Read tshiluba Matayo 17 Bible Online

Matayo 17 - tshiluba bible

Matayo 17

¹Hakahita matuku asambombo, Yesu wakangata Petelo ne Yakobo ne muanʼabo Yone, wakabanda nʼabo ku mukuna mule, bobo nkayabo.

²Yeye wakakudimuka ku mesu kuabo; mpala wandi wakaditemena bu diba, bilulu biandi biakatoka bu munya.

³Monai, Mose ne Eliya bakamueneka kudibo bayikila nʼandi.

⁴Petelo wakambila Yesu ne, Mukelenge, hatudi kunoko mbimpe; biwasua, nengase bitanda bisatu, tshikuabo ntshiebe, tshinga ntshia Mose, tshikuabo ntshia Eliya.

⁵Hakatshidiye wamba nunku, monai, ditutu diengelela diakababuikila; dî diakaluhuka mu ditutu ne, Eu udi Muanʼanyi munanga, yeye udi unsankisha bimpe, munvuilai.

⁶Hakunvua bayidi dî adi, bakatua mpala hanshi, bakatamba kutshina.

⁷Yesu wakalua, wakabalenga tshianza, wakamba ne, Bikai, kanutshinyi.

⁸Hakabandulukabo, kabakamona muntu mukuabo, anu Yesu.

⁹Hakadibo bahueka ha mukuna, Yesu wakabambila ne, Kanuambidi muntu mukuabo bualu bunuakumona tô ne habika Muana wa muntu ku lufu.

¹⁰Bayidi bakamukonka ne, Bafundi batu bambila tshinyi ne, Budi Eliya nʼabu mbua kudianjileye kulua ku mpala?

¹¹Yeye wakandamuna ne, Bulelela, Eliya udi ulua, nealongolole bintu bionso bu muakadibi diambedi;

¹²kadi meme ndi nuambila ne, Eliya wakamana kulua, kabakamumanya, bakamuenzela bualu buakasuabo. Nunku nebakengeshe Muana wa muntu kabidi.

¹³Hashishe bayidi bakamanya ne, Yeye udi utuambila Yone Mubatiji.

¹⁴Hakafikabo hakadi tshisumbu tshia bantu, muntu wakalua kudiye, wakamutuila binu hanshi, wakamba ne,

¹⁵Mukelenge ufuile muanʼanyi wa balume luse, yeye udi ne tshiseke, udi ukenga bikole; misangu ya bungi yeye udi uhona mu kahia ne mu mai.

¹⁶Nakalua nʼandi kudi bayidi bebe, bobo kabakamanya mua kushikisha disama diandi.

¹⁷Yesu wakandamuna ne, Nuenu ba tshikondo etshi tshia buhidia ne tshitshu, nenshale nʼenu musangu bule munyi? Nentate nʼenu musangu bule munyi? Luai nʼandi kundi.

¹⁸Yesu wakabela demon, wakumuka munda mua muana; ha diba adi mene muana wakadi mukoleshibue.

¹⁹Hashishe, bayidi bakalua kudi Yesu nkayabo, bakamukonka ne, Munyi tuetu katuakamanya mua kumumusha?

²⁰Yeye wakabambila ne, Bualu bua ditabusha dienu diakadi dikese. Bulelela, ndi nuambila ne, Binuikala ne ditabusha bunene bua lutete lua mutada, nenuambile mukuna eu ne, Umukaku, ya kuakua, neumuke; kakuena bualu budi mua kunukolela. [

²²Hakadibo badisangisha mu Galela, Yesu wakabambila ne, Nebafile Muana wa muntu mu bianza bia bantu;

²³nebamushihe, neabishibue hahita matuku asatu. Mitshima yabo yakatamba kunyingalala.

²⁴Hakaluabo ku Kapênuma, basangishi ba mulambu wa ntempelo bakalua kudi Petelo, bakamukonka ne, Muyishi wenu kena ufuta tshituha tshibidi tshia nshekela,[5] anyi?

²⁵Yeye wakitaba ne, E, udi ufuta. Hakabueleye mu nsubu, Yesu wakadianjila kumukonka ne, Simona, udi welangana meshi munyi; banfumu ba ha buloba batu babalambula kudi bana babo balela, anyi kudi bantu ba bende?

²⁶Hakandamuneye ne, Kudi bantu ba bende, Yesu wakamuambila ne, Nunku bana balela badi badishikamine,

²⁷Kadi katubalenduishi, uye biebe ku dishiba, wele ndoho mu mai, wangate mushiha wadianjila kulua; hawabuela mukana muau, neusangane nshekela; umuangate, ubaheye bua wanyi ne webe.