Read tshiluba Yoele 3 Bible Online

Yoele 3 - tshiluba bible

Yoele 3

¹Monai, mu matuku au ne mu tshikondo atshi, hangumusha Bena Yuda ne Bena Yelushalema mu buhika bua kubaha diakalengele,

²nensangishe ba mu bisamba bionso, nempueke nʼabo mu tshibanda tshia Yehoshafata; nembalumbuluishilema bua bantu banyi, buhianyi buanyi, Bena Isalele, bakamuangalashabo munkatshi mua bisamba bia bantu. Bakabanyangana buloba buanyi,

³bakelela bantu banyi nshobo, bakahana muana wa balume ku mukashi wa masandi, bakahana muana wa bakashi ku maluvu a nyinyo, bakânua.

⁴E, nuenu kabidi, Tulo ne Sidona, ne nseke yonso ya Peleshete, nudi bu banganyi kundi? Nudi basue kunfuta bua bualu bunakuenza, anyi kungenzela bunga bualu, anyi? Nennuhingashile difutu lukasa bua malu mabi enu!

⁵Bualu bua nuakangata biamu bianyi bia argent ne bia or, ne nuakaya ne bintu bianyi bia mushinga mukole mu ntempelo yenu.

⁶Nuakahana Bena Yuda ne Bena Yelushalema kudi Bena Gelika bua kubumusha mu buloba buabo ne bua kubatuma kule.

⁷Monai, nembanuishe ku muaba unuakabahana; nennuhingashile difutu bua bualu bunuakenza.

⁸Nempane bana benu ba balume ne bana benu ba bakashi kudi Bena Yuda, ne bobo nebabahane kudi Bena Seba, bantu aba ba kule. Bualu bua Yehowa wakuamba dî edi.

⁹Elai dî edi munkatshi mua bisamba bia bantu ne, Longololai bintu bia nvita. Bishai bena bukitu. Bena nvita bonso basemene ha buihi, baye ku nvita.

¹⁰Tulai miele ya nvita ku nkasu yenu, tulai mafuma ku miele yenu ya kulengesha nʼai mionshi ya tumuma; muntu mutekete ambe biandi ne, Ndi muena bukitu.

¹¹Ambulusbai ne luai bienu, nuenu bisamba bionso bia bantu bidi bitunyunguluka, nudikunguishe hohamue. Yehowa, tuma bena hukitu bebe mu tshibanda.

¹²Ba mu bisamba bia bantu babike, balue mu tshibanda tshia Yehoshafata; bua mu muaba au nenshikame bua kulumbuluisha bisamba bionso bia bantu bidi bitshinyunguluka.

¹³Tualai muele wa kunowa nʼau, bua bintu bia kunowa biakuboba. Luai, diatai; bua tshikaminu tshidi tshiule tente ne tumuma tua nvinyo. Milondo ya maluvu a nvinyo idi ihongoloka, bualu bua bubi buabo budi bunene.

¹⁴Misumba ne misumba ya bantu idi mu tshibanda tshia tshilumbuluidi! Bualu bua dituku dia Yehowa didi ha buihi mu tshibanda tshia tshilumbuluidi.

¹⁵Diba ne ngondo biakuandamuka mîdima, mitoto kayena ikenka.

¹⁶Yehowa udi wela dî diandi dikole difume ku Siona, udi wela dî diandi bu mukungulu wa nvula difume ku Yelushalema; diulu ne buloba bidi bikanka. Kadi Yehowa udi tshinyemenu kudi bantu bandi, udi bu musoko wa ngumbu kudi Bena Isalele.

¹⁷Nunku nuenu nenumanye ne, Meme, Yehowa Nzambi wenu, ndi mushikame mu Siona, mukuna wanyi wa tshijila. Yelushalema neikale muaba wa tshijila, bantu ba bende kabena bahitshilamu kabidi.

¹⁸Hashishe, mu dituku adi mikuna minene neyimatshishe nvinyo idi ne kushemakana, mikuna mikese neyihatule mabele, ne tusulu tuonso tua mu Yuda ne bile tente ne mai. Mushimi wa mai neuhatuke mu nsubu wa Yehowa, neutume mai au mu tshibanda tshia Shitima.

¹⁹Ejipitu neabutudibue, Edome nealue tshihela tshia hatuhu, bua malu makole akenzelabo Bena Yuda; bualu bua mu buloba buabo bakamatshisha mashi a bantu bakadi kabayi bahila mu tshilumbu.

²⁰Kadi Bena Yuda nebajalame tshiendelele, ne bantu nebashikame mu Yelushalema bikondo bionso.

²¹Nensombuele mashi abo andi tshiyi muanji kusombuela; bualu bua Yehowa udi mushikame mu Siona.