu bua tshiamu tshia mitaku mene nebumueneke, nebukokeshe ba ha buloba bonso.

⁴⁰Bukelenge buinai nebuikale ne bukole bua tshiamu tshifike; bualu bua bu mudi tshiamu tshifike tshitshibula bintu bionso bituha bituha ne tshibibotekasha, ne bu mudi tshiamu tshifike tshibotesha bintu ebi bionso, nunku bukelenge abu nebutshibule, nebubutule makalenge â onso.

⁴¹Bu mu wakumona makasa ne bana ba nkasa hikala tshituha dima dia mufumbi, tshituha tshiamu tshifike, nunku bukelenge abu nebuikale butahuluke. Kadi munda muabu nemuikale tshituha tshia bukole bua tshiamu, bu muwakumona tshiamu tshifike tshisangisha ne dima.

⁴²Bu muakadi bana ba nkasa tshituha tshia tshiamu tshifike ne tshituha tshia dima, nunku bukelenge abu nebuikale tshituha ne bukole, tshituha ne butekete.

⁴³Bu muwakumona tshiamu tshifike tshisangisha ne dima, bena bukelenge abu nebabuelakane ne bakuabo; ka dî kabena bilamatangana, bu mudi tshiamu tshifike katshiyi tshilamatangana ne dima.

⁴⁴Mu matuku a bakelenge aba Nzambi wa mu diulu neajadike bukelenge bukuabo budi kabuyi bubutudibua tshiendelele. Bukokeshi buabu kabuena buhianyibua kudi bantu bakuabo, kadi nebutshibule makelenge â onso bituha bituha, nebuabutule, ne buobu nebujalame tshiendelele.

⁴⁵Bualu ebu budi bu muwakumona, dibue diakulamuka ku mukuna, tshianza tshia muntu katshiyi tshi dilenga, diakutshibula tshiamu tshifike, tshiamu tshia mitaku, dima, argent ne or. Nzambi Munene wakumanyisha mukelenge malu atshidi alua. Tshilota tshidi tshia hushuwa ne dijingulula diatshi didi dilelela.

⁴⁶Hashishe mukelenge Nebukadenesâ wakatua mpala wandi hanshi, wakakukuila Danyele, wakela mukenji bua bamulambule, bamuoshele musenga wa manananshi a muhuya muimpe.

⁴⁷Mukelenge wakambila Danyele ne, Bulelela, Nzambi webe udi Nzambi wa nzambi yonso, Mukelenge wa bakelenge, musokolodi wa malu masokoka, bualu bua wewe wakumanya mua kusokolola bualu ebu busokoka.

⁴⁸Hashishe mukelenge wakavuisha Danyele muntu munene, wakamuha bintu bia bungi, wakamuvuisha mukokeshi wa ha mutu ha province mujima wa Babulona, wakamuteka mukokeshi munene ku mutu kua bena meji bonso ba mu Babulona.

⁴⁹Ku dilomba dia Danyele, mukelenge wakateka Shadalaka, Meshaka ne Abedenego ku mutu kua malu a mu province wa Babulona. Kadi Danyele wakashikama mu luhangu lua mukelenge.