Read tshiluba Obadaya 1 Bible Online

Obadaya 1 - tshiluba bible

Obadaya 1

¹Tshikena kumona tshia Obadaya. Mukelenge Yehowa udi wamba dî edi bualu bua Bena Edome ne, Tuakunvua lumu lufume kudi Yehowa, ne bakutuma muloho munkatshi mua bisamba bia bantu, wamba ne, Jukai, tuyai kuluangana ne Bena Edome.

²Mona, nakukuvuisha bu tshisamba tshikese munkatshi mua binga bisamba, wewe udi muhetudibue bikole.

³Dihetu dia mu mutshima webe diakukudinga, wewe udi mushikame mu miaba mikole ya mu mabue, udi ne tshishikaminu tshiebe mulu, udi wamba munda munda ne, Nganyi wampuekesha hanshi?

⁴Yehowa udi wamba ne, Nansha biwahahala mulu bu mudi nyunyu wa mukanku wenza, nansha bikala disua diebe dibakibue munkatshi mua nutoto mene, nenkutulule hanshi ku muaba au.

⁵Bialua bibi, nansha banyengi, kûdi bufuku, tangila bu mudibo bakubutula! Kabena biba bintu tô ne hakumbanabi, anyi? Bialua bahuodi ba tumuma tua nvinyo kûdi, kabena bashiya tumuma tua kuhumbulula, anyi?

⁶Monai mudibo bahaule Bena Esau, ne bu mudi biuma bia mu tshibutshilu tshiabo bisokolodibue!

⁷Bonso bakadi bahunga nʼebe tshihungidi bakukuihata tô ne ku butshika bua buloba buebe, bakadi bashikama nʼebe talalâ diambedi bakukutungila tshitungu, bakukuhita bukole, bakadi badia bidia biebe bakukuteya. Wewe kuena ujingulula malu â.

⁸Yehowa udi wamba ne, Tshiena nshiha bena meji ba mu Edome dituku adi, anyi? Tshiena ngumusha bajinguludi ba malu ku mikuna ya Esau, anyi?

⁹Temena, bena bukitu bebe nebakuatshike buowa, ne muntu yonso neashihibue ne neumushibue ku mukuna wa Esau.

¹⁰Bua tshimbambila tshiwakenzela muanʼenu Yakoba, bundu nebukukuate, ne neubutudibue tshiendelele.

¹¹Mu dituku adi diwakimana mutangilangane nʼabo, dituku adi mene diakaya bantu ba bende ne bmtu biandi kuabo, ne ba mu bisamba bia bende bakabuela ku bibi biandi, bakela nshobo bua bintu biakahaulabo mu Yelushalema, wewe mene wakadi bu umue wabo.

¹²Kadi kuvuishi dituku dia makenga a muanʼenu bu dituku dia disanka, kusanki bua makenga a Bena Yuda mu dituku dia kubutuka kuabo, kubaseki dituku dia ntatu yabo.

¹³Kubuedi mu tshibuelelu tshia bantu banyi dituku dia dikenga diabo; kusanki hawatangila bualu bubi budi bubakuata dituku dia dikenga diabo, kuolodi tshianza tshiebe ku biuma biabo dituku dia dikenga diabo.

¹⁴Kuimanyi mu masanga a nshila bua kushiha bana babo badi bahanduka, kufidi bana babo badi bashala ne muoyo kudi bena lukuna dituku dia ntatu yabo.

¹⁵Bualu bua dituku dia Yehowa didi ha buihi dilongoluela bisamba bionso bia bantu, bu muwakenza biebe, mbu mudibo bakuenzela, bienzedi biebe nebikuhingane.

¹⁶Bu munuakunua makenga ha mukuna wanyi wa tshijila, ba mu bisamba bionso bia bantu nebânue habo tshiendelele, e, nebanue, nebamine, nebikale bu bantu badi kabayi banze kuikalaku.

¹⁷Kadi mu mukuna wa Siona nemuikale tshisumbu tshia bantu bahanduke, ne wowo newikale wa tshijila, ne ba mu tshisamba tshia Yakoba nebahete buhianyi buabo kabidi.

¹⁸Bena Yakoba nebikale kahia, ne Bena Yosefe nebikale ludimi lua kahia, ne Bena Esau nebikale bisonsa, ne bobo nebaboshe, nebabashidishe, kakuena muntu umuehele washala kudi Bena Esau, bualu bua Yehowa nguakuamba dî edi.

¹⁹Badi ku luseke lua Sude nebadiangatshile mukuna wa Esau, badi mu Tshibanda nebadiangatshile buloba bua Bena Peleshete, nebadiangatshile madimi a mu Efelayima, ne madimi a mu Samalea, ne Benyamina neadiangatshile Gilada.

²⁰Bahika bakadi mu busalayi ebu bua Bena Isalele nebadiangatshile buloba buakadi nʼabu Bena Kanâna tô ne ku Salefata, ne ba mu Yelushalema bakadi mu buhika ku Sefalada nebadiangatshile misoko ya mu Sude.

²¹Bahikudi nebabande ha mukuna wa Siona bua kulumbuluisha mu mukuna wa Esau, ne bukelenge nebuikale bua Yehowa.