Read tshiluba Nomba 22 Bible Online

Nomba 22 - tshiluba bible

Nomba 22

¹Bena Isalele bakaya ku luendu, bakashikama mu mpata wa Moaba dishiya dia mai a Yadene, batangilangana ne Yeleko.

²Balaka, muana mulume wa Sipô, wakatangila malu onso akenzela Bena Isalele Bena Amole.

³Bena Moaba bakatamba kutshina bantu, bualu bua bungi buabo; mitshima ya Bena Moaba yakanyingalala bualu bua Bena Isalele.

⁴Mukelenge wa Moaba wakambila bakulu ba Midiyana ne, Bantu aba bd bungi nebatukengeshe bu mudi ngombe ukongolesha mashinde a mu budimi ne ludimu luandi Balaka, muana mulume wa Sipô, wakadi mukelenge wa Moaba ku tshikondo atshi.

⁵Yeye wakatuma miloho kudi Belâma, muana mulume wa Beô, ku Petô udi hehi ne musulu wa Pelata ku buloba bua bantu bandi bualu bua kumubikila ne, Tangila, bantu bakaluhuka mu Ejipitu, tangila, badi batangalaka buloba buonso, badi bashikama hehi nʼanyi.

⁶Nunku lua biebe, ndi nkusengelela, ungelele bantu aba mulau, bualu bua bobo badi bantamba bukole, hashishe nembahite bukole, netubashihe, nengihate mu buloba, bualu bua ndi mumanye ne, Muntu ûdi uvudishila disanka neikale ne disanka, ne mundi ûdi wela mulau neikale ne mulau.

⁷Bakulu ba Bena Moaba ne bakulu ba Midiyana bakaya ne bintu bia kumubila nʼabi mu bianza biabo, bakatua kudi Belâma, bakamuambila mei onso a Balaka.

⁸Yeye wakabambila ne, Nulale bienu kunoko butuku ebu, nennuambile dî kabidi, bu mudi Yehowa ungambila, ne bakelenge ba Moaba bakashala ne Belâma.

⁹Nzambi wakamueneka kudi Belâma wakamuambila ne, Balume aba badi kuebe mbantu kai?

¹⁰Belâma wakambila Nzambi ne, Balaka, muana mulume wa Sipô, mukelenge wa Moaba, wakantumina dî ne,

¹¹Bantu bakaluhuka mu Ejipitu, bakatangadika buloba buonso, lua biebe, ubangelele mulau, hashishe nemmanye mua kuluangana nʼabo, nembihate.

¹²Nzambi wakambila Belâma ne, Kuyi nʼabo, kuedi bantu aba mulau nansha, bantu aba badi basankishibue.

¹³Belâma wakabika dinda, wakambila miloho ya Balaka ne, Yai bienu ku buloba buenu, Yehowa wakahidia bua meme kuya nʼenu.

¹⁴Miloho ya Moaba yakabika, yakahingana kudi Balaka, yakamba ne, Belâma udi uhidia bua kulua nʼetu.

¹⁵Balaka wakatuma miloho mikuabo, yakahita miloho mikuabo butumbi.

¹⁶Yakalua kudi Belâma, yakamuambila ne, Balaka, muana mulume wa Sipô, udi wamba ne, Kuitabusha bua bualu buonso bukuhumbishe bua kulua kundi,

¹⁷bualu bua meme nenkuhe butumbi bunene, nengenze mei onso audi wamba, lua biebe, ndi nkusengelela, ungelele bantu aba mulau.

¹⁸Belâma wakitaba kudi miloho ya Balaka ne, Biampa Balaka nsubu wandi mûle tente ne argent ne or, tshiena mumanye mua kuhidia dî dia Yehowa Nzambi wanyi, bua kuenza bualu bukese anyi bualu bunene.

¹⁹Nuanji kulala bienu kunoko butuku ebu kabidi, bua meme kumanya dî didi Yehowa ungambila kabidi.

²⁰Nzambi wakambila Belâma butuku ne, Bialua balume aba bua kukubikila, ubike biebe, uye habo, kadi wenze biebe anu dî dinakuambila.

²¹Belâma wakabika ne dinda, wakela tshiseba ha nyima ha mpunda wandi, wakaya ne miloho ya Bena Moaba.

