Read tshiluba 1 Kolinto 16 Bible Online

1 Kolinto 16 - tshiluba bible

1 Kolinto 16

¹Bualu bua disangisha dia bintu bia kufila kudi basanto, bu munakela di kudi ekelesia wa mu Galatia, enzai bienu muomumue kabidi.

²Ku dituku dia kumudilu dia Lumingu ne Lumingu, muntu ne muntu wa munkatshi muenu adibutshile bintu, bu muakabiheteye, bua kakuikadi masangisha a bintu hanalua.

³Ne hanafika, nentume bantu banuakajadika ne mikanda yenu, bua kuyabo ne bintu bienu bia luse ku Yelushalema;

⁴ne hikala bualu bunkumbana bua meme kuya kabidi, bobo nebaye nʼanyi.

⁵Nendue kunudi hanahitshila mu Makedonia; bualu bua nempitshile mu Makedonia;

⁶kadi bumue nenshikame nʼenu musangu, anyi tshidimu tshia mashika tshijima mene, bua nuenu kuntuma ku luendu kunaya.

⁷Bua tshiena musue kunutangila katataka mu dihita dianyi dia mu nshila, bua ndi ntekemena bua kushala nʼenu musangu, bitabusha Mukelenge.

⁸Kadi nenshale ku Efeso tô ne ku dituku dia Pentekoste;

⁹bua bakumana kungunzuluila tshibi tshinene ne tshia kuenza mudimu mukole, ne bahumbishi ba bungi badiku.

¹⁰Bialua Timote kunudi, nuamanya bua yeye kuikala nʼenu kai ne ditshina, bualu bua yeye udi wenzela Mukelenge mudimu bu mundi ngenza;

¹¹nunku muntu kamuhetudi nasha. Kadi numutume ku luendu luandi talala, bua yeye alue kundi; bualu bua meme ndi mutekemena ne bana betu bakuabo ba mu Kilisto.

¹²Bualu bua Apolo, muanʼetu wa mu Kilisto, nakamusengelela tô bua yeye alue kunudi ne bana betu bakuabo ba mu Kilisto; ne yeye kakasua kulua katataka, nasha kakese; kadi yeye nealue kunudi haheteye tshikondo.

¹³Nutabale, nutantamane mu ditabusha, nuikale balume mene, nukuatshibue bikole.

¹⁴Malu enu onso enjibue mu luse.

¹⁵Bana betu, ndi nusengelela (nudi bamanye ba mu nsubu wa Stefana ne badi bu mamuma a kukuama diambedi mu Akaya, ne bakadifila bua kukuatshila basanto mudimu)

¹⁶bua nuenu nuditeke munshi mua bantu ba nunku, ne munshi mua muntu yonso udi ukuatsihahangana nʼetu ne udi wenza mudimu wa Nzambi.

¹⁷Nakasanka kabidi bua difika dia Stefana ne Fôtunato ne Akaiko; bualu bua bobo bakakumbasha malu anuakahanga.

¹⁸Bualu bua bobo bakakankamisha nyuma wanyi ne nyuma yenu kabidi; nunku nuitabushe bantu ba nunku.

¹⁹Bena ekelesia ba mu Asia badi banutumina muoyo. Akula ne Pisikila ne bena ekelesia ba mu nsubu wabo badi banutumina muoyo wa bungi mu Mukelenge.

²⁰Bana betu bonso ba mu Kilisto badi banutumina muoyo. Nuelangane muoyo ne dituangana dia mishiku dia tshijila.

²¹Meme Paulo, udi nutumina muoyo, mufunde ne tshianza tshianyi.

²²Bikala muntu kai musue Mukelenge, edibue biandi mulau. Mukelenge alue biandi.

²³Ngasa wa Mukelenge Yesu Kilisto ikale nʼenu.

²⁴Dinanga dianyi dikale ne buonso buenu mu Kilisto Yesu. Amen.