Read tshiluba Nomba 15 Bible Online

Nomba 15 - tshiluba bible

Nomba 15

¹Yehowa wakambila Mose ne,

²Wambile Bena Isalele ne, Hanualua mu buloba buenu, bundi munuhe,

³ne hanuafila mulambu wa kuosha ha kahia kudi Yehowa bua kushikisha kuditshiha, anyi mulambu udi mitshima yenu misue kufila, anyi mu matuku anudi nudia bidia bia disanka, bualu bua kumusha dihembu kudi Yehowa, nansha mulambu wa ngombe nansha wa mikoko,

⁴muntu udi ufila mulambu neafile mulambu wa bukula bubotesha bu tshintu tshia dikumi tshia tshihiminu tshimue, busangisha ne tshituha tshinai tshia dikoho[7] dia manyi.

⁵Hanuafila mulambu wa kuosha anyi wa kudifila, nenufile kabidi tshituha tshinai tshia dikoho dia nvinyo bu mulambu udibo banua, nenufile nunku ku muana wa mukoko ne ku muana wa mukoko.

⁶Hanuafila mulambu wa tshimpanga, nenulongolole tshintu tshitanu tshia bukula bubotesha busangisha ne tshituha tshisatu tshia dikoho dia manyi,

⁷ne tshituha tshisatu tshia nvinyo bu mulambu udibo banua bua kûtuisha dihembu kudi Yehowa.

⁸Hanualongolola mulume wa ngombe bu mulambu wa kuosha ha kahia anyi bu mulambu wa kushikisha kuditshiha anyi bu mulambu wa kuvuisha nʼau ditalala kudi Yehowa,

⁹nebafile mulambu wa bukula bubotesha bu bituha bisatu bia ha dikumi busangisha ne tshituha tshia dikoho dia manyi,

¹⁰nebafile kabidi tshituha tshia dikoho dia nvinyo bu mulambu udibo banua, bu mulambu wa kuosha, bua kûtuisha dihembu kudi Yehowa.

¹¹Nenuenze nunku kudi mulume wa ngombe yonso anyi kudi tshimpanga tshionso anyi kudi bana ba balume ba mikoko anyi kudi mbushi.

¹²Bu bungi bua milambu mudi nu fila nenulongolole bintu ebi.

¹³Bantu bonso badi balela munkatshi muenu nebenze bilele ebi, hafilabo milambu ya kuosha ha kahia bu tshintu tshidi tshitua dihembu kudi Yehowa.

¹⁴Bikala muenyi mushikame munkatshi muenu, anyi muntu yonso muikale munkatshi muenu tô ne ku bikondo bienu bionso udi musue kufila mulambu wa kuosha ha kahia bu tshintu tshidi tshitua dihembu kudi Yehowa, yeye nênze bu munudi nuenza.

¹⁵Bualu bua bantu bonso nebikale ne mukenji umue kunudi ne kudi muenyi udi munkatshi muenu ku bikondo bienu bionso: muenyi neikale bu nuenu ku mesu kua Yehowa.

¹⁶Nenuikale ne mukenji umue ne dî dimue kunudi ne kudi muenyi udi munkatshi muenu.

¹⁷Yehowa wakambila Mose ne,

¹⁸Wambile Bena Isalele ne, Hanualua mu buloba bundi ngamba kunuha,

¹⁹ne hanuadia bintu bia mu buloba abu, nenufile mulambu udibo banyukula kudi Yehowa.

²⁰Nenunyukule mulambu wa mukata wakelabo ne bukula buakaboteshabo diambedi, nenufile mulambu eu bu mulambu wa bintu biakahuolabo.

²¹Nenunyukule mulambu wa bukula buakaboteshabo diambedi kudi Yehowa, ku bikondo bienu bionso.

²²Hanuahanga, kanuyi nutumikila mikenji yonso yakambila Yehowa Mose,

²³malu onso mene akanuambila Yehowa mukana mua Mose ku dituku diakanuheye mikenji yandi tô ne ku bikondo bionso bidi ku mpala,

²⁴bikala bualu buenjibue ku mpukahuka, bantu ba tshisumbu kabayi babumanye, bantu bonso nebafile muana mulume wa ngombe bu mulambu wa kuosha ha kahia bua kutuisha dihembu dimpe kudi Yehowa, ne mulambu wandi wa bukula ne mulambu wandi wa bintu bidibo banua, ne muana mulume wa mbushi bu mulambu wa kubuikila nʼau bubi, bu mudi mukenji wamba.

²⁵Muakuidi neafile mulambu wa kubuikidila Bena Isalele bonso bubi, ne bubi buabo nebuikale bubuikidibue, bualu bua bobo bakahanga ne bakalua ne milambu yabo, mulambu wa kuosha ha kahia kudi Yehowa, ne mulambu wa kubuikila hau bubi ku mpala kua Yehowa, bualu bua dihanga diabo;

²⁶bubi bua Bena Isalele bonso ne bua muenyi udi munkatshi muabo nebuikale bubuikidibue, bualu bua bakadi benze bualu ebu ku mpukahuka.

²⁷Bikala mundi muenze bualu bubi ku mpukahuka, neafile muana mukashi wa mbushi wa tshidimu tshimue bu mulambu wa kubuikila nʼau bubi.

²⁸Muakuidi neafile mulambu wa kubuikila nʼau bubi bua mundi wakenza bualu ku mpukahuka ku mpala kua Yehowa, ne bubi buandi nebuikale bubuikidibue.

²⁹Nenuikale ne mukenji umue kudi muntu mulela munkatshi mua Bena Isalele ne kudi muenyi udi munkatshi muenu, henzeye bualu bubi ku mpukahuka.

³⁰Kadi muntu udi wenza bualu bubi ne mutshima mukole nansha muntu mulela munkatshi muenu nansha muenyi, muntu au udi uhenda Yehowa, nebamumushe munkatshi muabo.

³¹Bualu bua yeye wakalengulula dî dia Yehowa, wakashiha mukenji wandi, nebamûmushilemu bulelela, neadituadile bubi buandi.

³²Hakadi Bena Isalele mu tshihela, bakasangana muntu wangula nkunyi dî diku dia Lumingu.

³³Bantu bakamusangana hakadiye wangula nkunyi, bakalua nʼandi kudi Mose ne Alona ne kudi tshisumbu tshionso tshia Bena Isalele.

³⁴Bakamuela mu lukanu, bualu bua kabakamanya dî dia Yehowa diakasueye kungenzela.

³⁵Yehowa wakambila Mose ne, Nebashihe muntu au bulelela bantu bonso nebamukume ne mabue ku butshika bua tshitudilu.

³⁶Bantu bonso ba mu tshisumbu bakalua nʼandi ku butshika bua tshitudilu, bakamushiha ne mabue, bu muakambila Yehowa Mose.

³⁷Yehowa wakambila Mose ne,

³⁸Wambile Bena Isalele bua bobo ne tunkanunuma tuabo badienzele malenda ku bilulu biabo, ne bobo bateke muonshi wa bleu ku malenda abo.

³⁹Hanuatangila malenda au, nuvuluke mikenji ya Yehowa, nuyenze, kanulondi mitshima yenu ne mesu enu adi anuenzesha malu a masandi,

⁴⁰nuenu nuvuluke mikenji yanyi yonso, nuyenze, nuikale bantu ba tshijila kudi Nzambi wenu.

⁴¹Meme nda Yehowa, Nzambi wenu, wakanuhatula mu buloba bua Ejipitu, bua kuikala Nzambi wenumeme ndi Yehowa, Nzambi wenu.