²²Tshiji tshiakakuata Nzambi bualu bua yeye wakaya, ne muanjelo wa Yehowa wakaditeka mu nshila bu muhumbishi wandi: Belâma wakadi wenda ha nyima ha mpunda wandi, ne bahika bandi babidi bakadi nʼandi.

²³Mpunda wakatangila muanjelo wa Yehowa muimane mu nshila, ne muele wa nvita mu tshianza tshiandi, mpunda wakasesuka mu nshila, wakaya mu budimi, Belâma wakakuma mpunda bua kumuhingisha mu nshila.

²⁴Muanjelo wa Yehowa wakimana mu nshila mukese udi hankatshi ha madimi a tumuma, lumbu luakadi ku luseke elu, ne lumbu ku luseke lukuabo

²⁵Mpunda wakatangila muanjelo wa Yehowa, wakadikuma ku lumbu, wakasunsula dikasa dia Belâma ku lumbu, ne yeye wakamukuma kabidi.

²⁶Muanjelo wa Yehowa wakaya ku mpala, wakimana mu nshila mukese, kakadi ne muaba wa mua kuya ku tshianza tshia balume anyi ku tshianza tshia bakashi.

²⁷Mpunda wakatangila muanjelo wa Yehowa, wakalala hanshi muinshi mua Belâma, tshiji tshiakakuata Belâma, wakakuma mpunda ne mulangala wandi.

²⁸Yehowa wakabidika mukana mua mpunda, wakambila Belâma ne, Nakuenza tshinyi bua wewe wakunkuma misangu isatu?

²⁹Belâma wakambila mpunda ne, Bualu bua wewe wakansekesha, bu meme muikale ne muele wa nvita mu tshianza, nakadi kukushiya.

³⁰Mpunda wakambila Belâma ne, Meme tshiena mpunda webe uwakenda ha nyima nʼandi matuku ebe onso tô ne katataka, anyi? Nakadi nkuenzela nunku dia mbedi, anyi? Yeye wakamba ne, Nansha.

³¹Yehowa wakabidika mesu a Belâma, ne yeye wakamona muanjelo wa Yehowa muimane mu nshala, ne muele wa nvita mu tshianza tshiandi, yeye wakinama mutu wandi, wakatua mpala hanshi.

³²Muanjelo wa Yehowa wakamuambila ne, Wakakuma mpunda webe misangu isatu bualu kai? Tangila, meme nakulua bu muhumbishi webe, bualu bua nshila webe kena muakane ku mesu kuanyi,

³³mpunda wakuntangila, wakusesuka kundi nusangu ei isatu bu mpunda muhidie kusesuka kundi, nakadi kukushiha wewe, ne nakadi kusungila mpunda.

³⁴Belâma wakambila muanjelo wa Yehowa ne, Nakuenza bibi, bualu bua tshiakamanya ne wewe wakadi muimane bua kunkanda mu nshila. Ne bikala bualu bukufikishe munda, meme nempingane kabidi.

³⁵Muanjelo wa Yehowa wakambila Belâma ne, Ya biebe ne balume aba kadi wewe wambe anu dî dinaknambila. Nunku Belâma wakaya ne miloho ya Balaka.

³⁶Hakunvia Balaka lumu ne, Belâma wakalua, wakaya kusangakena nʼandi ku tshimenga tshia Moaba, tshidi ku muelelu wa mai a Amona, ku butshika bua buloba buandi mene.

³⁷Balaka wakambila Belâma ne, Tshiakakusengelela bua kulua kundi, anyi? Wewe kuena mulue kundi munyi? Meme tshiena mumanye mua kukuha butumbi bulelela, anyi?

³⁸Belâma wakambila Balaka ne, Mona, nakamana kulua kudi! Ndi mumanye mua kukuambila bualu, anyi? Di didi Nzambi uteka mukana muanyi, nenkuambiledi.

³⁹Belâma wakaya ne Balaka, bakalua ku Kîyata-husota.

⁴⁰Balaka wakamushihela ngombe ne mikoko, wakantumina Belâma ne miloho yakadi nʼandi.

⁴¹Dinda Balaka wakaya ne Belâma ku mutu kua mikuna ya Bâla; yeye wakatangila tô ne ku matshika onso a tshitudilu tshia bantu.