Read tshiluba Dutelonone 31 Bible Online

Dutelonone 31 - tshiluba bible

Dutelonone 31

¹Mose wakaya biandi, wakambila Bena Isalele bonso mei â.

²Yeye wakabambila ne, Lelu nakuhita bidimu lukama ne makumi abidi; tshiena mua kuya ne mua kulua kabidi; ne Yehowa wakamana kungambila ne, Wewe kuena usabuka Yadene eu.

³Yehowa, Nzambi wenu, neasabuke ku mpala kuenu; yeye neashihe bisamba abi ku mpala kuenu, nuenu nenubihate; Yoshua neasabuke ku mpala kuenu bu muakamba Yehowa.

⁴Yehowa neabenzele bu muakenzeleye Sihona ne Oga, bakelenge ba Bena Amole, bakashiheye ne buloba buabo.

⁵Yehowa neabafile mu bianza bienu, nuenu ne nubenzele bu mudi mikenji yonso inakanuambila.

⁶Nuikale ne bukole ne mitshima ya dikima, kanubatshinyi, bualu bua Yehowa, Nzambi wenu, yeye mene uyaya nʼenu; yeye kena unuhanga, kena unulekela.

⁷Mose wakabikila Yoshua, wakamuambila ku mesu kua Bena Isalele bonso ne, Wikale ne bukole ne mutshima wa dikima, bualu bua wewe uyaya ne bantu aba mu buloba buakalaya Yehowa batatu babo bua kubahabu; ne wewe neubahianyishe buloba abu.

⁸Yehowa mene uyaya ku mpala kuebe, yeye neikale hebe, kena ukuhanga, kena ukulekela: kutshinyi, kuzakadi.

⁹Mose wakafunda mikenji ei, wakayifila mu bianza bia bakuidi, bana balume ba Lewi, bakadi batuala mushete wa tshihungidi tshia mei a Nzambi, ne kudi bakulu bonso ba mu Isalele.

¹⁰Mose wakabambila ne, Hafika bidimu muanda mutekete, mu tshikondo tshidibo bahingashangana bintu, hadiabo bidia bia disanka dia bitandatanda,

¹¹halua Bena Isalele bonso ku mpala kua Yehowa, Nzambi wenu, mu muaba udiye usungula, hashishe nenubadile Bena Isalele bonso mikenji ei mu matshu abo.

¹²Nusangishe bantu bonso, ne balume ne bakashi ne bana bakese ne benyi badi munkatshi muenu, bua buonso buabo bumue, bayile lungenyi, batshine Yehowa, Nzambi wenu, batumikile mei onso a mikenji ei;

¹³nunku bana babo badi kabayi banze kumanya nebunvue, nebamanye mua kutshina Yehowa, Nzambi wenu, tô matuku onso anudi nushikama mu buloba bunudi nuya dishiya dia Yadene bua kubuhiana.

¹⁴Yehowa wakambila Mose ne, Tangila, dituku dia lufu luebe dikadi ha buihi: bikila Yoshua, ne bubidi buenu nudisangishe mu ntenta wa kusambakena, bua meme mmudimushe. Mose ne Yoshua bakaya, bakadisangisha mu ntenta wa kusambakena.

¹⁵Yehowa wakamueneka mu Ntenta mu difutu: difutu diakimana ku mutu kua tshibi tshia Ntenta.

¹⁶Yehowa wakambila Mose ne, Tangila, wewe neulale tulu ne bankambua bebe; ne bantu aba nebabike, nebalonde malu a masandi a nzambi ya bende ya mu buloba buyayabo, nebandekele, nebashihe tshihungidi tshituakahunga nʼabo.

¹⁷Hashishe tshiji tshikole netshinkuate dituku adi, ne meme nembalekele, nengumushe mesu anyi kudibo ne bobo nebajimishibue; ne matata ne makenga a bungi nealue kudibo; bobo nebambilangane dituku adi ne, Malu â mabi onso kaena alua kutudi bualu bua Nzambi wetu kena munkatshi muetu, anyi?

¹⁸Meme nengumushe mesu anyi kudibo dituku adi bulelela, bua malu mabi akenzabo, hakakudimunabo mitshima yabo bua kutendelela nzambi mikuabo.

¹⁹Katataka wewe ubafundile musambu eu, wayisha Bena Isalele bonso musambu; uteke musambu eu mukana muabo, newikale bu mumanyi wa bualu buanyi kudi Bena Isalele.

²⁰Bualu bua hanakamana kulua nʼabo mu buloba bunakalaya batatuʼabo, budi bûle tente ne mabele ne buitshi, ne hakamanabo kudia, kukuta ne kuvunda, hashishe nebakudimune mitshima yabo bua kutendelela nzambi mikuabo, nebayikuatshile mudimu, nebampetule, nebashihe tshihungidi tshianyi.

²¹Nunku halua matata ne makenga makole kudibo, musambu eu newikale bu mumanyi wa bualu, neudiambe kudibo; bana babo kabahu musambu eu muoyo, bualu bua meme ndi mumanye meji adibo nʼau mu mitshima yabo lelu diambedi tshiyi muanze kulua nʼabo mu buloba bunakabalaya.

²²Nunku Mose wakafunda musambu eu dituku adi, wakauyisha Bena Isalele.

²³Yeye wakadimusha Yoshua, muana wa Nuna, ne, Wikale ne bukole ne mutshima wa dikima; bualu bua wewe neulue ne Bena Isalele mu buloba bunakabalaya; meme nengikale nʼebe.

²⁴Hakashikisha Mose kufunda mei a mikenji ei mu mukanda,

²⁵hashishe Mose wakadimusha Bena Lewi bakadi batuala mushete wa tshihungidi tshia mei a Yehowa ne,

²⁶Nuangate mukanda eu wa mikenji, nûteke ku luseke lua mushete wa tshihungidi tshia mei a Yehowa, Nzambi wenu, newikaleku bu mumanyi wa bualu buanyi.

²⁷Bualu bua meme ndi mumanye kutomboka kuenu ne tshitshu tshienu: monai, hantshidi ne muoyo munkatshi muenu lelu, nuakumana kutombokela Yehowa; nenutambe kutomboka ku nyima kua lufu luanyi!

²⁸Nusangishe bakulu benu bonso ba mu bisamba bienu ne tuhita tuenu kundi, bua meme kubambila mei â onso ku matshu abo, nembikile diulu ne buloba bu bamonyi ba bualu kudibo.

²⁹Bualu bua ndi mumanye ne, Ku nyima kua lufu luanyi nenutambe kudisangisha ne kusesuka mu nshila unakunulesha; malu mabi neanukuate mu matuku atshidi ku mpala; bualu bua nuenu nenuenze malu mabi ku mesu kua Yehowa bua kumufikisha munda bua mudimu wa bianza bienu.

³⁰Mose wakambila Bena Isalele bonso mei a musambu eu mu matshu abo, tô ne hakashikisheye.