Read tshiluba Yone 21 Bible Online

Yone 21 - tshiluba bible

Yone 21

¹Hakashika malu â, Yesu wakamueneka kabidi kudi bayidi bandi ku dishiba dia Tibelia; wakamueneka nunku:

²Simona Petelo, ne Toma udibo babikila ne, Didumo, ne Natanaele wa Kana wa mu Galela, ne bana ba Zebedayo, ne bayidi bandi bakuabo babidi bakadi hohamue.

³Simona Petelo wakambila bakuabo ne, Ndi nya kukuata minyinyi ya mu mai. Bakamuambila ne, Tuetu tuyaya nʼebe. Bakaya, bakabuela mu buatu; butuku abu kabakakuata tshintu.

⁴Kadi hakamba hanshi kutoka, Yesu wakadi muimane ku muelelu wa mai; kadi bayidi kabakamumanya ne, NYesu.

⁵Yesu wakabakonka ne, Bana, nudi ne tshia kudia, anyi? Bakamukudimuna ne, Nasha.

⁶Yeye wakabambila ne, Elai tuhamba ku tshianza tshia balume, nenuhete minyinyi. Bakatula, tshituha tshihi kabakamanya mua kutukoka bualu bua bungi bua minyinyi.

⁷Muyidi, wakadi Yesu musue, wakambila Petelo ne, Mukelenge. Hakunvua Petelo ne, Mukelenge, wakadijingila tshivualu tshiandi bua wakadi mutshivule, wakadiela mu mai.

⁸Kadi banga bayidi bakalua mu buatu bukese, benda bakoka tuhamba tûle tente ne minyinyi, bualu bua ku mpata kuakadi ha buihi, ntanta bu wa metu lukama.

⁹Hakafikabo ku mpata, bakamona makala a kahia akenka ne munyinyi wa mu mai muteka ha kahia ne mutanda wa bidia.

¹⁰Yesu wakabambila ne, Luai no minyinyi mikuabo inuakukuata katataka.

¹¹Simona Petelo wakabuela mu buatu, wakakoka tuhamba ku mpata, tûle tente ne minyinyi minene lukama ne makumi atanu ne isatu; minyinyi yakadi bungi nunku, kadi tuhamba katuakadi tuhandike.

¹²Yesu wakabambila ne, Luai nudie. Kakuakadi muyidi wakadi ne dikima dia kumuebesha ne, Wewe nganyi? Bakadi bamumanye ne, Mukelenge.

¹³Yesu wakalua, wakamema mutanda wa bidia, wakabahau ne munyinyi kabidi.

¹⁴Eu wakadi musangu muisatu wakamueneka Yesu kudi bayidi, hakabikeye ku lufu.

¹⁵Hakashikishabo kudia, Yesu wakakonka Simona Petelo ne, Simona wa Yona, wewe udi mutambe aba bakuabo kunnanga, anyi? Yeye wakamuambila ne, Bulelela, Mukelenge, wewe udi mumanye ne, Ndi mukusue. Yesu wakamuambila ne, Udishe bana banyi ba mikoko.

¹⁶Wakamukonka tshiakabidi ne, Simona wa Yona, udi munnange, anyi? Yeye wakamuambila ne, Bulelela, Mukelenge, wewe udi mumanye ne, Ndi mukusue. Yesu wakamuambila ne, Ulame mikoko yanyi.

¹⁷Wakamukonka tshiakasatu ne, Simona wa Yona, udi munsue, anyi? Mutshima wa Petelo wakanyingalala bua yeye wakamukonka tshiakasatu ne, Udi munsue, anyi? Wakamuambila ne, Mukelenge, wewe udi mumanye malu onso; udi mumanye ne, Ndi mukusue. Yesu wakamuambila ne, Udishe mikoko yanyi.

¹⁸Bulelela, bulelela, ndi nkuambila ne, Hawakadi nsongalume, wakadi udisuika mukaba, wakadi wendakana kuonso kuwakasua; kadi hawakulumpa, wewe newolole bianza biebe, mukuabo neakusuike mukaba, neakutuale kudi kui musue.

¹⁹Yesu wakamba dî edi bua kumumanyisha lufu luatumbisheye nʼalu Nzambi. Hakambeye nunku, wakamuambila ne, Undonde.

²⁰Petelo wakatshinguluka, wakamona muyidi wakadi Yesu munange, ulonda, nguakadi mumueyemene tshianyima mu tshiadi hakadibo badia bidia butuku, nguakamukonka ne, Wakutungila tshitungu nganyi?

²¹Hakamumona Petelo nunku, yeye wakakonka Yesu ne, Mukelenge, ahu muntu eu nenze tshinyi?

²²Yesu wakamuambila ne, Binasua bua ashale ne muoyo tô ne hanalua, mbualu buebe, anyi? Wewe undonde.

²³Dî edi diakatangadika munkatshi mua bana babo ba mu Kilisto ne, Muyidi eu kena ufua; kadi Yesu kakamba ne, Yeye kena ufua; wakamba ne, Binasua bua ashale ne muoyo tô ne hanalua, mbualu buebe, anyi?

²⁴Muyidi eu mene wakamba malu â, wakâfunda; tudi bamanye ne, Dî diandi ndilelela.

²⁵Malu makuabo a bungi adiku kabidi akenza Yesu; biâfundabo onso, ndi ngamba ne, Buloba bujima mene kabuena bukumbana miaba ya kuteka mikanda yafundabo.