Read tshiluba Yone 5 Bible Online

Yone 5 - tshiluba bible

Yone 5

¹Hakashika malu â, disanka dia Bena Yuda diakadiku; Yesu wakaya ku Yelushalema.

²Mu Yelushalema, hehi ne tshibuelelu tshia mikoko, mudi mpokolo wa mai a kuowa, udi Bena Yuda babikila ne, Beteseda, wakadi ne bitanda bitanu.

³Mu bitanda amu muakadi mulale tshisumbu tshia bakadi batekete ne bafofo ne balema ne banyane. [

⁴][4]

⁵Muntu wakadimu ne disama dia matekete bidimu makumi asatu ne muanda mukulu.

⁶Hakamumona Yesu mulale, hakamanyeye ne, Yeye wakadi mu bualu ebu musangu mule, wakamukonka ne, Udi musue kuondahibua, anyi?

⁷Muntu musame wakamuandamuna ne, Mukelenge, havuandululabo mai, tshiena ne muntu wa kumbuesha mu mpokolo; hantshidi nya, munga udi umpita ku mpala.

⁸Yesu wakamuambila ne, Bika, ambula bulalu buebe, endaku.

⁹Muntu wakakoleshibua lukasa, wakambula bulalu, wakenda. Dituku adi diakadi dia Lumingu lua Bayuda.

¹⁰Bena Yuda bakambila wakondahibua ne, Lelu ndituku dia Lumingu, kutuala bulalu buebe kudi kushiha mukenshi.

¹¹Kadi yeye wakabandamuna ne, Wakungondaha wakungambila ne, Ambula bulalu buebe, endaku.

¹²Bakamukonka ne, Nganyi wakukuambila ne, Ambula bulalu buebe, endaku?

¹³Wakondahibua kakamanya wakamukolesha; bualu bua Yesu wakumukaku, tshisumbu tshia bantu tshikala ha muaba au.

¹⁴Hashishe Yesu wakamusangana mu ntempelo, wakamuambila ne, Mona, wakukola; kuenji bualu bubi kabidi, bua dikenga ditambe kadilu kûdi.

¹⁵Muntu au wakumuka, wakambila Bena Yuda ne, Wakankolesha udi Yesu.

¹⁶Bua bualu ebu Bena Yuda bakatatshisha Yesu, bua yeye wakenza malu â dituku dia Lumingu.

¹⁷Kadi Yesu wakabandamuna ne, Tatu wanyi udi ukuata mudimu tô ne katataka, ne meme kabidi ndi ngukuata.

¹⁸Bua bualu ebu Bena Yuda bakatamba kukeba mua kumushihabo, bua yeye wakashiha mukenshi wa Lumingu, ne bua wakubikila Nzambi ne, Ntatu wanyi, udivuisha muomumue ne Nzambi.

¹⁹Yesu wakabakudimuna dî ne, Bulelela, bulelela, ndi nuambila ne, Muana kena mumanye mua kudienzela bualu, utu wenza anu budiye umona Tatu wandi wenza; malu onso adi Tatu wenza Muana utu wênza muomumue.

²⁰Bualu bua Tatu udi musue Muana, udi umulesha malu onso atshidiye wenza; yeye neamuleshe malu a kukema matambe â, bua nuenu kukema.

²¹Bu mudi Tatu ubisha bafue, ubaha muoyo; nunku kabidi Muana udi uha badiye musue muoyo.

²²Tatu kena ulumbuluisha muntu, kadi yeye wakuha Muana bulumbuluishi buonso,

²³bua bantu bonso batumbishe Muana bu mudibo batumbisha Tatu. Udi kai utumbisha Muana kena utumbisha Tatu wakamutuma.

²⁴Bulelela, bulelela, ndi nuambila ne, Unvua dî dianyi, witabusha wakuntuma, udi ne muoyo wa tshiendelele, kena ulua ku tshilumbu, wakumuka mu lufu, wakubuela mu muoyo.

²⁵Bulelela, bulelela, ndi nuambila ne, Diba nedilue, didiku katataka mene, diunvua bafue dî dia Muana wa Nzambi; badi bunvua nebikale ne muoyo.

²⁶Bu mudi Tatu ne muoyo munda muandi, nunku yeye wakaha Muana kabidi bua kuikaleye ne muoyo munda muandi;

²⁷yeye wakamuha bukokeshi bua kulumbuluisha, bualu bua yeye udi muana wa muntu.

²⁸Kanukemi bua bualu ebu; bualu bua diba nedilue diunvua bonso badi mu nkita dî diandi,

²⁹nebajuke; bakenzenza bimpe nebajuke mu dibika dia muoyo, bakenzenza bibi nebajuke mu dibika dia dihila.

³⁰Meme nkayanyi tshiena mumanye mua kuenza bualu; ndi ndumbulula bu mundi ngunvua; ndi ndumbulula biakane, bua tshiena nkeba kuenza bu mundi musue, ndi nkeba kuenza bu mudi wakuntuma musue.

³¹Binadiamba, dî dianyi kadiena dijalama.

³²Udi ungamba nmukuabo; ndi mumanye ne, Budiye ungamba mbulelela.

³³Nuenu nuakatuma bantu kudi Yone, ne yeye wakujadika bualu bulelela ne kuamba kuandi.

³⁴Tshiena ngangata dijadika dia bualu buanyi kudi muntu; kadi ndi ngamba malu â bua nuenu kusungidibua.

³⁵Yeye wakadi muinda utema ukenka; nuenu nuakitabusha bua kusanka mu dinkenka diandi musangu.

³⁶Kadi tshimanyinu tshindi nʼatshi tshidi tshitambe dî dia Yone, bualu bua malu a kukema akumpa Tatu bua meme kuenza, malu antshidi ngenza mene, adi angamba ne, Tatu wakuntuma.

³⁷Tatu wakantuma waku ngamba kabidi. Kanuena banze kunvua dî diandi tshikondo tshimue, kanuena banze kutangila mubidi wandi.

³⁸Kanuena ne dî diandi dishala munda muenu, bualu bua kanuena nuitabusha wakatumeye.

³⁹Nudi nukeba kujingulula malu adi mafunda mu Mukunda wa Nzambi, bua nudi nuelangana meshi ne, Mu malu â tudi ne muoyo wa tshiendelele; malu au kabidi adi angamba;

⁴⁰kanuena basue kulua kundi bua nuenu kuikala ne muoyo.

⁴¹Tshiena nkeba kuangata butumbi kudi bantu.

⁴²Kadi ndi munumanye ne, Kanuena ne luse lua Nzambi munda muenu.

⁴³Nakulua mu dina dia Tatu wanyi, kanuena nungitabusha; biadiluila mukuabo mu diandi dina, nenumuitabushe.

⁴⁴Nuenu, badi batumbishangana, badi kabai bakeba butumbi budi bufuma kudi Nzambi nkayandi, nudi bamanye mua kuitabusha munyi?

⁴⁵Kanuedianganyi meshi ne, Meme nenubande ku mesu kua Tatu; mukuabo udiku, Mose mene, unudi beyemene, yeye neanubande.

⁴⁶Bu nuenu bitabushe Mose, nuakadi kungitabusha meme, bua yeye wakafunda bualu buanyi.

⁴⁷Binuikala kanui nuitabusha malu akafundeye, nenuitabushe mei anyi munyi?