Read tshiluba Bienzedi 18 Bible Online

Bienzedi 18 - tshiluba bible

Bienzedi 18

¹Hakashika malu â, wakumuka mu Atena wakalua ku Kolinto.

²Wakasanganamu Muena Yuda mukuabo, dina diandi Akula, mulela ku luseke lua Ponto, mufume tshituha tshihi ku Italia, ne mukashi wandi Pisikila, bua Kulaudio wakela mukenshi ne, Bena Yuda bonso bumuke mu Lomo. Paulo wakaya kudibo.

³Bualu bua mudimu wandi ne wabo wakadi muomumue, wakadi ushikama nʼabo, bakadi benza mudimu, bua bakadi benji ba nsubu ya bilulu.

⁴Yeye wakakulangana ne bantu mu nsunagoga ku Lumingu ne ku Lumingu lua Bayuda, wakakeba kuitabushisha Bena Yuda ne Bena Gelika.

⁵Hakahueka Sila ne Timote, bafume ku Makedonia, Paulo wakadi wenzeshibua bikole mu kuamba kua dî dia Nzambi, wambila Bena Yuda ne, Yesu udi Kilisto.

⁶Hakamutantamenabo ne hakamuhendabo, yeye wakabanyukuila bilulu, wakabambila ne, Mashi enu ikale ha mitu henu, meme tshiena ne bualu; katataka tô ne tshiendelele nenye kudi bisamba bia bende.

⁷Wakumukaku, wakabuela mu nsubu wa muntu dina diandi Titio Yusto, wakadi biandi mutendeledi wa Nzambi, nsubu wandi wakadi hehi ne nsunagoga.

⁸Kulisipo wakadi ha mutu ha nsunagoga, wakitabusha Mukelenge ne ba mu nsubu wandi bonso; Bena Kolinto ba bungi, hakunvuabo, bakitabusha, bakabatijibua.

⁹Mukelenge wakambila Paulo mu tshikena kumona butuku ne, Kutshinyi; kadi amba, kuhû:

¹⁰bualu bua meme udi nʼebe, kakuena muntu wakulenga tshianza bua kukuenzela bibi; bua meme adi ne bantu ba bungi mu musoko eu.

¹¹Yeye wakashikamaku talala tshidimu tshijima ne ngondo isambombo, uyisha dî dia Nzambi munkatshi muabo.

¹²Hakadi Galio muloho munene mu luseke lua Akaya, Bena Yuda bakabika diatshimue, bakatantamena Paulo, bakalua nʼandi ku tshilumbuluidi,

¹³bakamba ne, Muntu eu udi witabushisha bantu bua kutendelelabo Nzambi ne tshitendeledi tshidi mikenshi ikanda.

¹⁴Hakamba Paulo kubulula mukana, Galio wakambila Bena Yuda ne, Nuenu Bena Yuda, bu bualu ebu buikale bua bubi anyi bua dikamakama, nakadi kumanya mua kunyua dî dienu;

¹⁵kadi bikala malu â makonka a mei ne a mena ne a mikenshi yenu nkayenu, nuenu mene nuditangidileu; tshiena musue kuikala mulumbuludi wa malu â.

¹⁶Yeye wakabihata ha tshilumbuluidi.

¹⁷Buonso buabo babakuata Sosetene, wakadi ha mutu ha nsunagoga, bakamukumina ku mpala kua tshilumbuluidi. Kadi Galio kakabatshuka bua malu â onso.

¹⁸Hakamana Paulo kulala matuku makuabo a bungi ku nyima kua bualu ebu, wakalayangana ne bana babo ba ma Kilisto, wakumuka ne Pisikila ne Akula, wakabanga kusabuka ku Sulia, mumane kubeya nsuki yandi ku Kenekelea, bua yeye wakadi muditshihe.

¹⁹Bakalua ku Efeso, Paulo wakabashîaku; kadi yeye wakabuela mu nsunagoga, wakakusangana ne Bena Yuda.

²⁰Hakamulombabo bua kushaleye nʼabo tshinga tshituha, kakitabusha.

²¹Kadi hakasanganeye nʼabo, hakambeye ne, Nempingane kunudi kabidi biasua Nzambi, wakumuka ne buatu mu Efeso.

²²Hakafikeye ku Kaisalia, wakabanda ka Yelushalema, wakela bena ekelesia muoyo, wakahueka ku Antiokia.

²³Hakashikameyemu musangu, wakumuka, wakahitshila luseke lua Galatia ne lua Fugia ku nyima, ukolesha mitshima ya bayidi bonso.

²⁴Muena Yuda mukuabo wakadiku, dina diandi Apolo, mulela ku Alesandelo, wakadi ne ludimi luhehele, yeye wakalua ku Efeso; wakadi ne bukole bua mu Mukanda wa Nzambi.

²⁵Muntu eu wakadi mulongeshibue bua nshila wa Mukelenge, ne bualu bua mutshima wandi wakadi musankedile, yeye wakadi wamba ne uyisha malu a Yesu bimpe, mumanye anu bua dibatiza dia Yone;

²⁶wakabanga kuamba dî mu nsunagoga ne dikima. Kadi hakunvua Pisikila ne Akula kuamba kuandi, bakaya nʼandi kuabo, bakamujinguluila bua nshila wa Nzambi biakane.

²⁷Hakasueye kuya mu Akaya, bana babo ba mu Kilisto bakakolesha mutshima wandi, bakafundila bayidi mukanda bua kumuitabushabo. Hakafikeye, wakatamba kukuatshisha bantu bakadi bamane kuitabusha bua ngasa wa Nzambi;

²⁸bualu bua wakadi utuisha Bena Yuda bikole ku mesu kua bantu, ubalesha mu Mukanda wa Nzambi ne, Yesu udi Kilisto.