Read tshiluba Bienzedi 24 Bible Online

Bienzedi 24 - tshiluba bible

Bienzedi 24

¹Hakahita matuku atanu, muakuidi munene wa Nzambi, dina diandi Anania, wakahueka ne bakulu bakuabo ne mubakuidi, dina diandi Têtulo, bakabanda Paulo ku mesu kua ngovena.

²Hakabikilabo Paulo, Têtulo wakabanga kumubanda ne, Bualu bua tuetu tudi tusanka bua ditalala ditudi nʼadi bua bualu buebe, ne bua lungenyi luebe batshidi balengesha malu mabi adi mu tshisamba etshi,

³tudi tuitabusha bualu ebu mu malu onso ne mu miaba yonso, ne disakidila dionso, mukelenge wa butumbi Felika.

⁴Bua meme tshikuhumbishi musangu mule, ndi nkutendekena bua wewe kutelesha mei makese atudi nʼau bua lutulu luebe.

⁵Tuakusangana muntu eu mutatshishi wa bantu, ne mutomboshi wa Bena Yuda bonso ba ha buloba, udi biandi tshilobo tshia tshisumbu tshia Bena Nazaleta;

⁶yeye wakakeba kuona ntempelo, buakamukuata; [

⁸hawamukonka nkayebe, nêumanye mua kujingulula malu â onso atudi tumubanda.

⁹Bena Yuda kabidi bakamubanda, bamba ne, Malu â adi malelela.

¹⁰Hakamana ngovena kumushukuila mutu bua kuakuleye, Paulo wakandamuna ne, Bualu bua ndi mumanye ne, Wewe wakamana kuikala mulumbuludi wa tshisamba etshi bidimu bia bungi, ndi ndividila ne mutshima musanke;

¹¹bua wewe udi mua kujingulula ne, Matuku kêna manze kuhita dikumi ne abidi hanakabanda ku Yelushalema bua kutendelela Nzambi;

¹²kabakansangana mu ntempelo ngela mpata ne muntu mukuabo anyi ntombosha bantu, nasha mu nsunagoga, nasha mu musoko.

¹³Kabena bamanye mua kushikika ku mesu kuebe malu adibo bambanda katataka.

¹⁴Kadi ndi ntonda kûdi ne, Ntu ngakuatshila Nzambi wa bankambua betu mudimu mu Nshila udibo babikila ne, Ngua batahuluki, ndi ngitabusha malu onso adi mu mikenshi ya Nzambi ne akafunda baprofete;

¹⁵ndi ne ditekemena kudi Nzambi didi bantu aba bitabusha kabidi ne, Dibika dia bafue nedikaleku, ne dia bakane ne dia babi.

¹⁶Bua bualu ebu ndi ndienzesha matuku onso bua kuikala bianyi ne mutshima udi kawi ne tshilema kudi Nzambi ne kudi bantu.

¹⁷Hakahita binga bidimu, nakalua ne bintu bia luse bua kubiha tshisamba tshianyi, ne bia kufila kudi Nzambi.

¹⁸Hanakadi ngenza nunku, bakansangana mumane kulengeshibua mu ntempelo, tshi ne tshisumbu tshia bantu, tshi ne diyoyo; kadi Bena Yuda ba mu Asia bakadimu;

¹⁹bu bobo bikale nʼanyi tshilumbu, bakadi kulua ku mesu kuebe ne kumbanda.

²⁰Bantu aba mene kabidi bambe bualu bubi buakansanganabo nʼabu hanakimana ku mpala kua balumbuludi,

²¹anu dî edi dimue dinakela hanakimana munkatshi muabo ne, Badi bandumbuluisha ku mesu kuenu lelu bualu bua dibika dia bafue.

²²Kadi Felika, wakadi mumanye bualu bua Nshila bimpe, wakabalaya ne, Hahueka kamanda Lusia, nendonde bualu buenu bimpe.

²³Yeye wakambila kapitene bua kumutumeye ne bila kumulesheye luse ne bua kahidishi balunda bandi bua kuluabo kumukuatshisha.

²⁴Hakahita matuku, Felika wakalua ne mukashi wandi Dusila, wakadi biandi Muena Yuda, wakabikila Paulo, wakunvua dî diandi bualu bua ditabusha dia mu Kilisto Yesu.

²⁵Hakadiye wakulangana abo bualu bua buakane, ne bua didikanda, ne bua tshilumbuluidi tshilualua, Felika wakatshina bikole, wakamba ne, Ya biebe katataka; hanaheta tshikondo tshiakane, nenkubikile kundi.

²⁶Yeye wakadi utekemena ne, Paulo neampe biuma. Ebu mbualu buakadiye numbikidila misangu ne misangu bua kuakula nʼandi.

²⁷Kadi hakahita bidimu bibidi, Pokio Festo wakahingana ha muaba wa Felika; kadi bualu bua wakasua kuikala ne diakalengele kudi Bena Yuda, Felika wakashia Paulo mu lukanu.