Read tshiluba Dutelonone 24 Bible Online

Dutelonone 24 - tshiluba bible

Dutelonone 24

¹Hangata mulume mukashi bua kumubaka, ne bikala mukashi kayi muimpe ku mesu kuandi bualu bua yeye wakamusangana ne malu adi kayi mimpe, hashishe yeye neamufundile mukanda wa kushiha dibaka, neamuheu mu bianza, neamûmushe mu nsubu wandi.

²Kumukeye mu nsubu wandi, yeye udi mua kuikala mukashi wa munga muntu.

³Bikala mulume eu wa ku nyima mumukine, mumufundile mukanda wa kushiha dibaka kabidi, mumuheu mu bianza biandi, mumûmushe mu nsubu wanyi, anyi biafua mulume eu wa ku nyima wakamuangata bu mukashi wandi,

⁴mulume wa diambedi, wakamûmusha mu nsubu wandi, kena mua kumuangata bu mukashi wandi kabidi, bualu bua mukashi wakumana kunyangisha; bualu ebu budi bubi ku mesu kua Yehowa. Nunku kanunyangi buloba budi Yehowa, Nzambi wenu, unuha bua nuenu kubuhiana.

⁵Habaka mulume mukashi muhia-muhia, kayi mu bisumbu bia bena nvita, kabamutekedi bujitu bukuabo; ashale mu nsubu wandi tô tshidimu tshijima, bua kusambeye mukashi wakuangateye.

⁶Muntu kangatshi mabue adibo bahela nʼau manvua, anyi dibue dia mpelu bu tshieya; bualu bua budi bu muntu udi ufila muoyo wandi bu tshieya.

⁷Biasanganabo muntu udi wiba muanʼabo umue wa Bena Isalele, udi umuenza bu muhika, anyi udi umuhana, hashishe nebashihe muibi: nunku nenûmusbe malu mabi munkatshi muenu.

⁸Nudimuke bualu bua disama dia nsudi, bua nuenu kuenza malu onso bimpe adi bakuidi ba mu Bena Lewi banuyisha: bu munakabambila bobo, nuenu nuenze nunku.

⁹Nuvuluke bu muakenzela Yehowa, Nzambi wenu, Miyama mu nshila hanuakalubuka mu Ejipitu.

¹⁰Hanuasombesha mukuenu tshintu, kanuyi mu nsubu wandi bua kudiangatshila tshieya tshiandi.

¹¹Nuenu mumane ku mbelu ne muntu uwakusombesha tshintu nealuhuke kûdi ne tshieya.

¹²Bikala muntu muhele, kanuladi tulu ne tshieya tshiandi;

¹³nuhingashe tshieya tshiandi habuela diba, bua yeye alale tulu ne tshilulu tshiandi, anuvudishile disanka; bualu ebu nebuikale buakane kunudi, ku mesu kua Yehowa, Nzambi wenu.

¹⁴Kanukengeshi muntu wakabuela mu mudimu wa difutu, udi muhele ne udi kayi ne bintu, nansha umue wa bana benu nansha muenyi udi ushikama mu buloba buenu ne mu misoko yenu;

¹⁵nubafute difutu diabo buatshia-buatshia diambedi diba kadiyi dianze kubuela; bualu bua bobo badi bahele ne badi bakuma mitshima yabo ku difutu; bobo kabadidi kudi Yehowa bualu buenu, ne bualu ebu kabuikadi bubi kunudi.

¹⁶Batatu kabafuidi bana babo, ne bana kabafuidi batatuʼabo: muntu yonso adifuile bua malu mabi andi.

¹⁷Kanubengi muenyi anyi bana ba nshiya dilumbulula didi diakane; kanuangatshi bilulu bia mukashi wa mu lufuila bu tshieya:

¹⁸nuvuluke ne nuenu nuakadi bahika mu Ejipitu, ne Yehowa, Nzambi wenu, wakanuhikula: bua bualu ebu nakunuelela mukenji eu.

¹⁹Hanuahuola bintu bia mu madimi enu, ne kafulaminyi kadi kanukuata bua kushiya bisumbu bikuabo mu madimi enu, kanuhinganyi bua kubiangata; nebikale bia benyi ne bia bana ba nshiya ne bia bakashi ba mu lufuila; nunku Yehowa, Nzambi wenu, neanuvudishile disanka mu malu onso anudi nuenza ne bianza bienu.

²⁰Hanuakuna matamba a mitshi yenu ya olive bua mamuma ahone, kanuakumi tshiakabidi; neashale a benyi ne a bana ba nshiya ne a bakashi ba mu lufuila.

²¹Hanuahuola tumuma tukese tua mu madimi enu a tumuma, kanutuhuodi tshiakabidi: tumuma netushale tua benyi ne tua bana ba nshiya ne tua bakashi ba mu lufuila.

²²Nuenu nuvuluke ne nuakadi bahika mu buloba bua Ejipitu; bua bualu ebu nakunuelela mukenji eu.