Read tshiluba Matayo 5 Bible Online

Matayo 5 - tshiluba bible

Matayo 5

¹Hakamona Yesu bisumbu bia bantu, wakabanda ku mukuna; hakashikameye, bayidi bandi bakatua kudiye;

²yeye wakabulula mukana muandi, wakabayisha ne:

³Badi bahele mu mitshima yabo badi ne disanka, bua bukelenge bua mu diulu budi buabo.

⁴Badi badila badi ne disanka, bua bobo nebasambibue.

⁵Badi ne mitshima mihuekela badi ne disanka, bua bobo nebahiane buloba.

⁶Badi ne nsala ne nyota ya buakane badi ne disanka bua bobo nebûkute.

⁷Badi ne luse badi ne disanka, bua bantu bakuabo nebabafue luse.

⁸Badi ne mitshima mitoke badi ne disanka, bua bobo nebamone Nzambi.

⁹Basungi ba bantu badi ne disanka, bua nebabidike ne, Bana ba Nzambi.

¹⁰Bakakengeshibua bua buakane buabo badi ne disanka, bua bukelenge bua mu diulu budi buabo.

¹¹Hanuhendabo ne hanukengeshabo ne hanushiminyinabo mashimi onso, bua bualu buanyi, nenuikale ne disanka.

¹²Nusanke, nuikale ne disanka dingi, bualu bua difutu dienu didi mu diulu ndinene; bakakengesha baprofete nunku bakadi ku mpala kuenu.

¹³Nuenu nudi lueho lua buloba; hatshihala lueho kutua kualu, nebalutuishe kabidi ne tshinyi? Ludi tshianana, nebaluimashe, nebaludiate mu makasa.

¹⁴Nuenu nudi munya wa buloba. Kabena bamanye mua kusokoka musoko udi muasa ha mukuna.

¹⁵Bantu kabatu batemesha muinda bua kûbuesha munshi mua mushete, batu bauteka ha mesa a muinda, utemene bantu bonso mu nsubu.

¹⁶Nunku munya wenu uteme ku mesu kua bantu, bamone midimu yenu mimpe, batumbishe kabidi Tatu wenu udi mu diulu.

¹⁷Kanuedianganyi meshi ne, Nakuluila bua kushiha mikenshi ya Mose ne mei a baprofete; tshiakuluila bua kubishiha, nakuluila bua kubishikisha.

¹⁸Bulelela, ndi nuambila ne, Tô ne hajimina diulu ne buloba, kaleta kamue kakese ka mikenshi ya Mose kakena kajimina ne katoba kamue kakese tô ne hashika malu onso akafundabo.

¹⁹Washiha mukenshi umue wa mu mikenshi ei idi mitambe butekete, ne wayisha bantu bakuabo nunku, nebamuidike ne, Mutambe bukese mu bukelenge bua mu diulu; kadi wayenza, ne wayisha bantu bakuabo nunku, nebamuidike ne, Munene mu bukelenge bua mu diulu.

²⁰Ndi nuambila ne, Bikala buakane buenu kabui butambe bua bafundi ne bua Bafalese, kanuena nubuela mu bukelenge bua mu diulu.

²¹Nuenu nuakunvua dî diakane Habo bantu ba kale ne, Kushihi muntu mukuabo; washiha muntu mukuabo nebamubande ku tshilumbuluidi;

²²kadi meme ndi nuambila ne, Muntu yonso udi ne muanʼabo tshishi nebamubande ku tshilumbuluidi; muntu yonso wamhila muanʼabo ne, Laka, nebamubande kudi balumbuludi banene; muntu yonso wambila munga muntu ne, Wewe udi muhote, udi mua kukengeshibua mu Ngena wa kahia.

²³Hautshidi ufila kuha kuebe ku tshishihelu ne biwavuluka ne, Muanʼetu udi nʼanyi bualu,

²⁴ushîe kuha kuebe ku mpala kua tshishihelu, uye biebe, ulengeshe nʼandi; hashishe ulue, ufile kuha kuebe.

