Read tshiluba Danyele 4 Bible Online

Danyele 4 - tshiluba bible

Danyele 4

¹Mukelenge Nebukadenesâ udi utuma dî kudi bantu bonso, ba bisamba bionso ne ba miaku yonso badi bashikame ha buloba buonso ne, Ditalala dikumbane kunudi.

²Nakuelangana meji ne, Mbimpe bua meme kunumanyisha bua bimanyinu ne malu a kukema biakungenzela Nzambi Mutambe Bunene wa mu diulu.

³Monai bunene bua bimanyinu biandi! Monai bukole bua malu andi a kukema! Bukelenge buandi budi bukelenge bua tshiendelele, bukokeshi buandi budi bushala ku tshikondo ku tshikondo.

⁴Meme, Nebukadenesâ, nakadi nshikama talalâ mu nsubu muanyi, nakadi ne diakalengele mu mbalasa wanyi wa bukelenge.

⁵Nakalota tshilota tshiakankuatshisha buowa; meji anakadi ngela munda ha bulalu buanyi ne bikena kumona binakamona ku mutu wanyi biakantatshisha.

⁶Nunku nakela mukenji ne, Balue ne bena meji bonso ba mu Babulona ku mpala kuanyi, bua bobo bamanye mua kummanyisha dijingulula dia tshilota tshianyi.

⁷Hashishe, bena mbuku, bena buloshi, Bena Kasada ne bamanyi ba malu a mitoto bakalua ku mpala kuanyi; nakabawila tshilota, kadi kabakamanya mua kummanyisha dijingulula diatshi.

⁸Kadi ku nyima Danyele, udibo babikila ne Beleteshasâ, bu mudi dina diandi dia nzambi wanyi, ne udi ne nyuma wa nzambi ya tshijila munda muandi, wakalua ku mpala kuanyi. Nakamuawila tshilota tshianyi ne,

⁹Wewe, Beleteshasâ, kahita ka batempi ba mbuku, bualu bua ndi mumanye ne nyuma wa nzambi ya tshijila udi munda muebe, ne kakuena bualu busokoka budi bukukolela, ungambile bikena kumona binakumona mu tshilota tshianyi ne dijingulula diabi.

¹⁰Bikena kumona binakamona ku mutu wanyi hanakadi mu bulalu buanyi biakadi nunku: Nakatangila, ekumona, mutshi wakadi munkatshi mua buloba; bule buau buakadi buhite!

¹¹Mutshi wakadiunda, wakalua mukole, lusongo luau luakafika mu diulu, wakamueneka kudi ba kunfudilu kua buloba.

¹²Mabeshi au akadi malengele, mamuma au akadi a bungi be, akadi makumbane bia kudia bia bantu bonso. Nyama ya mu mpata yakalala mu dileshi diau, nyunyu ya mulu yakikila ha matamba au ne bonso bakadi ne muoyo bakadia bia kudia kudiu.

¹³Mu bikena kumona bia ku mutu wanyi binakadi nʼabi mu bulalu buanyi nakatangila, ekumona, mutangidi, muntu wa tshijila, uhueka hanshi, mufume mu diulu.

¹⁴Yeye wakela dî dikole, wamba ne, Shimbulai mutshi eu, kosai matamba au, hoholai mabeshi au, tangalashai mamuma au! Nyama yumuke muinshi muau, nyunyu idi ha matamba au ibuke.

¹⁵Kadi shiyai tshikuku ne miji yatshi mu buloba, tshisuikibue ne mukaba wa tshiamu tshifike ne wa tshiamu tshia mitaku, munkatshi mua mashinde a lutende. Muntu au aboleshibue ne dibungi dia mulu, adie mashinde a mu mpata bu nyama.

¹⁶Mutshima wandi wa buntu wandamuke bu wa nyama; ashale nunku bidimu muanda mutekete.

¹⁷Dikosa dia bualu ebu didi difume ku mukenji wa batangidi ne ku dilomba dia ba tshijila; bua bonso badi ne muoyo bamanye ne Mutambe Bunene wa mu dilulu udi ukokesha bukelenge bua bantu, udi ubuhesha muntu yonso udiye musue, udi uteka muntu mutambe buhuekele ku mutu kuabu.

¹⁸Tshilota etshi ntshiotshi tshinakulota, meme, Mukelenge Nebukadenesâ; ne wewe, Beleteshasâ, ungambile dijingulula diatshi, bualu bua bena meji bonso ba mu bukelenge buanyi kabena bamanye mua kundesha dijingulula diatshi. Kadi wewe udi mumanye mua kuenza nunku, bualu bua nyuma wa nzambi ya tshijila udi munda muebe.

¹⁹Hashishe, Danyele, udibo babikila ne, Beleteshasâ, wakadi ne mutshima muhandike tô tshituha tshia diba, ne meji andi akamutatshisha. Mukelenge wakamuambila ne, Beleteshasâ, tshilota etshi ne dijingulula diatshi kabikutatshishi nansha. Beleteshasâ wakamukudimuna ne, Mukelenge wanyi, tshilota etshi tshikale kudi badi nʼebe lukuna, ne dijingulula diatshi dikale kudi badi basue kukunyoka.

