Read tshiluba Luka 23 Bible Online

Luka 23 - tshiluba bible

Luka 23

¹Buonso buabo bakabika, bakalua nʼandi ku mpala kua Pilato.

²Bakabanga kumubanda ne, Tuakusangana muntu eu utombosha tshisamba tshietu uhidisha bantu ne, Kanulambudi Kaisa, wamba kabidi ne, Meme ndi Kilisto, Mukelenge.

³Pilato wakamukonka ne, Wewe udi Mukelenge wa Bena Yuda, anyi? Wakamukudimuna dî ne, Bûdi wamba mbulelela.

⁴Pilato wakambila bakuidi banene ne bisumbu bia bantu ne, Tshiena musangane muntu eu ne bualu.

⁵Kadi bobo bakakolesha dî diabo ne, Yeye udi usonsola bantu, wenda ubambila mu luseke lua Yudaya, mubangile ku Galela tô ne kunoko.

⁶Hakunvua Pilato dî edi, wakakonka ne, Muntu eu udi Muena Galela, anyi?

⁷Hakamanyeye ne, Ngua ku nyima kua Helode, wakamutuma kudi Helode, wakadi biandi mu Yelushalema matuku â.

⁸Helode wakasanka hakamoneye Yesu, bualu bua musangu mule wakadi musue kumutangila, wakadi mumane kunyua lumu luandi; wakasua kutangila bualu bua kukema buenzeye.

⁹Helode wakamukonka malu a bungi; kadi Yesu kakamukudimuna di.

¹⁰Bakuidi banene ne bafundi bakimana, bakamubanda bikole.

¹¹Helode ne masalayi andi bakamutshimbisha, bakamuseka, bakamuluatshisha tshilulu tshitoke tô, bakamuhingisha kudi Pilato.

¹²Dituku adi mene Helode ne Pilato bakakuatangana bulunda kabidi, diambedi bakadi bikalangane lukuna.

¹³Pilato wakabikila bakuidi banene ne miloho ne bantu,

¹⁴wakabambila ne, Nuakulua ne muntu eu kundi ne, Yeye udi utombosha bantu; hanakumulumbuluisha malu andi ku mesu kuenu, tshiena mumusangane ne bualu bunudi bamubande;

¹⁵ne Helode kabidi kena mumusangane nʼabu, yeye wakamuhingisha kutudi; yeye kena muenze bualu buafuileye.

¹⁶Nemukume, nemulekele. [

¹⁷][8]

¹⁸Buonso buabo bakela dî diabo diakamue ne, Umusha muntu eu, utulekelele Balaba;

¹⁹yeye wakadi mubueshibue mu nsubu wa lukanu bualu bua ditomboka diakadi mu musoko ne bua dishihangana.

²⁰Pilato wakakula nʼabo kabidi, wakasua kulekela Yesu;

²¹kadi bobo bakela mbila ne, Umushihe ku mutshi mutshiamakane, umushihe ku mutshi mutshiamakane.

²²Yeye wakabakonka tshiakasatu ne, Bualu kai? Muntu eu wakuenza bualu bubi kai? Tshiena mumusangane ne bualu buafuileye; nenukume, nemulekele.

²³Kadi bobo bakakolesha mei abo, bakamulomba ne, Bamushihe ku mutshi mutshiamakane. Mei abo akamutekesha.

²⁴Pilato wakakosa tshilumbu, wakamba ne. Bualu buakulombabo buenjibue.

²⁵Pilato wakalekela wakadi mubuesha mu nsubu wa lukanu bualu bua ditomboka ne bua dishihangana, wakamulombabo; kadi yeye wakafila Yesu mu bianza biabo bua kuenzabo bu muakadibo basue.

²⁶Hakadibo baya nʼandi, bakakuata muntu dina diandi Simona, Muena Kulene, wakadi ufuma mu ntshiamba, bakateka mutshi mutshiamakane ha diaha diandi, autuale ku nyima kua Yesu.

²⁷Tshisumbu tshinene tshia bantu tshiakamulonda ne tshia bakashi bakadi badila bamujinga.

²⁸Yesu wakatshinguluka, wakamba ne, Bana bakashi ba Yelushalema, kanunjingi, nudijinge, nujinge bana benu.

