Read tshiluba Hoshea 2 Bible Online

Hoshea 2 - tshiluba bible

Hoshea 2

¹Ambilai bana benu ba balume ne, Nudi bantu banyi; ambilai bana benu ba bakashi ne, Nuakuheta luse.

²Sengelelai mamu wenu, numusengelele; bualu bua kena mukashi wanyi, ne meme tshiena bayandi; bua yeye umushe malu andi a masandi ku mesu kuandi, ne masandi andi mene hankatshi ha mabele andi;

³bua tshiadi bivualu biandi, tshimushiyi butaka bu muakadiye mu dituku diakamulelabo; tshimuvuishi bu tshihela tshia lusenga, tshimuvuishi bu buloba bûme, tshimushihi ne nyota.

⁴Bulelela, tshiena nfuila bana bandi luse, bualu bua badi bana ba muena masandi.

⁵Bualu bua mamu wabo wakulonda malu a masandi; yeye wakabalela wakuenza malu a bundu. Bualu bua wakamba biandi ne, Nendonde bannangi badi bampa bidia bianyi ne mai a kunua, miosa yanyi ya mikoko ne buanda bua lin, manyi anyi ne bia kunua bianyi.

⁶Nunku nenjike nshila wandi ne luhangu lua meba, nengase lumbu lua kumukanda bua yeye kamonyi nshila yandi.

⁷Yeye nealonde bamunangi, kadi kena ubaheta; yeye neabakebe, kadi kena ubamona. Hashishe, neambe biandi ne, Nempingane kudi bayanyi wa ku mpala, bualu bua tshikadilu tshiakadi nʼatshi diambedi tshiakahita tshindi nʼatshi mpindiu buimpe.

⁸Yeye kakamanya ne mmeme mene nakamuha manvua, nvinyo mihia-mihia ne manyi; nakamukumbashila argent ne or biakukuatshilabo nʼabi Bâla mudimu.

⁹Nunku nengangate kabidi manvua anyi mu tshidimu tshiau, ne nvinyo mihia-mihia mu tshikondo tshiai; nenyenge miosa yanyi ya mikoko ne bilulu bia lin biakadiye nʼabi bualu bua kubuikila butaka buandi.

¹⁰Mpindiu nensokolole bundu buandi kudi bamunangi, kakuena muntu wamuhandisha mu tshianza tshianyi.

¹¹Nendekeshe miloû yandi yonso, bidia biandi bia masanka, masanka andi a ngondo mihia-mihia, matuku andi a mbingu ne bikondo bionso biakudisu-nguileye bua kusanka.

¹²Nenkose mionshi yandi ya tumuma tua nvinyo, ne mitshi yandi ya nfigi biakuambeye bualu buabi ne, Edi ndifutu diakumpabo kudi bannangi. Nembivuishe bu tshihuka, ne nyama ya mu mpata neyibidie.

¹³Nunku Yehowa udi wamba ne, Nendue kudiye ne makenga bua matuku akoshileye Ba-Bâla musenga wa manananshi, ne akadilengesheye ne kakanu ka ku diulu ne bilenga biandi, hakalondeye bamunangi, ne wakatula bualu buanyi muoyo.

¹⁴Nunku, mona, nemmuitabushishe, nemmulombole mu tshihela, nengambile mutshima wandi mei makane.

¹⁵Hashishe, nemmuhingashileku madimi andi a tumuma tua nvinyo, nemmuhe tshibanda tshia Akola[4] bu tshibuelelu tshia ku ditekemena. Yeye neitabe kundi bu muakenzeye mu bunsongakashi buandi, bu mu dituku diakaluhukeye mu Ejipitu.

¹⁶Yehowa udi wamba ne, Mu dituku adi yeye neambikile ne, Bayanyi; kena umbikila ne, Nfumu wanyi.

¹⁷Bualu bua nengumushe mena a Ba-Bâla mukana muandi, kabena batela mena abo kabidi.

¹⁸Mu dituku adi kabidi nembahungile tshihungidi ne nyama ya mu mpata, nyunyu ya mulu ne bintu bidi bidikoka hanshi; nentshibule buta ne muele wa nvita ne bielelu bia nvita, nemmumushe mu buloba, nembaladike hanshi kabayi ne ntatu.

¹⁹Nenkubangile kabidi bua kukubumbakasha kundi tshiendelele; bulelela, nenkubangile bua kukutuangasha nʼanyi mu buakane ne mu kulumbulula kuakane ne mu dinanga ne mu kukufuila kua luse.

²⁰Nenkubangile ne kuditshiha kûdi mua kueyemena, ne wewe neumanye Yehowa.

²¹Yehowa udi wamba ne, Mu dituku adi nengitabe, nenkudimune diulu dî ne diulu nedikudimune buloba dî;

²²ne buloba nebukudimune manvua, nvinyo ne manyi dî, ne biobi neakudimune Yizelele dî,

²³ne meme nemmumiamine mu buloba bua bualu buanyi; nenfuile luse kudi Wakadi-kayimufuidibue-luse; nengambile Badi-kabayi-bantu-banyi ne, Nudi Bantu-banyi; ne yeye neambe ne, Wewe udi Nzambi wanyi.