Read tshiluba Zekâya 4 Bible Online

Zekâya 4 - tshiluba bible

Zekâya 4

¹Muanjelo wakadi uyikila nʼanyi wakalua kabidi, wakambisha bu mudibo babisha muntu ku tulu tuandi.

²Wakankonka ne, Udi umona tshinyi? Nakamuitaba ne, Ndi mmona tshitekelu tshia minda tshia or mubidi watshi wonso, ne luhanza ludi ha mutu hatshi, ne minda yatshi muanda mutekete idihu; ne milonda muanda mutekete idi ifika ku minda idi ha mutu hatshi.

³Mitshi ya olive ibidi idi ha buihi nʼatshi, umue ku tshianza tshia balume tshia luhanza alu, mukuabo ku tshianza tshialu tshia bakashi.

⁴Nakakula kabidi ne muanjelo wakadi uyikila nʼanyi, nakamukonka ne, Ebi mbinganyi, mukelenge wanyi?

⁵Nunku muanjelo wakadi uyikila nʼanyi wakangandamuna ne, Kuena mumanye bintu ebi, anyi? Nakamukudimuna ne, Nansha, mukelenge wanyi.

⁶Nunku yeye wakitaba, wakangambila ne, Edi ndî dia Yehowa kudi Zelubabela ne, Kabiena bua bungi bua masalayi, anyi bua bukole, kadi mbua Nyuma wanyi; Yehowa wa misumba udi wamba nunku.

⁷Wewe, mukuna eu munene, udi tshinyi? Ku mpala kua Zelubabela nebakulandakashe bu mpata. Yeye neahatule dibue dia ku musonga wa nsubu helabo mbila ne, Diakalengele, diakalengele dikale kudidi.

⁸Dî dia Yehowa diakalua kundi kabidi ne,

⁹Bianza bia Zelubabela biakujadika bishimikidi bia nsubu eu; bianza biandi nebimushikishe; hashishe, neumanye ne Yehowa wa misumba wakuntuma kûdi.

¹⁰Muntu yonso wakujiana dituku dia malu makese neasanke, neamone luidi lua plomb mu tshianza tshia Zelubabela. Mesu au muanda mutekete adi mesu a Yehowa adi akenzakana eku ne eku ha buloba buonso.

¹¹Hashishe, nakamuebesha ne, Mitshi ei ibidi ya olive idi binganyi, wa ku tshianza tshia balume tshia tshitekelu tshia muinda, ne wa ku tshianza tshia bakashi?

¹²Nakamuebesha kabidi ne, Matamba â abidi a mitshi ya olive adi binganyi, adi ha buihi ne milonda ibidi ya or idi ituma manyi adi munda muai mu luhanza lua or lua ha mutu?

¹³Yeye wakangandamuna ne, Kuena mumanye bintu ebi, anyi? Meme nakitaba ne, Nansha, mukelenge wanyi.

¹⁴Nunku yeye wakamba ne, Ebi bidi bu bantu babidi bakajidilabo ne manyi, badi bimana ha buihi ne Mukelenge wa buloba buonso.