Read tshiluba Matayo 16 Bible Online

Matayo 16 - tshiluba bible

Matayo 16

¹Bafalese ne Basadoke bakalua, bakamuteta munda, bakamuambila ne, Utuleshe tshimanyinu tshia mu diulu.

²Kadi yeye wakabandamuna ne, Mu dilolo nutu nuamba ne, Nvula kena ulua, bualu bua diulu didi dikunze;

³mu dinda nutu nuamba ne, Lelu nvula nealue, bualu bua diulu didi dikunze kunzu, nvula udi mufinde. Nudi bamanye mua kujingulula mpala wa diulu, kadi kanuena bamanye mua kujingulula bimanyinu bia bikondo.

⁴Ba mu tshikondo tshibi ne tshia masandi badi bakeba tshimanyinu! kabena babaha tshimanyinu tshikuabo anu tshia Yona. Yeye wakahashîa, wakaya biandi.

⁵Bayidi ba Yesu bakalua dishia dia dishiba, muoyo wakabahua bua kuangata mitanda ya bidia.

⁶Yesu wakabambila ne, Tangilai bimpe, nudimukile luevene lua Bafalese ne lua Basadoke.

⁷Bobo bakambilangana ne, Buakuambileye nunku mbua tuetu katuakangata mitanda ya bidia.

⁸Hakamanya Yesu lungenyi luabo, wakamba ne, Nuenu nudi ne ditabusha dikese, nudi nuambidilangana ne, Katuena ne mitanda ya bidia, tshinyi?

⁹Kanuena bamanye, kanuena bavuluke bua mitanda itanu ya bantu binunu bitanu ne bungi bua bisaka binuakuangula?

¹⁰Kanuena bavuluke mitanda muanda mutekete ya bantu binunu binai ne bungi bua bisaka binuakuangula?

¹¹Bualu kai nuenu kanuena bamanye ne, Tshiakunuambila bua mitanda ya bidia? Nakunuambila bua kudimukila luevene lua Bafalese ne lua Basadoke.

¹²Hashishe, bakajingulula ne, Yeye kakutuambila bua kudimukila luevene lua mitanda ya bidia, wakutuambila bua kudimukila diyisha dia Bafalese ne dia Basadoke.

¹³Hakalua Yesu mu luseke lua Kaisalia wa Filipoi, wakakonka bayidi bandi ne, Bantu badi bamba Muana wa muntu ne, Nganyi?

¹⁴Bakamba ne, Bakuabo badi bamba ne, Yeye udi Yone Mubatiji, bakuabo ne, Yeye udi Eliya; bakuabo ne, Yeye udi Yelemiya anyi muprofete mukuabo.

¹⁵Yeye wakabakonka ne, Kadi nuenu nudi nungamba ne, Meme ndi nganyi?

¹⁶Simona Petelo wakandamuna ne, Wewe udi Kilisto, Muana wa Nzambi udi ne muoyo.

¹⁷Yesu wakamuandamuna ne, Simona Bâ-yona, wewe udi ne disanka; bantu kabakukubuluila bualu ebu, anu Tatu wanyi wa mu diulu.

¹⁸Ndi nkuambila kabidi ne, Wewe udi Petelo, ha dibue edi nengibake ekelesia wanyi; bibi bia ku mbelu kua Muaba wa Bafue kabiena bimuhita bukole.

¹⁹Nenkuhe nvungula ya bukelenge bua mu diulu, mu diulu nebasuike tshiwasuika ha buloba; mu diulu nebasuike tshiwasulula ha buloba.

²⁰Hashishe, yeye wakambila bayidi bandi bikole ne, Kanuambidi muntu ne, Yeye udi Kilisto.

²¹Ku tshikondo atshi Yesu wakabanga kulesha bayidi bandi ne, Bundi nʼabu mbua kuya ku Yelushalema, ne bua kukengeshibua makenga a bungi kudi bakulu ne kudi bakuidi banene ba Nzambi ne kudi bafundi, ne bua kushihibua, ne bua kubishibua hahita matuku asatu.

²²Petelo wakaya ne Yesu, wakabanga kumubela ne, Nzambi akufue luse, Mukelenge; bualu ebu kabuena bulua kûdi.

²³Kadi yeye wakatshinguluka, wakambila Petelo ne, Satana, yila ku nyima kuanyi, wewe udi tshilenduishi tshianyi, bualu bua wewe kuena welangana meshi a malu a Nzambi, udi welangana meshi anu a malu a bantu.

²⁴Yesu wakambila bayidi bandi ne, Biasua muntu kundonda, adihidie, ambule mutshi wandi mutshiamakane, alonde.

²⁵Bua wasua kusungila muoyo wandi neaujimishe, wajimisha muoyo wandi bua bualu buanyi neauhete.

²⁶Biasumba muntu buloba buonso ku muoyo wandi, mushinga wandi muimpe udi hanyi? Anyi, muntu udi ne tshintu kai tshia kushintakasheye bua kuangateye muoyo wandi kabidi?

²⁷Muana wa muntu nealue mu butumbi bua Tatu wandi ne banjelo bandi; dituku adi neafute muntu yonso bu muakenzenzeye.

²⁸Bulelela, ndi nuambila ne, Bakuabo badi bimana aha kabena bafua tô ne hamonabo Muana wa muntu ulua mu bukelenge buandi.