Read tshiluba Luka 11 Bible Online

Luka 11 - tshiluba bible

Luka 11

¹Yeye wakadi utendelela Nzambi mu muaba mukuabo; hakalekeleye, muyidi wandi mukuabo wakamuambila ne, Mukelenge, utuyishe bietu mua kutendelela Nzambi bu muakayisha Yone bayidi bandi.

²Yeye wakabambila ne, Hanuatendelela Nzambi, nuambe ne, Tatu, banemeke dina diebe. Bukelenge buebe bulue.

³Utuhe tshituha tshia bidia bietu bia buatshia-buatshia.

⁴Utujimishile mibi yetu, bualu bua tuetu tudi tulekelele muntu yonso udi nʼetu dibanza. Kutufikishi hadi mateyi.

⁵Yeye wakabakonka ne, Muntu kai wa munkatshi muenu udi ne mulunda wandi? Biayeye kudi mulunda wandi mundankulu ne, Mulunda, unsombeshe mitanda isatu;

⁶bualu bua mulunda wanyi wakulua ku luendu, tshiena ne tshia kuteka ku mpala kuandi;

⁷yeye udi mu nsubu neandamune ne, Lekela kuntatshisha; tshibi tshidi tshinshila, hana banyi ne meme tudi mu bulalu; tshiena mumanye mua kubika bua kukuha tshintu.

⁸Ndi nuambila ne, Bulelela, yeye kena ubika bua kumuha tshintu bua yeye udi mulunda wandi, kadi bualu bua dinanukila diandi yeye neabike, neamuhe bintu bionso bidiye nʼabi bualu.

⁹Ndi nuambila ne, Nulombe, nebanuhe; nukebe, nenumone; nukokole, nebanunzuluile.

¹⁰Bualu bua muntu yonso udi ulomba, neahete; udi ukeba, neamone; udi ukokola, nebamunzuluile.

¹¹Tatu kai wa munkatshi muenu, biamulomba muanʼandi mutanda, neamuhe dibue, anyi? Biamulombeye mushiha, neamuhe nyoka, anyi?

¹²Muomumue, biamulombeye dikela, neamuhe kaminyiminyi, anyi?

¹³Nunku nuenu bantu babi, binuamanya mua kuha bana benu bintu bimpe, Tatu wenu wa mu diulu kena uha batu bamulomba Nyuma Muimpe, anyi?

¹⁴Yeye wakadi umusha demon wa kamama munda mua muntu Hakumuka demon, kamama kakakula; bantu bakakema.

¹⁵Kadi bakuabo bakamba ne, Yeye udi umusha bademon mu dina dia Belezebula, mukelenge wa bademon.

¹⁶Bakuabo bakamuteta munda, bakamulomba tshimanyinu tshia mu diulu.

¹⁷Kadi yeye wakamanya meshi abo, wakabambila ne, Bukelenge buonso budi buhanduluke nebufue, nsubu kabidi udi muhanduluke neuhukile ha munga.

¹⁸Ne Satana kabidi biahandulukeye, bukelenge buandi budi bumanye mua kujalama munyi? Bua nuenu nudi nungamba ne, Udi umusha bademon mu dina dia Belezebula.

¹⁹Bingikala ngumusha bademon mu dina dia Belezebula, bana benu badi babumusha mu dina dia nganyi? Nunku bobo nebikale balumbuludi benu.

²⁰Kadi bingikala ngumusha bademon ne munu wa Nzambi, bukelenge bua Nzambi buakumana kulua kunudi.

²¹Bialama muena bukole luhangu luandi, muikale ne bintu bionso bia nvita, biuma biandi nebikale talalâ;

²²kadi biamutukidila mukuabo udi mumutambe bukole, neamutshimune, neamunyenge bintu biandi bionso bia nvita biakueyemeneye, neabanyine bakuabo bintu biakunyengeye.

²³Udi kai nʼanyi udi umpidia; udi kai usangisha nʼanyi bintu udi ubitangalasha.

²⁴Haluhuka nyuma wa bukoya munda mua muntu, nyuma udi wendakana mu miaba idi kayi mai, ukeba ha kuikisha; biahangeye mua kuhamona, yeye udi wamba munda munda ne, Nempingane mu nsubu wanyi unakuluhuka.

²⁵Halueye, udi usangana nsubu mukomba, mulengesha.

²⁶Hashishe, yeye udi uya biandi, udi wangata minga nyuma muanda mutekete idi imutamba yeye bubi, idi ibuelamu, idi ishikama; malu a muntu au a hashishe adi atamba a diambedi bubi.

²⁷Hakadiye wamba malu â, mukashi wa mu tshisumbu tshia bantu wakela dî diandi, wakamba ne, Difu diakukutuala didi ne disanka ne mabele awakuamua.

²⁸Kadi yeye wakamba ne, Nasha, badi batelesha dî dia Nzambi, badi badilama, badi ne disanka.

²⁹Hakamunguila bisumbu bia bantu, wakabanga kubambila ne, Ba tshikondo etshi badi babi, badi bakeba tshimanyinu; kabena babaha tshimanyinu tshikuabo anu tshia Yona.

