Read tshiluba Dutelonone 25 Bible Online

Dutelonone 25 - tshiluba bible

Dutelonone 25

¹Bikala bantu babidi batandangane, ne haluabo bua kulumbuluishibua, balumbuluishi nebalumbulule tshilumbu tshiabo; ku nyima nebabingishe muntu muimpe ne nebahishe muntu mubi.

²Bikala muntu mubi mukumbane bua kukumibua, hashishe mulumbuluishi neamuladike hanshi, nebamukume ku mpala kuandi; bungi bua mikumu nebuikale bu bubi buandi.

³Badi mua kumukuma mikumu makumi anai, kadi kabahitshi: biahilabo mikumu ei, muanʼenu neikale bu muntu wa hatuhu kunudi.

⁴Kanusuiki nkata ku mishiku ya ngombe udi udiata mponda.

⁵Bikala bana balume ba difu dimue bashikame muaba umue, ne biafua umue wabo kayi mushiye muana mulume, mukashi wa muntu mufue kayi ku dibaka kudi mulume mukuabo; muanʼabo ne mulume wandi neamuangate, alue bu mukashi wandi; neamuenzele bualu buakadiye ne bualu bua kuenza bu muanʼabo.

⁶Hashishe muanʼa bute udi mukashi eu ulela nebamuidike dina dia muanʼabo wakafua; bua dina diandi kadijiminyi mu Isalele.

⁷Bikala muntu kayi musue kuangata mukashi wa muanʼabo, hashishe mukashi wa muanʼabo mulume neaye ku tshibi tshia musoko kudi bakulu, neambe ne, Muanʼabo ne mulume wanyi udi uhidia kulelela muanʼabo wakafua bana mu Isalele, yeye kena mungangate bu mukashi wandi.

⁸Hashishe bakulu ba mu musoko wandi nebamubikile, nebasombe nʼandi; ne himaneye, wamba ne, Tshiena musue kumuangata,

⁹hashishe mukashi wa muanʼabo nealue kudiye ku mesu kua bakulu, neambulule tshisabata ku dikasa diandi, neamutuile lute ku mesu; neamuambile ne, Nebenzele mulume nunku udi uhidia kudiundisha nsubu wa muanʼabo mulume.

¹⁰Nebamuidike dina mu Isalele ne, Nsubu wa udi ne tshisabata tshiandi tshisulula.

¹¹Bikala balume babidi baluangane, ne mukashi wa umue wabo ulualua bua kusungila mulume wandi mu tshianza tshia muntu udi umukuma, udi wolola tshianza tshiandi, udi umukuata ku biaha mesu,

¹²ku nyima nebamukose tshianza tshiandi, kabamuleshi luse nansha.

¹³Kanuikadi ne biamu bibidi bia kuidikisha nʼabi majitu, ne tshinene ne tshikese.

¹⁴Kanuikadi ne bihiminu bibidi mu nsubu yenu, ne tshinene ne tshikese.

¹⁵Nuikale anu ne tshiamu tshimue tshidi tshiakane, ne tshihiminu tshimue tshidi tshiakane; nunku matuku enu neikale a bungi mu buloba budi Yehowa, Nzambi wenu, unuha.

¹⁶Muntu yonso utu wenza malu au, malu au mabi, udi bu tshintu tshibi ku mesu kua Yehowa.

¹⁷Nuvuluke bu muakanuenzela Amaleka mu nshila hanuakaluhuka mu Ejipitu;

¹⁸bu muakasangakeneye nʼenu mu nshila, wakashiha bantu bakashala ku nyima bakadi batekete, hanuakahanga, hanuakamba kufua mu nshila; yeye kakatshina Nzambi.

¹⁹Nunku hafila Yehowa, Nzambi wenu, bantu bonso badi nʼenu lukuna mu bianza bienu, ne hanuaheta dikisha mu buloba budi Yehowa, Nzambi wenu, unuha bua nuenu kubuhiana, hashishe nenujimishe tshivulukidi tshia Amaleka muinshi mua diulu; kanuhu muoyo bua bualu ebu nansha.