Read tshiluba Nomba 28 Bible Online

Nomba 28 - tshiluba bible

Nomba 28

¹Yehowa wakambila Mose ne,

²Wambile Bena Isalele ne, Nulue ne milambu, ne bintu binudi nuosha ha kahia, bidi bitua dihembu kundi, mu matuku anakasungula.

³Wewe neubambile kabidi ne, Eu udi mulambu wa kuosha ha kahia unudi nûfila kudi Yehowa bana balume ba mikoko ba tshidimu tshimue, badi kabayi ne tshilema, bana babidi ba buatshia-buatshia, bu mulambu wa kuosha wa tshiendelele.

⁴Neudie muana wa mukoko umue ne dinda ne mukuabo dilolo,

⁵ne tshintu tshia dikumi tshia tshihiminu[10] tshia bukula bubotesha bu mulambu wa bukula busangisha ne tshituha tshinai tshia dikoho[11] dia manyi.

⁶Eu udi mulambu wa tshiendelele unakanuelela mukenji mu mukuna wa Sinai, mulambu udi utua dihembu, mulambu wa kuosha ha kahia kudi Yehowa.

⁷Mulambu wa kunua newikale tshituha tshinai tshia dikoho ku muana wa mukoko yonso, nebahongoluele Yehowa mulambu wa nvinyo udibo banua mu muaba wa tshijila.

⁸Neafile muana wa mukoko mukuabo dilolo, neufile mulambu wa bukula bu mûdi wenza dinda ne nvinyo udibo banua, mulambu udibo bosha ha kahia, udi utua dihembu kudi Yehowa.

⁹Mu dituku dia Lumingu neufue bana balume ba mikoko babidi badi kabayi ne tshilema ba tshidimu tshimue, ne bintu bibidi bia dikumi bia tshihiminu[12] tshimue tshia bukula bubotesha bu mulambu wa bukula busangisha ne manyi, ne mulambu wa bintu bidibo banua:

¹⁰eu udi mulambu wa kuosha ha kahia ku matuku a Lumingu, ku mutu kua mulambu udibo bafila buatshia-buatshia.

¹¹Mu bibangidilu bia ngondo yenu nenufile mulambu wa kuosha ha kahia kudi Yehowa bana balume ba ngombe babidi ne tshimpanga tshimue ne bana balume ba mikoko muanda mutekete ba tshidimu tshimue badi kabayi ne tshilema,

¹²ne bintu bisatu bia dikumi bia tshihiminu tshia bukula bubotesha bu mulambu wa bukula busangisha ne manyi ku muana wa ngombe yonso, ne bintu bibidi bia dikumi bia tshihiminu tshia bukula bubotesha bu mulambu wa bukula busangisha ne manyi ku tshimpanga tshionso,

¹³ne tshintu tshia dikumi tshia bukula bubotesha bu mulambu wa bukula busangisha ne manyi ku muana wa mukoko yonso, mulambu wa kuosha ha kahia udi utua dihembu kudi Yehowa.

¹⁴Milambu yabi ya bintu bidibo banua neyikale tshituha tshia dikoho dia nvinyo ku muana wa ngombe yonso, ne tshintu tshisatu tshia dikoho dia nvinyo ku tshimpanga tshionso, ne tshintu tshinai tshia dikoho dia nvinyo ku muana wa mukoko yonso, eu udi mulambu unudi nuosha ha kahia ku ngondo ku ngondo tô ne ngondo yonso ya mu tshidimu,

¹⁵Nenufile mulume wa mbushi bu mulambu wa kubuikila nʼau bubi kudi Yehowa ku mutu kua milambu idibo bafila buatshia-buatshia ne milambu ya bintu bidibo banua.

¹⁶Dituku dia dikumi ne anai dia ngondo wa kumudilu ndituku dia kuhita kua Yehowa.

¹⁷Dituku dia dikumi ne atanu dia ngondo eu ndituku dinudi nudia bidia bia Yehowa, nenudie bidia bidi kabiyi ne luevene to matuku muanda mutekete.

¹⁸Dituku dia kumudilu nenuikale ne disangisha dia tshijila, kanuenji mudimu,

¹⁹kadi nenufile mulambu wa kuosha ha kahia kudi Yehowa bana babidi ba ngombe ne tshimpanga tshimue ne bana balume ba mikoko muanda mutekete ba tshidimu tshimue badi kabayi ne tshilema,

²⁰ne milambu yabi ya bukula bubotesha busangisha ne manyi bintu bisatu bia dikumi ku ngombe ne bintu bibidi bia dikumi ku tshimpanga,

²¹ne tshintu tshia dikumi ku muana wa mukoko to ne ku bana bonso ba mikoko muanda mutekete,

²²ne mulume wa mbushi bu mulambu wa kunubuikidila nʼau bubi.

²³Nenufile bintu ebi ku mutu kua milambu mudi nuosha ne dinda bu mulambu wa kuosha wa tshiendelele.

²⁴Nenufile milambu ya buatshia-buatshia nunku, milambu ya kuosha ha kahia tô matuku muanda mutekete, idi itua dihembu kudi Yehowa, nenufile milambu ei ku mutu kua milambu mudi nuosha buatshia-buatshia ne milambu ya bintu bidibo banua.

²⁵Dituku dia muanda mutekete nenuikale ne disangisha dia tshijila, kanuenji mudimu.

²⁶Mu dituku dinudi nuhuola bintu bia kumudilu, hanuafila mulambu wa bukula buhia-buhia kudi Yehowa, nenuikale ne disangisha dia tshijila, kanuenji mudimu,

²⁷hadi nenufile mulambu wa kuosha ha kahia udi utua dihembu kudi Yehowa bana balume ba ngombe babidi ne tshimpanga tshimue ne bana balume ba mikoko muanda mutekete ba tshidimu tshimue,

²⁸ne milambu yabi ya bukula bubotesha busangisha ne manyi, bintu bisatu bia dikumi ku muana wa ngombe yonso, ne bintu bibidi bia dikumi ku tshimpanga tshionso,

²⁹ne tshintu tshia dikumi ku muana wa mukoko tô ne ku bana ba mikoko muanda mutekete,

³⁰ne mpumbu wa mbushi bu mulambu wa kunubuikidila nʼau bubi.

³¹Nenufile bintu ebi bidi kabiyi ne tshilema ku mutu kua milambu idibo bosha buatshia-buatshia, ne milambu ya bintu bidibo banua.