³⁰Bu muakadi Yona tshimanyinu ku mesu kua Bena Ninewe, Muana wa muntu neikale nunku kabidi ku mesu kua ba tshikondo etshi.

³¹Mu dituku dia kulumbulula, mukelenge mukashi wa ku sude neabike ne bantu ba tshikondo etshi, neabahishe; bua yeye wakalua biandi kunfudilu kua buloba bualu bua kunvua lungenyi lua Solomo; ne monai, udi mutambe Solomo udi aha.

³²Mu dituku dia kulumbulula, Bena Ninewe nebimane ne bantu ba tshikondo etshi, nebabahishe; bua bobo bakakudimuna mitshima yabo, hakuluabo mei a Yona; ne monai, udi mutambe Yona udi aha.

³³Hatemesha muntu muinda, yeye kena ûteka mu tshisokomenu, anyi munshi mua mushete, udi ûteka ha mesa a muinda, bua bonso babuela bamone dinkenka diau.

³⁴Disu diebe didi muinda wa mubidi webe; bikala disu diebe dimona tshintu bimpe, mubidi webe wonso neuteme ne munya; bikaladi dibi, mubidi webe wonso neufike ne mîdima.

³⁵Udimuke ne munya udi munda muebe kawikadi mîdima.

³⁶Bikala mubidi webe wonso utoka ne munya, kawi ne luseke lukuabo lufike, wonso neutoke ne munya, bu mudi muinda ukutemena ne dinkenka diau.

³⁷Hakadiye wakula, Mufalese wakamubikila ne, Udie nʼanyi bidia bia dinda; wakabuela mu nsubu, wakashikama ku mesa.

³⁸Hakamona Mufalese bualu abu, wakakema bua yeye kakowa diambedi.

³⁹Mukelenge wakamuambila ne, Ahu nuenu Bafalese nutu nûvua ha nyima ba luhanza ne dilonga, kadi munda muenu mudi mûle tente ne bunyengi ne malu mabi.

⁴⁰Nuenu bahote, muenji wa munda kena muenji wa ha nyima kabidi, anyi?

⁴¹Nuhe bantu bintu bia luse binudi nʼabi munda; nunku bintu bionso nebitoke ku mesu kuenu.

⁴²Kadi nuenu Bafalese, mulau ulualua kunudi, bualu bua nuenu nutu nuafila tshia dikumi tshia luenyi ne tshia tshikote ne tshia midioko yonso, kadi nudi nuhetula dilumbulula dijalame ne luse bia Nzambi; biakadi bimpe bia nuenu kuenza malu â a itu nyima, kambimpe nuhidie kuenza malu au a ku mpala kabidi.

⁴³Nuenu Bafalese, mulau ulualua kunudi, bualu bua nudi basue nkuasa minene mu nsunagoga, nudi basue kabidi bantu banusekelele mu bisalu!

⁴⁴Mulau ulualua kunudi, bualu hua nuenu nudi bu nkita idi kayi imueneka, bantu batu batambakenahu kabena baimanye!

⁴⁵Mumanyi wa mikenshi mukuabo wakakudimuna dî, wakamba ne, Muyishi, hawakuamba dî edi, udi utuhenda bietu kabidi.

⁴⁶Yesu wakamba ne, Nuenu bamanyi ba mikenshi, mulau ulualua kunudi kabidi, bua nuenu nutu nuateka hamʼbidi ha bantu majitu adi bualu bukole ha kuatuala, kadi nuenu kanutu nuâlenga munu!

⁴⁷Mulau ulualua kunudi, bua nuenu nutu nuibaka nkita ya baprofete, bakashihabo kudi bankambua benu!

⁴⁸Nunku nudi nudibanda, nudi nuitabusha malu akenza bankambua benu; bobo bakabashiha, nuenu kabidi nutu nuibaka nkita yabo.

⁴⁹Ebu mbuakamba lungenyi lua Nzambi kabidi ne, Nembatumine baprofete ne bapostolo; nebashihe bakuabo, nebabakengeshe;

⁵⁰nunku nebalombe mashi a baprofete bonso akamatshishabo hanshi ku tshibangidilu tshia buloba tô ne katataka bu dibanza dia bantu ba tshikondo etshi:

⁵¹mashi a Ebele tô ne ku mashi a Zakâya, wakafuila hankatshi ha tshishihelu ne ntempelo; bulelela, ndi nuambila ne, Neikale bu dibanza dia bantu ba tshikondo etshi.

⁵²Nuenu bamanyi ba mikenshi, mulau ulualua kunudi, bua nuenu nuakunyenga luvungula lua ku lungenyi; kanuakubuelamu, nuakuhumbisha kabidi bakadi babuela!

⁵³Hakaluhukeye, bafundi ne Bafalese bakabanga kumunguila ne bukole, bamuambishe malu makuabo;

⁵⁴bakadi bamualamine bua kukuatabo dî diahatuka mukana muandi.