Read tshiluba Sefanya 3 Bible Online

Sefanya 3 - tshiluba bible

Sefanya 3

¹Mulau wikale kudi musoko udi mutomboke ne munyanguke, musoko udi ukengesha bantu!

²Kawakunvuila dî, kawakuitabusha diyisha. Kawakueyemena Yehowa, kawakusemena hehi ne Nzambi wau.

³Bakokeshi ba munkatshi muau badi bu nyama ya ntambue ikungula; balumbuluishi bau badi bu bimungu bidi biendakana butuku; kabiena bishiya tshintu tshia kudia hatshia butuku.

⁴Baprofete babo badi babuluke ne bena bunsonge; bakuidi babo badi banyanga bintu bia tshijila, ne badi banyanga mikenji.

⁵Yehowa udi muakane munkatshi muau; yeye kena wenza bualu bubi. Ku dinda ku dinda udi umuenesha kulumbulula kuakane hatoke, katu wahanga; kadi badi kabayi ne buakane kabena bamanye bundu.

⁶Wakushiha bisamba bia bantu; bibumba biabo bia masalayi bia ku matumba a ngumbu biakubutuka. Nakuvuisha misesu yabo mituhu, kayiyi ne bantu bahitshilamu. Misoko yabo yakubutudibua, ne kakuenamu muntu, kakuenamu muntu umuehele udi mushikamemu.

⁷Nakadiamba munda muanyi ne, Yeye kena uhanga kuntshina bulelela; neitabushe dikenga didi dimuyisha; ne kakuena bualu bumue bunakuteka hamʼbidi handi bua yeye kuenza buajimina ku mesu kuandi; kadi bakadiendesha lukasa bua kunyanga bienzedi biabo bionso.

⁸Nunku Yehowa udi wamba ne, Nungindile, tô ne ku dituku dindi mbika bua kunyenga bintu; hualu bua nakuhangidisha bua kusangisha bisamba bia bantu, bua kukungisha makelenge, bua meme kuhumuna tshiji tshianyi hamʼbidi habo, kahia konso ka tshiji tshianyi mene; bualu bua buloba buonso nebulue mu kahia ka lukunukunu luanyi.

⁹Bualu bua nenkudimune muaku wa bantu ba bende bua wikale muaku wa ku mishiku milengeshibue; bua bobo bamanye mua kubikila dina dia Yehowa, bamukuatshile mudimu ne diaha dionso muinshi mua bujitu.

¹⁰Ku miaba idi dishiya dia misulu ya mu Atiopa nebalue ne batendeledi banyi, bantu banyi batangadishibue mene, nebalue ne mulambu kundi.

¹¹Mu dituku adi kuena ufuishibua bundu bua bienzedi biebe bionso biwakuntombokela nʼahi; bualu bua mu dituku adi nengumushe munkatshi muenu bantu bebe badi baditumbisha ne dihetu diabo; wewe kuena wikala ne dihetu kabidi mu mukuna wanyi wa tshijila.

¹²Bualu bua nenshiye bantu bakengeshibue ne bahele munkatshi muenu, bobo nebanyemene ku dina dia Yehowa.

¹³Ba mu Isalele batshidi bashala kabena benza malu mabi kabidi, kabena bamba mashimi; kabena basangana mukana muabo ludimi ludi ludinga; bualu bua nebadie ne nebalale hanshi; kakuena kuikalaku muntu wabatshinyisha.

¹⁴Imba biebe, wewe muana mukashi wa Siona; Bena Isalele, elai mbila; ikale ne disanka, sankaku bikole ne mutshima webe wonso, wewe muana mukashi wa mu Yelushalema!

¹⁵Yehowa wakûmusha bilumbu biebe, wakuihata badi nʼebe lukuna; Mukelenge wa Isalele, Yehowa mene, udi munkatshi muenu; kuena umona makenga kabidi.

¹⁶Mu dituku adi nebambile Yelushalema ne, Kutshinyi, wewe Siona; bianza biebe kabiteketshi.

¹⁷Yehowa Nzambi webe udi munkatshi muenu, muena bukitu bukole udi ukusungila. Yeye neasanke bua bualu buebe ne disanka dinene, neakusangashe mu dinanga diandi, neasanke bua bualu buebe ne kuimba kua misambu.

¹⁸Nensangishe hohamue badi bajinga dituku dia tshijila bakadi nʼebe diambedi; bihendu biakanemesha bujitu hamʼbidi habo.

¹⁹Mona, mu tshikondo atshi nenshikishe tshilumbu tshia bonso bakadi bakukengesha; nempandishe udi mulema, nempingashe wakuihatabo; nembavuishe bantu badi ne butumbi ne badi ne dina dinene, bakadi bakuatshike bundu mu buloba buonso diambedi.

²⁰Mu tshikondo atshi nendue nʼenu, ne mu tshikondo atshi nennusangishe hohamue; bua nennuvuishile dina dinene ne butumbi munkatshi mua bantu bonso ba ha buloba, hanahingasha diakalengele dienu ku mesu kuenu mu muaba wa buhika buenu. Yehowa udi wamba dî edi.