Read tshiluba Bienzedi 15 Bible Online

Bienzedi 15 - tshiluba bible

Bienzedi 15

¹Bantu bakuabo bakadi bafume mu Yudaya bakalua, bakadi bayisha bana betu ba mu Kilisto ne, Binuikala kanui batengula bu mu tshilele tshia Mose, kanuena bamanye mua kusungidibua.

²Hakadi Paulo ne Bânaba nʼabo mpata ne dikonka musangu mule, bana babo ba mu Kilisto bakasungula Paulo ne Bânaba ne bakuabo babo bua kuyabo ku Yelushalema kudi bapostolo ne bakulu bua dikonka edi.

³Bena ekelesia bakabashindikila, bakahitshila mu Foineke ne Samalea, benda bambila bantu bua kukudimuna kua mitshima kua bisamba bia bende; bakatamba kusankisha mitshima ya bana babo bonso ba mu Kilisto.

⁴Hakafikabo ku Yelushalema, bakabitabusha kudi bena ekelesia ne kudi bapostolo ne bakulu; Paulo ne Bânaba bakabambila malu onso akenza nʼabo Nzambi.

⁵Kadi bakuabo ba mu luseke lua Bafalese, bakadi bamane kuitabusha, bakabika bamba ne, Butudi nʼabu mbua kutengula ba bisamba bia bende, ne bua kubambila bua kuenzabo mikenshi ya Mose.

⁶Bapostolo ne bakulu bakadisangisha bua kulondabo bualu ebu,

⁷Hakadibo ne mpata ya bungi, Petelo wakabika, wakabambila ne, Bana betu, nudi bamanye ne, Mu matuku a kai e Nzambi wakasungula munkatshi muenu bua bisamba bia bende biunvue dî dia lumu luimpe mukana muanyi, bitabushe.

⁸Nzambi mumanyi wa mu mitshima, wakabavidila, wakabaha Nyuma Muimpe bu muakutuheye bietu:

⁹kakatahulula hankatshi hetu nʼabo, wakuvua mitshima yabo ku ditabusha.

¹⁰Katataka nudi nutetshila Nzambi munda tshinyi, bua nudi basue kuteka tshikokedi ha nshingu ya bayidi tshiakadi bankambua betu kabai bamanye mua kutshituala ne tuetu kabidi?

¹¹Kadi tuetu tudi tuitabusha ne, Tudi tusungidibua ku ngasa wa Mukelenge Yesu muomumue nʼabo.

¹²Buonso buabo bakahua, bakatelesha muakadi Bânaba ne Paulo bamba bua bimanyinu ne malu a kukema biakenza nʼabo Nzambi munkatshi mua bisamba bia bende.

¹³Hakayabo, Yakobo wakamba ne, Bana betu, teleshai dî dianyi;

¹⁴Simona wakalonda bu muakadianjila Nzambi kumueneka kudi bisamba bia bende bua kusungula munkatshi muabo bantu bua kuikalabo ne dina diandi.

¹⁵Mei a baprofete adi makanangane ne bualu ebu, bu muakafundabo ne,

¹⁶Hashika malu â, nempingane, Nengibake kabidi nsubu wa tshilulu wa Davidi udi muhuke, Nengibake kabidi bituha biandi bidi binyanguke, Nemuimanyike kabidi;

¹⁷Nengenzele nunka bua bantu badi bashale bakebe Mukelenge, Ne bisamba bionso bia bende kabidi badi babikidibua ku dina dianyi;

¹⁸Mukelenge udi Wamba nunku udi umanyisha malu â kale.

¹⁹Bua bualu ebu udi ngamba ne, Katutatshishi ba bisamba bia bende badi bakudimuna mitshima yabo kudi Nzambi;

²⁰kadi tubafundile mukanda bua kutekelabo bintu bidi bibihisha kudi mpingu, ne bua kutekelabo masandi, ne nyama mifiekela mu nshingu ha kuishiha, ne mashi.

²¹Bualu bua Mose kale tô ne katataka udi ne bambi ba malu andi mu nsunagoga ya misoko yonso, badi babala mei andi nunku ku Lumingu ku Lumingu.

²²Hashishe bapostolo ne bakulu ne bena ekelesia bonso bakelangana meshi ne, Mbimpe tusungule ba mu tshisumbu tshietu, tubatume ne Paulo ne Bânaba ku Antiokia; bakatuma nunku Yuda, udi ne dina dikuabo ne, Bâsaba, ne Sila, hakadi bantu banene ba munkatshi mua bana babo ba mu Kilisto.

²³Bakabaha mukanda mufunda nunku ne, Bapostolo ne bana betu badi bakulu badi batumina bana betu ba mu bisamba bia bende mu Antiokia ne mu Sulia ne mu Kilikia muoyo.

²⁴Bualu bua tuakulua lumu ne, Bakuabo ba munkatshi muetu bakuya kunudi, bakunutatshisha ne mei abo, badi bamba kuona mioyo yenu; tuetu katuakubatuma ne mukenshi kunudi;

²⁵hatuakuhunga dî dimue, tuakula meshi ne, Mbimpe tusungule bantu, tubatume kunudi ne bana betu bananga, Bânaba ne Paulo,

²⁶bobo mene bakafila mioyo yabo bualu bua dina dia Mukelenge wetu Yesu Kilisto.

²⁷Nunku tuakutuma Yuda ne Sila, bobo kabidi nebanuambile mei momumue mukana muabo.

²⁸Bualu bua Nyuma Muimpe wakamona, ne tuetu kabidi, ne, Kembimpe bia kunutekela bunga bujitu, anu malu atudi nʼau bualu:

²⁹nulekele bintu bidi bishihela mpingu, nulekele kabidi mashi ne nyama mifiekela mu nshingu ha kuishiha, ne masandi; binualekela malu â, nenuenze bimpe. Nushale ne bukole.

³⁰Nunku hakalayanganabo nʼabo, bakahueka ku Antiokia, hakasangishabo bantu, bakabaha mubanda.

³¹Hakaubalabo, mitshima yabo yakasanka bua disamba diakabasambabo nʼadi.

³²Bualu bua Yuda ne Sila bakadi baprofete, bakambila bantu mei a bungi, bakakolesha mitshima yabo.

³³Hakalelabo kuakua musangu, bana babo ba mu Kilisto bakabahingisha talalâ kudi bakabatuma. [

³⁵Kadi Paulo ne Bânaba bakashala mu Antiokia, bayisha ne bambila bantu dî dia Mukelenge; bakuabo ba bungi bakadi nʼabo kabidi.

³⁶Hakahita matuku makuabo, Paulo wakambila Bânaba ne, Tuhingane bua kutangila bana betu ba mu Kilisto ba mu misoko yonso ituakadi tuambila dî dia Mukelenge, tumone ne badi munyi.

³⁷Bânaba wakasua kuya kabidi ne Yone wakadibo babikila ne, Mâko.

³⁸Kadi Paulo wakelangana meshi ne, Kembimpe bia kuya ne muntu wakumuka watushîa mu Pampulia, kai muye nʼetu ku mudimu.

³⁹Hakadibo ne mpata mikole, nunku bakahanduluka, Bânaba wakangata Mâko, wakasabuka nʼandi ku Kupulio.

⁴⁰Kadi Paulo wakasungula Sila, wakaya, hakamufilabo mu ngasa wa Mukelenge kudi bana babo ba mu Kilisto.

⁴¹Wakahitshila mu Sulia ne Kilikia wenda ukolesha mitshima ya bena ekelesia.