Read tshiluba Bienzedi 9 Bible Online

Bienzedi 9 - tshiluba bible

Bienzedi 9

¹Shaula wakatshidi ufunyina bayidi ba Mukelenge bua kubashiheye, wakaya kudi muakuidi munene.

²Wakamulomba mikanda ya kuya nʼai mu nsunagoga ya mu Damaseke bua kusuika basanganeye mu Nshila eu wa Nzambi, nasha balume nasha bakashi, ne bua kulueye nʼabo ku Yelushalema.

³Hakadiye uya mu nshila, Wakafika hehi ne Damaseke, munya mukole wa mu diulu wakamutemena lukasa;

⁴wakahona hanshi, wakunvua dî dimuambila ne, Shaula, Shaula, udi unkengeshila meme tshinyi?

⁵Yeye wakakonka ne, Mukelenge, wewe udi nganyi? Wakamukudimuna ne, Ndi bianyi Yesu ûdi ukengesha;

⁶kadi bika, ubuele mu musoko, nebakuambile bualu bûdi nʼabu mbua kuenza.

⁷Bakadi benda nʼandi bakimana bahue; bakuama dî, kadi kabakamona muntu.

⁸Shaula wakabika hanshi; hakabululuka mesu andi, kakadi utangila tshintu; bakamukuata ku tshianza, bakamulombola tô ne ku Damaseke.

⁹Yeye wakadi kai umona tô matuku asatu, kakadia, kakanua.

¹⁰Mu Damaseke muakadi muyidi mukuabo, dina diandi Anania; Mukelenge wakamuambila mu tshilota ne, Anania. Yeye wakitaba ne, Ndiku, Mukelenge.

¹¹Mukelenge wakamuambila ne, Bika biebe, uye ku nshila wa musoko udibo babikila ne, Mululame, ku nsubu wa Yuda, ukonkeku muntu, dina diandi Shaula, udi biandi Muena Tâso, bua tangila, yeye udi utendelela Nzambi;

¹²yeye kabidi wakamona muntu, dina diandi Anania, ubuela kudiye ma tshikena kumona, umulenga tshianza bua kutabaleye.

¹³Kadi Anania wakandamuna ne, Mukelenge, nakunvua kudi bantu ba bungi lumu lua muntu eu, ne bu mudi malu mabi a bungi akenzeleye basanto bebe ba mu Yelushalema;

¹⁴kunu kabidi, udi ne bukole buakuangateye kudi bakuidi banene bua kusuikeye bonso badi batendelela dina diebe.

¹⁵Kadi Mukelenge wakamuambila ne, Ya biebe, bualu bua yeye udi bu luhanza lunakasungula bua kutuala dina dianyi ku mesu kua bisamba bia bende, ne kua banfumu, ne kua bana ba Isalele;

¹⁶bualu bua neamuleshe bungi bua malu adiye ne bua kukengela bua dina dianyi.

¹⁷Anania wakaya biandi, wakabuela mu nsubu, wakamulenga tshianza, wakamuambila ne, Muanʼetu Shaula, Mukelenge Yesu mene wakumueneka kûdi hawakadi ulua mu nshila, wakuntuma bua wewe kutabala ne bua wewe kûla tente ne Nyuma Muimpe.

¹⁸Bintu bu bilamulamu biakalamuka ku mesu andi lubilu, wakamona; wakabika, bakamubatiza.

¹⁹Wakadia biandi, wakakankamana. Wakashala ne bayidi ba mu Damaseke matuku.

²⁰Ha diba adi mene wakabanga kuambila bantu bualu bua Yesu mu nsunagoga ne, Yeye udi Muana wa Nzambi.

²¹Bonso bakunvua dî diandi bakadi bakema, bakabanga kukonka ne, Eu kanyeye wakabutula bakadi batendelela dina edi mu Yelushalema, anyi? Yeye wakadi muluile bualu ebu kunoko bua kuyeye nʼabo basuika ku mesu kua bakuidi banene.

²²Shaula wakadiundadiunda mu bukole, wakadi utshiudisha Bena Yuda bakadi mu Damaseke, wakabaluisha ne, Eu udi Kilisto.