²⁹Tangilai, matuku alualua amba bantu ne, Bakashi badi nkumba badi ne disanka ne mafu adi kâi manze kulela bana ne mabele adi kâi mâmushe.

³⁰Hashishe nebabange kuambila mikuna minene ne, Nutubuikile; ne mikuna mikese ne, Nutubuikile.

³¹Bienzabo malu â hatshidi mutshi ne muoyo, nebenze tshinyi humau?

³²Bakadi baya ne bantu bakuabo babidi, benji ba malu mabi, bua kubashiha nʼandi.

³³Hakafikabo ku muaba udibo babikila ne, Kabalubalu ka Mutu, bakamukumina milonda mu bianza ne ku makasa ku mutshi mutshiamakane, bakenzela bantu babidi nunku kabidi, mukuabo ku tshianza tshia balume, mukuabo ku tshianza tshia bakashi.

³⁴Yesu wakamba ne, Tatu, ubabuikidile bubi buabo, kabena bamanye bualu budibo benza. Bakabanyangana bilulu biandi, bela nʼabi nshobo.

³⁵Bantu bakadi bimane batangila. Miloho yakamuseka ne, Yeye wakasungila bakuabo, adisungile bikaleye Kilisto wa Nzambi musungula kudiye.

³⁶Masalayi kabidi akamuseka, akalua kudiye, akamuha nvinega,

³⁷akamba ne, Biwikala Mukelenge wa Bena Yuda, udisungile.

³⁸Bakafunda ha mutu handi ne: EU UDI MUKELENGE WA BENA YUDA.

³⁹Bantu babi babidi bakadi bahohela, mukuabo wakahenda Yesu ne, Wewe kuena Kilisto, anyi? Udisungile, utusungile.

⁴⁰Kadi mukuabo wakamubela ne, Wewe kuena utshina Nzambi, anyi? Wewe udi mu dihila diodimue.

⁴¹Bakakosa tshilumbu tshietu bimpe; tuetu tudi tuangata difutu bu mutuakenza, kadi muntu eu kena muenze bualu bubi.

⁴²Yeye wakamba ne, Yesu, hawabuela mu bukelenge buebe, unvuluke.

⁴³Yesu wakamuambila ne, Bulelela, ndi nkuambila ne, Lelu wewe newikale nʼanyi mu Paladiso.

⁴⁴Hakafika diba munda munya, mîdima yakadi ha buloba buonso tô ne hakafika diba ha isatu;

⁴⁵diba diakahanga kutema; tshilulu tshikudika mu ntempelo tshiakahandika hankatshi.

⁴⁶Yesu wakela dî dikole ne, Tatu, ndi nteka muoyo wanyi mu bianza biebe; hakambeye nunku, wakahuola muoyo.

⁴⁷Hakatangila kapitene ka masalayi bualu ebu, wakatumbisha Nzambi ne, Bulelela, eu wakadi muntu muakane.

⁴⁸Bantu bonso bakadi balue kutangila malu â bakahingana badikuma mu biadi, hakamonabo malu akenjibue.

⁴⁹Bonso bakamanyeye ne bakashi bakadi bafume ku Galela bamulonda bakadi bimanyine ha bule, batangile malu â.

⁵⁰Muntu wakadiku, dina diandi Yosefe, yeye wakadi mulumbuludi, wakadi muntu muimpe kai ne kansungunsungu,

⁵¹(yeye kakitabusha dî diabo ne bualu buakenzabo) wakadi muntu wa ku Alimataya, musoko wa Bena Yuda, wakadi mutekemene bukelenge bua Nzambi;

⁵²muntu au wakaya kudi Pilato, wakamulomba tshitalu tshia Yesu.

⁵³Wakatshitulula, wakatshijingila tshilulu tshia line, wakamuladika mu lukita lumbula mu dibue, muakadi kamui tshitalu diambedi.

⁵⁴Dituku adi diakadi dia Dilongolola, Lumingu lua Bayuda luakadi ha buihi.

⁵⁵Bakashi bakadi bafume nʼandi ku Galela bamulonda ku nyima, bakatangila lukita ne muakaladikabo tshitalu tshiandi.

⁵⁶Bakahingana, bakalongolola bintu bia muhuya muimpe ne manyi a mananashi. Dituku dia Lumingu lua Bayuda bakikisha bu mudi mukenshi wa Nzambi.