Read tshiluba Nomba 5 Bible Online

Nomba 5 - tshiluba bible

Nomba 5

¹Yehowa wakambila Mose ne,

²Wele dî kudi Bena Isalele bua bobo bihate bena nsudi mu tshitudilu, ne muntu yonso udi ne mputa wa luhangu ne muntu yonso udi munyanguke ku dilenga dia muntu mufue

³nebihate nansha mulume nansha mukashi ku tshitudilu, kabanyangi tshitudilu tshiabo, mundi mushikame.

⁴Bena Isalele bakenza nunku, bakabihata mu tshitudilu, bu muakambila Yehowa Mose, Bena Isalele bakenza nunku.

⁵Yehowa wakambila Mose ne,

⁶Wambile Bena Isalele ne, Henza mulumi anyi mukashi bualu bubi budi bantu benza, udi ushiha mukenji wa Yehowa, ne badi bahisha muntu au,

⁷nunku yeye neatonde bubi buakenzeye, neahingishe bintu bionso biakangateye, neasangishe tshintu tshia tshitanu ha mutu habi, neabihingishe kudi nfumu wabi wakenzeye bubi.

⁸Bikala muntu kayi ne muanʼabo wa kumuhingishila bintu bia bubi buandi, bintu bidiye uhingisha bia kudilengesha nʼabi munda kudi Yehowa nebikale bintu bia muakuidi, ha mutu ha mulambu wa tshimpanga udiye ufila bua kudibuikila nʼau bubi buandi.

⁹Bintu bionso bia tshijila bia Bena Isalele bidibo banyukula, bidibo bafila kudi muakuidi, nebikale biandi.

¹⁰Bintu bionso bia tshijila bia muntu ne muntu nebikale biandi, ne bintu bionso bidi muntu uha muakuidi nebikale biandi.

¹¹Yehowa wakambila Mose ne,

¹²Wambile Bena Isalele ne, Bikala mukashi wa muntu usesuka, bikaleye umuenzela bibi,

¹³bikala mulume mukuabo ulala nʼandi, bikala bualu ebu busokoma ku mesu kua mulume wandi, kabuyi bumanyibue, bikala mukashi muonyibue ne kakuyi mumonyi wa bualu, kabayi bamukuata hakadiye wenda nʼandi,

¹⁴ne bikala mukau mumukuate bualu bua mukashi wandi udi muonyibue anyi bikala mukau umukuata bualu bua mukashi wandi udi kayi muonyibue,

¹⁵hashishe mulume alue biandi ne mukashi wandi kudi muakuidi, nealue ne mulambu wandi, tshituha tshia dikumi tshia tshihiminu[2] tshia bukula bua orge[3], kedihu nansha manyi, katekihu nansha musenga wa manananshi, bualu bua eu udi mulambu wa mukau, mulambu wa bukula wa tshivulukidi, bua kuvuluishangana bualu bubi.

¹⁶Muakuidi nealue nʼandi ha buihi, neamuteke ku mpala kua Yehowa

¹⁷ne muakuidi neangate mai a tshijila mu tshivuadi tshia dima, neangate dinfuenkenya dia buloba didi hanshi mu ntenta wa kusambakena, neadiele mu mai.

¹⁸Muakuidi neashikike mukashi ku mpala kua Yehowa, neasulule nsuki ya mukashi, neateke mulambu wa bukula wa tshivulukidi mu bianza biandi, eu udi mulambu wa mukau, muakuidi neangate mai a bululu adi elesha mulau mu tshianza tshiandi.

¹⁹Muakuidi neamutshihishe, neambile mukashi ne, Bikala mulume kayi mulale nʼebe, ne wewe kuyi musesuke mu malu mabi kudi mundi udi kayi mulume webe, wewe wikale mubingishibue kudi mai a bululu adi elesha mulau.

²⁰Kadi biwikala musesuke kudi mundi udi kayi mulume webe, ne biwikala muonyibue ne bikala mundi udi kayi mulume webe mulale nʼebe,

²¹(nunku muakuidi neatshihishe mukashi kuditshiha kua mulau) muakuidi neambile mukashi ne, Yehowa akuenzeshe mulau ne kuditshiha munkatshi mua bana benu, haboleshe Yehowa tshibelu tshiebe, ne hatuntumusheye mubidi,

²²ne mai au adi elesha mulau neabuele mu mala ebe, neatuntumushe mubidi webe, neaboleshe tshibelu tshiebe Ne mukashi neitabe ne, Amen, Amen.

²³Muakuidi neatonde milau ei mu mukanda, neanumushe mu mai a bululu,

²⁴neamushe mukashi mai a bululu adi elesha mulau, ne mai adi elesha mulau neabuele munda muandi, neikale mai a bululu.

²⁵Muakuidi neangate bukula bua mulambu wa mukau ku bianza bia mukashi, neanyukule mulambu wa bukula ku mpala kua Yehowa, nealue nʼau ku tshioshelu,

²⁶ne muakuidi neambule dianza tente ne bukula, bu tshivulukidi tshiau, neabuoshele ha tshioshelu, ne ku nyima yeye neamushe mukashi mai.

²⁷Hakamunuisheye mai, hashishe Bikala mukashi muonyibue, bikaleye muenzele mulume wandi bualu bubi, mai adi elesha mulau neabuele munda muandi, neikale a bululu, ne mubidi wandi neutuntumuke, ne tshibelu tshiandi netshibole ne mukashi neikale ne mulau munkatshi mua bana babo.

²⁸Bikala mukashi kayi muonyibue, kadi yeye udi muakane, nunku yeye neikale mubingishibue, nealele bana.

²⁹Eu udi mukenji wa mukau hasesuka mukashi bua kulala ne mundi udi kayi mulume wandi ne yeye udi muonyibue,

³⁰anyi hakuata mulume mukau bualu bua mukashi wandi, nunku yeye neashikike mukashi ku mpala kua Yehowa, hashishe muakuidi neashikishe mukenji eu wonso kudi mukashi.

³¹Mulume neikale mubingishibue ku bubi, ne mukashi eu neadituadile bubi buandi.