²⁰Mutshi au uwakamona, wakadiunda tô ne hakaluau mimene ne mukole, lusongo luau luakafika mu diulu, wakamueneka kudi ba kunfudilu kua buloba;

²¹mabeshi au akadi malengele, mamuma au akadi a bungi, akadi makumbane bia kudia bia bantu bonso; mu dileshi diau muakadi nyama ya mu mpata ilala, ne munkatshi mua matamba au nyunyu ya mulu yakadi ne miaba ya kuikila.

²²Mutshi eu nguewe muine, mukelenge. Wewe wakudiunda mimene ne mukole; bualu bua bunene buebe buakuhita bunene, budi bufika tô ne mu diulu, bukokeshi buebe budi bufika tô ne kunfudilu kua buloba.

²³Mukelenge wakamona mutangidi, muntu wa tshijila, uhueka hanshi mufume mu diulu, wamba ne, Shimbulai mutshi eu, ûkosololai; kadi shiyai tshikuku ne miji yatshi mu buloba, tshisuikibue ne mukaba wa tshiamu tshifike ne wa tshiamu tshia mitaku, munkatshi mua mashinde a lutende; muntu au aboleshibue ne dibungi dia mulu; adie mashinde a mu mpata bu nyama tô ne hahita bidimu muanda mutekete.

²⁴Edi ndijingulula dia tshilota, mukelenge, ne edi ndî dia Mutambe Bunene wa mu diulu, diakulua kudi mukelenge wanyi:

²⁵nebakuihate munkatshi mua bantu, neushikame ne nyama ya mu mpata, neudie mashinde bu mudi ngombe idia; neuboleshibue ne dibungi dia mulu. Bidimu muanda mutekete nebihie tô ne hawamanya ne, Mutambe Bunene wa mu diulu udi ukokesha bukelenge bua bantu, ne udi ubuhesha muntu yonso udiye musue.

²⁶Bu muakelabo mukenji bua kushiya tshikuku tshia mutshi ne miji yatshi, bukelenge buebe nebuikale kûdi hawamanya ne wa mu diulu nyeye muine udi ukokesha.

²⁷Bua muanda eu, mukelenge wanyi, wanji kuitabusha lungenyi luanyi: ulekele mibi yebe, uhingashe bienzedi biakane mu muaba wai; ulekele malu ebe a tshishiku, ufuile bahele luse; nunku, bumue, diakalengele diebe nedileheshibue.

²⁸Malu â onso akakuata mukelenge Nebukadenesâ.

²⁹Hakahita ngondo dikumi ne ibidi, yeye wakadi wendakana mu mbalasa wa bukelenge mu province wa Babulona.

³⁰Mukelenge wakamba ne, Eu Babulona mimene, tshiakuibaka musoko eu bu muaba wa mukelenge kushikameye ku bukole buanyi bunene bua mpete butumbi ne buneme, anyi?

³¹Hakatshidi mei â mukana mua mukelenge, dî diakafuma mu diulu ne, Mukelenge Nebukadenesâ, badi bakuambila wewe muine ne, Bukelenge buakumuka kûdi.

³²Nebakuihate munkatshi mua bantu, neushikame ne nyama ya mu mpata; neudie mashinde bu mudi ngombe idia; ne bidimu muanda mutekete nebihite tô ne hawamanya ne, Mutambe Bunene wa mu diulu udi ukokesha bukelenge bua bantu, ne udi ubuhesha muntu yonso udiye musue.

³³Mu diba adi mene bualu abu buakakuata Nebukadenesâ. Bakamuihata munkatshi mua bantu, wakadia mashinde bu mudi ngombe idia. Mubidi wandi wakabola ne dibungi dia mulu, tô ne hakaleha nsuki yandi bu masala a nyunyu wa mukanku, ne nzadi yakalua bu nzadi ya nyunyu.

³⁴Hakahita matuku â, meme, Nebukadenesâ, nakabanduluka ne nakatangisha mesu anyi mu diulu; meji anyi akahingana kundi. Nakavudishila Mutambe Bunene wa mu diulu disanka, nakamutumbisha ne nakamunemeka, Yeye udi ne muoyo tshiendelele. Bualu bua bukokeshi buandi budi bukokeshi bua tshiendelele, ne bukelenge buandi budi bujalame ku tshikondo ku tshikondo.

³⁵Bonso ba ha buloba badi hatuhu ku mesu kuandi. Yeye utu wenza bu mudiye musue munkatshi mua misumba ya ba mu diulu ne munkatshi mua ba ba buloba; kakuena muntu udi mua kukauda tshianza tshiandi, anyi kumuebesha ne, Udi wenza tshinyi?

³⁶Mu diba adi mene meji anyi akahingana kundi; ne bua butumbi bua bukelenge buanyi, buneme buanyi ne butumbi buanyi biakahingana kundi. Bena meji banyi ne miloho yanyi hakalua kundomba lungenyi. Nakajadikibua mu bukelenge buanyi, ne butumbi buanyi buakahita bua diambedi bunene.

³⁷Katataka, meme Nebukadenesâ, ndi ntumbisha, ndi nganyisha, ndi nnemeka Mukelenge wa mu diulu; bualu bua bienzedi biandi bionso bidi bia bushuwa, ne malu andi adi makane; yeye udi ne bukole hua kuhuekesha badi benda ne dihetu diabo.