²⁵Ulengeshe ne udi nʼebe lukuna lukasa, hautshidi nʼandi mu nshila; biwikala kui wenza nunku, udi nʼebe lukuna neakufile mu bianza bia mulumbuludi, ne mulumbuludi neakufile mu bianza bia mpolushe, nebakuele mu nsubu wa lukanu.

²⁶Bulelela, ndi nkuambila ne, Kuena uluhukamu tô ne hawafuta dibanza dionso, nasha kakuta kakese kushala.

²⁷Nuakunyua dî diakambabo ne, Kuendi masandi;

²⁸kadi meme ndi nuambila ne, Muntu yonso udi utangila mukashi ne lukuka lua masandi wakumana kuenda nʼandi masandi mu mutshima wandi.

²⁹Bikala disu diebe dia ku tshianza tshia balume dikulenduisha, wadiula, wadimasha; bualu bua kujimisha tshintu tshimue tshia mubidi webe kudi kutamba kuedibua kua mubidi webe wonso mu Ngena.

³⁰Biakulenduisha tshianza tshiebe tshia balume, watshikosa, watshimasha, bualu bua kujimisha tshintu tshimue tshia mubidi webe kudi kutamba kuya kua mubidi wonso mu Ngena.

³¹Bakuamba kabidi ne, Biahidia mulume mukashi wandi, ahe mukashi makanda wa kushiha dibaka;

³²kadi meme udi nuambila ne, Biahidia mulume mukashi wandi, kabui bua masandi, neamuvuishe amena masandi; wabaka mukashi muhidia nunku neikale muena masandi.

³³Kabidi, nuenu nuakunyua dî diakambilabo bantu ba kale ne, Kuditshihi tshianana, wenzele Nzambi mitshihu yebe;

³⁴kadi meme ndi nuambila ne, Kanuditshihi; ne kudi diulu, bualu bua diulu didi nkuasa wa butumbi wa Nzambi;

³⁵ne kudi buloba, bualu bua buloba budi tshitekelu tshia makasa andi; ne kudi Yelushalema, bualu bua Yelushalema udi musoko wa Mukelenge Munene.

³⁶Wewe kuditshihi kudi mutu webe, bualu bua wewe kuena mumanye mua kuvuisha lusuki lumue anyi lutoke anyi lufike.

³⁷Nuikale ne dî ne, E, E, anyi Nasha, Nasha. Dî ditentekesha ha mutu didi difuma kudi bualu bubi.

³⁸Nuakunyua dî diakambabo ne, Disu ku disu, dinu ku dinu.

³⁹Kadi meme udi nuambila ne, Kanuluanganyi ne muntu mubi; biakukuma muntu dihi ku ditama dia ku tshianza tshia balume, umuandamuine dia ku bakashi kabidi.

⁴⁰Biasua muntu kuya nʼebe ku tshilumbu bua kuangateye nshemise webe, angate ne kazaku kabidi.

⁴¹Biakuendesha muntu ntanta wa kilometa umue ku bukole, wende nʼandi ntanta wa kilometa ibidi.

⁴²Udi ukulomba tshintu umuhetshi, udi musue kukusomba tshintu kumukomi nyima.

⁴³Nuakunyua dî diakambabo ne, Sua mukuenu, ikala ne udi nʼebe lukuna tshishi;

⁴⁴kadi meme ndi nuambila ne, Suai badi nʼenu lukuna, lombelai badi banukengesha Nzambi;

⁴⁵nunku nenuikale bana ba Tatu wenu udi mu diulu; bualu bua yeye utu wabandishila bantu babi ne bantu bimpe diba, yeye kabidi utu watumina bantu bakane ne bantu babi nvula.

⁴⁶Binuasua badi banusue, nenuikale ne difutu kai? Basangishi ba mulambu mene kabatu benza nunku, anyi?

⁴⁷Binuakidila anu bana benu, nenuenze bualu budi butambe bua banga bantu kudi kunyi? Bantu ba bende kabatu benza nunku, anyi?

⁴⁸Nunku nuenu nenuikale bakane bu mudi Tatu wenu wa mu diulu muakane.