Read tshiluba Nomba 35 Bible Online

Nomba 35 - tshiluba bible

Nomba 35

¹Yehowa wakambila Mose mu mpata ya Moaba hehi ne Yadene mitangilangane ne Yeleko ne,

²Wele mukenji kudi Bena Isalele, bua bobo bahe Bena Lewi misoko ya kushikamamu bu buhianyi buabo, bobo bahe Bena Lewi kabidi tshituha tshia buloba budi bunyunguluka misoko ei.

³Bobo nebashikame mu misoko ei, ne bimuna ne bintu biabo ne nyama yabo mikuabo nebikale mu buloba budi bunyunguluka misoko.

⁴Tshituha tshia buloba bunudi nuha Bena Lewi netshikale ku lumbu lua musoko tô ne ku coudées[14] tshinunu ku nseke yonso.

⁵Ku butshika bua musoko nenuidikishe ku luseke lua ku esete coudées binunu bibidi, ne ku luseke lua ku Sude coudées binunu bibidi, ne ku luseke lua ku wesete coudées binunu bibidi, ne ku luseke lua ku nôde coudées binunu bibidi Buloba ebu bua ku matshika a misoko nebuikale buhianyi buabo.

⁶Nenuhe Bena Lewi misoko ei isambombo ya kunyemena, biashala muntu muntu mukuabo, yeye neanyemenemu; ha mutu ha misoko ei nenubahe misoko mikuabo makumi anai ne ibidi.

⁷Bungi bua misoko mudi nuha Bena Lewi neyikale makumi anai ne muanda mukulu, nenubahe misoko ei ne buloba budi buyinyunguluka.

⁸Bualu bua misoko mudi nubaha munkatshi mua Isalele, bantu badi ne misoko ya bungi, nebabahe misoko ya bungi, ne badi ne misoko mikese nebabahe misoko mikese, nebahe Bena Lewi misoko bu bungi bua buhianyi buabo.

⁹Yehowa wakambila Mose ne,

¹⁰Wambile Bena Isalele ne, Hanuasabuka Yadene mu buloba bua Kanâna,

¹¹nenusungule misoko ya kunyemena, ne hashiha muntu muntu mukuabo ku mpukahuka, yeye neanyemenemu.

¹²Misoko neyikale bu binyemenu kudi musombuedi, mushihi wa mundi kafu biandi tô ne himaneye ku mpala kua tshisumbu tshia bantu bua kumulumbuluishabo.

¹³Nenusungule misoko ya kunyemena isambombo.

¹⁴Nenusungule misoko isatu dishiya dia Yadene, ne isatu mu buloba bua Kanâna, neyikale misoko ya kunyemena.

¹⁵Neyikale misoko ya kunyemenamu kudi Bena Isalele, ne kudi muenyi udi munkatshi muabo, hashiha muntu muntu mukuabo ku mpukahuka, neanyemenemu.

¹⁶Bikaleye mumukume ne tshintu tshia tshiamu tshifike, ne biafileye, yeye udi mushihi wa muntu, nebashihe mushihi wa muntu bulelela.

¹⁷Bikaleye mumukume ne dibue mu tshianza tshiandi, ne biafileye, yeye udi mushihi wa muntu, nebashihe mushihi wa muntu.

¹⁸Anyi bikaleye mumukume ne mutshi mu tshianza, ne biafileye, yeye udi mushihi wa muntu, nebashihe mushihi wa muntu.

¹⁹Musombuedi nkayandi neashihe mushihi wa muntu.

²⁰Bikaleye mumukume ne tshiji, anyi bikaleye mumuele tshintu, hakadiye muale mu nshila, wakamushiha,

²¹anyi bikaleye mumukume ne tshianza tshiandi ne tshiji, mumushihe, nebashihe muntu wakamukuma, yeye udi mushihi wa muntu musombuedi neashihe mushihi wa muntu, hasangakeneye nʼandi.

²²Kadi bikaleye mumutahe kayi ne tshiji, anyi bikaleye muele tshintu, tshimukume, kayi mumualamine mu nshila,

²³anyi bikaleye mumukume ne dibue kayi mumutangile, ne mumushihe, kayi muikale nʼandi lukuna, kayi musue kunuenzela bibi,

²⁴nebalumbulule tshilumbu tshia mukuna wa muntu ne musombuedi, bu mudi mikenji ei yamba,

²⁵nebasungile mushihi mu tshianza tshia musombuedi, nebamuhingishe ku musoko wa kunyemena, kuakunyemeneye, ne yeye neashikamemu to ne hafua muakuidi munene, udi ne manyi a tshijila mela ha mutu.

²⁶Kadi bikala mushihi mubi tshile butshika bua musoko wakanyemeneye,

²⁷ne bikala musombuedi musangakene nʼandi ku butshika bua musoko wandi wa kunyemena, ne bikala musombuedi mushihe mushihi wa muntu, yeye kena ne bualu bubi,

²⁸bualu bua yeye wakadi ne bualu bua kuikala mu musoko wa kunyemena to ne bakafua muakuidi munene, kadi ku nyima kua lufu lua muakuidi munene mushihi udi mumanye mua kuhingana ku buloba bua buhianyi buandi.

²⁹Ei idi mikenji ya kuhumbulula hai malu ku bikondo bienu bionso, mu miaba yonso mudi nushikama,

³⁰muntu udi ushiha mukuabo, nebashihe mushiku bu mu dî dia bamonyi; kadi kabena bamanye mua kumushiha anu ku dî dia mumonyi umue.

³¹Kanuangatshi bintu bia buhikudi kudi mushihi wa muntu udi muhile bulelela, bualu bua nebamushihe bulelela.

³²Kanuangatshi bintu bia buhikudi kudi muntu wakasemena ku musoko wa kunyemena, bualu bua kumuhingisha ku buloba buandi to ne hafua muakuidi munene.

³³Nunku kanuena nuona buloba bunudi nushikamamu, bualu bua mashi adi ona buloba, kabena bamanye mua kuhikula buloba hakamata mashi, anu ku mashi a muntu wakamatshisha mashi.

³⁴Kanuonyi buloba bunudi nushikamamu, kundi mushikame kabidi, bualu bua meme Yehowa ndi mushikame munkatshi mua Bena Isalele.