²³Hakahita matuku a bungi, Bena Yuda bakasangisha dî diabo bua kumushiha;

²⁴kadi Shaula wakamanya tshifufu tshiabo. Bakadi batentekela ku bibi bia musoko butuku ne munya bua kumushihabo:

²⁵kadi bayidi bandi bakamuangata butuku, bakamutuluila ha disoso dia lumbu, bamuhuekesha mu tshisaka.

²⁶Hakayeye ku Yelushalema, wakasua kulamata kudi bayidi; kadi bobo bakamutshina, kabakitabusha ne, Udi muyidi.

²⁷Kadi Bânaba wakamuangata, wakaya nʼandi kudi bapostolo, wakabambila bu mu akamoneye Mukelenge mu nshila, ne bu muakakula Mukelenge nʼandi ne bu muakajukuileye bantu dî mu dina dia Yesu mu Damaseke.

²⁸Wakadi mu Yelushalema, wakadi ubuela nʼabo, uluhuka nʼabo,

²⁹wakadi ubajukuila dî mu dina dia Mukelenge; wakadi wakula ne Bena Yuda bakadi bakula muaku wa Bena Gelika, wakadi welangana nʼabo mpata; kadi bakadi bakeba kumushiha.

³⁰Hakamanya bana babo ba mu Kilisto bualu ebu, bakalua nʼandi ku Kaisalia, bakamutuma ku Tâso.

³¹Nunku bena ekelesia ba mu Yudaya yonso ne ba mu Galela ne ba mu Samalea bakadi ne ditalala, bakadi badiunda mu bualu bua Nzambi; bakadi benda mu dishina dia Mukelenge ne mu disamba dia Nyuma Muimpe; bakadi bavulangana ba bungi.

³²Hakadi Petelo wendakana mu nseke yonso, wakahueka kudi basanto bakadi ku Luda.

³³Wakasanganaku muntu, dina diandi Ainea, wakadi mulale ha bulalu buandi bidimu muanda mukulu, bua wakadi ne disama dia kaneke.

³⁴Petelo wakamuambila ne, Ainea, Yesu Kilisto udi ukukolesha; bika, udilongoluele bulalu buebe. Yeye wakabika lubilu.

³⁵Bonso ba mu Luda ne ba mu Shalona bakamumona, bakakudimuna mitshima yabo kudi Mukelenge.

³⁶Mu Yopa muakadi muyidi mukashi, dina diandi Tabita, kukudimuna mu muaku wa Bena Gelika ne, Dôka. Mukashi eu wakadi ne midimu mimpe ya bungi ne luse biakenzelenzeleye bantu,

³⁷Matuku au disama diakamukuata, wakafua. Hakoweshabo tshitalu tshiandi, bakatshiteka mu nsubu wa ha mutu.

³⁸Luda wakadi ha buihi ne Yopa; hakunvua bayidi ne, Petelo udi eku, bakamutumina bantu babidi bamusengelela ne, Kushanguluki bua kulua kutudi.

³⁹Petelo wakabika, wakaya nʼabo. Hakalueye, bakaya nʼandi mu nsubu wa ha mutu. Bakashi bonso ba mu lufuila bakadi bimane ha buihi nʼandi, badila, baleshangana mitelu ne bivualu biakatela Dôka hakadiye nʼabo.

⁴⁰Kadi Petelo wakabumusha buonso buabo, wakatua binu hanshi, wakatendelela Nzambi; wakatshinguluka kudi tshitalu, wakamba ne, Tabita, bika. Mukashi wakabulula mesu; hakamoneye Petelo, wakashikama.

⁴¹Petelo wakamukuata ne tshianza, wakamubisha. Hakabikileye basanto ne bakashi ba mu lufuila, wakabalesheye ne muoyo.

⁴²Bualu ebu buakamanyibua mu musoko wonso wa Yopa, ba bungi bakitabusha Mukelenge.

⁴³Yeye wakalala matuku a bungi mu Yopa mu nsubu wa mukuonyi wa biseba, dina diandi Simona.