Read tshiluba Hagai 2 Bible Online

Hagai 2 - tshiluba bible

Hagai 2

¹Mu ngondo wa muanda mutekete, mu dituku dia makumi abidi ne dimue dia ngondo, dî dia Yehowa diakalua kudi muprofete Hagai ne,

²Ambila Zelubabela, muana wa Shalatiele, gouverneur wa mu Yuda, ne Yoshua, muana wa Yehosadaka, muakuidi munene, ne bantu bonso badi bashale ne,

³Muntu kai udi mushale munkatshi muenu wakamona nsubu eu mu butumbi buandi diambedi? Nudi numumona bu tshinyi mpindiu? Kena ku mesu kuenu bu tshintu tshia hatuhu, anyi?

⁴Kadi Yehowa udi wamba ne, Kolesha mutshima webe mpindiu, Zelubabela; wikale ne mutshima mukole, wewe Yoshua, muana wa Yehosadaka, muakuidi munene; koleshai mitshima yenu, nuenu bantu bonso ba mu buloba ebu; enzai mudimu kabidi, bualu bua Yehowa wa misumba udi wamba ne, Meme ndi nʼenu.

⁵Dî dinakahunga nʼenu hanuakaluhuka mu Ejipitu didi dijalame. Nyuma wanyi neikale munkatshi muenu; kanutshinyi.

⁶Bualu bua Yehowa wa misumba udi wamba ne, Hahita tshikondo tshihi, nenzakashe diulu ne buloba, mai manene ne buloba bûme.

⁷Yehowa wa misumba udi wamba ne, Nenzakashe bisamba bionso, ne meme nengûshe nsubu eu ne butumbi tente. Yehowa wa misumba udi wamba dî edi.

⁸Yehowa wa misumba udi wamba ne. Bintu bia argent bidi bianyi, bintu bia or bidi bianyi.

⁹Yehowa wa misumba udi wamba ne, Butumbi bua nsubu eu bua matuku alualua nebuhite butumbi buandi bua diambedi bunene; mu muaba eu nempeshe bantu ditalala.

¹⁰Mu dituku dia makumi abidi ne anai dia ngondo wa tshitema, mu tshidimu tshibidi tshia bukokeshi bua mukelenge Dayawesha, dî dia Yehowa diakalua kudi muprofete Hagai ne,

¹¹Yehowa wa misumba udi wamba ne, Ebesha bakuidi bualu bua mikenji, bakonka ne,

¹²Biatuala muntu munyinyi wa tshijila mu luzemba lua tshivualu tshiandi, bialenga luzemba luandi mampa, anyi bialengalu bintu bia mu tshifuadi, anyi nvinyo, anyi manyi, anyi tshia kudia tshia mushindu wonso, bintu ebi nebikale bia tshijila, anyi? Bakuidi bakamukudimuna ne, Nansha.

¹³Hashishe, Hagai wakabakonka ne, Bikala muntu mubihe ku dilenga diandi dia tshitalu tshia muntu mufue, bialengeye tshintu tshikuabo tshia mu bintu abi bionso, tshintu atshi netshikale tshibihe, anyi? Bakuidi bakamukudimuna ne, Netshikale tshibihe.

¹⁴Hashishe, Hagai wakabandamuna ne, Yehowa udi wamba ne, Bantu aba badi nunku, ne tshisamba etshi tshidi nunku, ku mesu kuanyi, ne midimu yonso ya bianza biabo idi nunku kabidi; ne bintu bidibo bafila ku muaba wawa bidi bibihe.

¹⁵Mpindiu ndi nnusengelela ne, Nuelangane meji a bualu ebu mu mitshima yenu ku dituku edi tô ne ku matuku atshidi alua. Diambedi kabayi banji kutenteka dibue ha mutu ha dikuabo mu ntempelo wa Yehowa, nuakusangana malu kai?

¹⁶Mu tshikondo atshi, hakalua muntu ku mushiki wa bihiminu makumi abidi bia bia kudia, anu dikumi biakadiku; ne hakalua muntu ku mulondo munene wa nvinyo bua kutunta bihiminu makumi atanu, wakasangana anu makumi abidi.

¹⁷Yehowa udi wamba ne, Nakanukengesha ne kufubisha kua midioko ne butu, nakanutumina mabue a nvula, biakanyanga midimu yonso ya bianza bienu; kadi kanuakakudimuna mitshima yenu kundi.

¹⁸Ndi munusengelele ne, Nuelangane meji a muanda eu; ku dituku edi tô ne ku matuku atshidi ku mpala, ku dituku dia makumi abidi ne anai dia ngondo wa tshitema, ku dituku diakajadikabo bishimikidi bia ntempelo wa Yehowa; elanganai meji a muanda eu.

¹⁹Maminu akuanji kulua mu diyeba, anyi? E, muonshi wa tumuma tua nyinyo, mutshi wa nfigi, mutshi wa grenade ne mutshi wa olive kayena nuanji kukuama mamuma; kadi ku dituku edi tô ne ku mpala nennusankishe.

²⁰Dî dia Yehowa diakalua kudi Hagai tshiakabidi mu dituku dia makumi abidi ne anai dia ngondo ne,

²¹Ambila Zelubabela, gouverneur wa mu Yuda, dî edi ne, Nkadi ha kuzakasha diulu ne buloba;

²²nkadi ha kutokola nkuasa wa bunfumu, nkadi ha kubutula bukole bua makelenge a bisamba bia bantu, ne ha kutokola makalu a nvita ne badi bendamu; tubalu ne badi babanda ha nyima hatu nebikumibue hanshi, muntu ne muntu wa munkatshi muabo neahone hanshi ku muele wa nvita wa muanʼabo.

²³Yehowa wa misumba udi wamba ne, Mu dituku adi, Nenkuangate wewe Zelubabela, muntu wanyi, muana wa Shalatiele, nenkuvuishe bu kakanu ka ku munu wanyi; bualu bua nakukusungula. Yehowa wa misumba udi wamba mei â.