Read tshiluba Nomba 11 Bible Online

Nomba 11 - tshiluba bible

Nomba 11

¹Bantu bakadi batontolodi, bualu ebu buakadi bubi ku matshu a Yehowa ne hakabunvua Yehowa, tshiji tshiakamukuata, kahia ka Yehowa kakabosha tô ne ku matshika a tshitudilu.

²Bantu bakadila kudi Mose, ne Mose wakalomba Yehowa, kahia kakajima.

³Bakidika muaba au ne, Tabela, bualu bua kahia ka Yehowa kakatema munkatshi muabo.

⁴Bantu bakuabo ba munkatshi muabo bakadi ne lukuka be Bena Isalele bakadila kabidi, bakamba ne, Nganyi neatuhe munyinyi wa tuetu kudia?

⁵Tudi tuvuluka bua munyinyi wa mu mai utuakadia mu Ejipitu tshianana, concombres ne melona ne poireaux ne matungulu ne ail,

⁶kadi katataka mioyo yetu idi minyane, katuena ne tshintu tshikuabo tshia kutangila anu mana â.

⁷Mana akadi bu ntete ya kolianda, akadi afuanangana ne bedola.

⁸Bantu bakaluhuka, bakâsangisha, bakâhela mu biamu ne mu binu, bakâlamba mu bivuadi ne mai, bakalamba nʼau mikata, akashemakana bu manyi mahia-mahia.

⁹Kakahanda mume mu tshitudilu butuku, mana akamueneka nʼau.

¹⁰Mose wakumpa muabi wa bantu ku meku ne ku meku, mundi ne mundi ku mbelu kua ntenta wandi tshiji tshiakatamba kukuata Yehowa, tshiji tshiakakuata Mose kabidi.

¹¹Mose wakambila Yehowa ne, Wewe wakenzela mundi webe bibi nunku bualu kai? Munyi tshiakusangana luse ku mesu kuebe bua wewe wakateka bujitu bua bantu aba bonso hamʼbidi hanyi?

¹²Meme nakimitshisha baledi ba bantu aba mafu, anyi, nakabalela, anyi, bua wewe wakungambila ne, Ubatuale ha tshiadi tshiebe, bu mudi muledi utuala muana utshidi wamua, tô ne ku buloba buwakalaya batatuʼabo?

¹³Meme ndi mua kudisha bantu aba bonso munyinyi kudi kunyi? Bualu bua bobo badi badila kundi ne, Utuhe munyinyi wa tuetu kudia.

¹⁴Meme nkayanyi tshiena mua kutuala bantu aba bonso, bualu ebu budi buntambe bunene.

¹⁵Biwasua kutuenzela nunku, ndi nkusengelela ne, Unshihe ku tshianza tshiebe, binasangana luse ku mesu kuebe, bua tshitangidi dikenga dianyi nunku.

¹⁶Yehowa wakambila Mose ne, Unsangishile balume makumi muanda mutekete ba bakulu ba mu Isalele, baudi mumanye ne mbakulu ba bantu, ne bakelenge badi ku mutu kuabo, ulue nʼabo ku mpala kua ntenta wa kusambakena, bobo bimaneku nʼebe.

¹⁷Meme nempueke, nensombe nʼebe, nengangate Nyuma udi kûdi, nembaheye, nenukuatshishangane bua kutuala bujitu bua bantu aba, wewe kuena ubutuala nkayebe.

¹⁸Wambile bantu ne, Nudijidile bua makelela, nenudie munyinyi, bualu bua nuenu nuakudila mu matshu a Yehowa ne, Udi utudisha munyinyi nganyi? Bakatuenzela bimpe mu Ejipitu, nunku Yehowa neanuhe munyinyi, nenudie.

¹⁹Kanuena nudia dituku dimue anyi matuku abidi anyi matuku atanu anyi matuku dikumi anyi matuku makumi abidi,

²⁰kadi ngondo mujima, tô ne hanuaulukila mu diulu, neunutonde, bualu bua nuenu nuakuhidia Yehowa udi munkatshi muenu, nuakudila ku mpala kuandi ne, Tuakaluhuka mu Ejipitu bualu kai?

²¹Mose wakamba ne, Bantu bandi nʼabo badi bena nvita binunu nkama isambombo, ne wewe wakuamba ne, Nembahe munyinyi, bua bobo badie ngondo mujima.

²²Netubashihele bisumbu bia mikoko ne ngombe bua kubadisha, anyi? Netusangishe minyinyi yonso ya mu mai manene bua kubadisha, anyi?

²³Yehowa wakambila Mose ne, Tshianza tshia Yehowa tshiakulua tshihi, anyi? Katataka wewe neutangile ne bualu bunakukuambila nebuenjibue anyi kabuena buenjibua.

²⁴Mose wakaluhuka, wakambila bantu mei a Yehowa, wakasangisha balume makumi muanda mutekete ba bakulu ba bantu, wakabanyungulusha Ntenta.

²⁵Yehowa wakahueka mu dî ditu, wakasomba nʼandi, wakangata tshituha tshia Nyuma wakadiye nʼandi, wakamuteka kudi bakulu makumi muanda mutekete, hashishe hakalua. Nyuma kudibo, bakamba dî dia Nzambi, kadi kabakenza kabidi musangu mukuabo.

²⁶Kadi balume babidi bakashala mu tshitudilu, dina dia umue ne Eladada ne dina dia mukuabo ne Medada. Nyuma wakashala kudibo, bakadi ne mena abo mafunda, ka dî kabakaya ku Ntenta, bakamba di dia Nzambi mu tshitudilu.

²⁷Nsongalume wakadiku, wakaya lubilu, wakamanyisha Mose ne, Eladada ne Medada badi bamba dî dia Nzambi mu tshitudilu.

²⁸Yoshua, muana mulume wa Nuna, mukuatshishi wa Mose, umue wa balume bakasunguleye, wakamba ne, Mukelenge wanyi, Mose, ubakande.

²⁹Mose wakamuambila ne, Wewe udi ne mukau ku bualu buanyi, anyi? Nakadi kusua bua bantu ba Yehowa bonso bikale baprofete, ne Yehowa ateke Nyuma wandi kudibo.

³⁰Mose wakaya mu tshitudilu, yeye ne bakulu ba Isalele.

³¹Luhehele luakaheha kudi Yehowa, diakalua ne nyunyu ya nkuadi ku mai manene, luakayihonesha hehi ne tshitudilu, bu luendu lua dituku dimue ku luseke elu ne luendu lua dituku dimue ku luseke lukuabo, yakanyunguluka tshitudilu ku nseke yonso, yakalembelela mulelu mukese bu coudées[5] ibidi.

³²Bantu bakajuka dituku adi, ne butuku bujima tô ne ku dituku dikuabo, bakasangisha nkuadi muntu wakasangisha bungi bukese wakasangisha bihiminu[6] binene dikumi, bakadilongoluelayi mu tshitudilu.

³³Hakatshidi munyinyi mukana, diambedi bobo kabayi banze kûdia ku menu, tshiji tshiakakuata Yehowa bua bantu, ne Yehowa wakasamisha bantu bikole.

³⁴Bakidika muaba au ne, Kibelota-hatawa, bualu bua bakajikamu bantu bakadi ne lukuka.

³⁵Bakabisha luendu luabo ku Kibelota-hatawa, bakaya ku Haselota, bakashikama mu Haselota.