Read tshiluba Galatia 5 Bible Online

Galatia 5 - tshiluba bible

Galatia 5

¹Kilisto wakatuhikula bua tuetu tuikale ne budishikaminyi; nunku nudijadike, kanudibueshi munshi mua tshikokedi tshia buhika kabidi.

²Monai, meme Paulo ndi nuambila ne, Binuitabusha ditengula, Kilisto kena unukuatshisha.

³Ndi manyisha muntu yonso tshiakabidi udi witabusha ditengula ne yeye udi muena dibanza bua kuenzeye mikenshi yonso nkonkonko.

⁴Nudi batahuluke kudi Kilisto, nuenu badi bakeba kudibingisha ku mikenshi; nuakumuka mu ngasa,

⁵Tuetu, bualu bua Nyuma udi utukuatshisha, ku ditabusha tudi tuindila buakane butudi tutekemena,

⁶Bualu bua mu Kilisto Yesu, bikala muntu mutengula anyi bikaleye kai mutengula, kakuena bualu, kadi anu ditabusha didi dienza malu mu luse.

⁷Nuakadi nuenda bimpe; wakanuhumbisha nganyi bua nuenu kanutumikidi bualu bulelela?

⁸Meshi â kakafuma kudi Nzambi wakanubikila.

⁹Luevene lukese ludi lutuntumusha mutanda mujima.

¹⁰Meme ndi ne ditekemena edi kunudi mu Mukelenge ne, Kanuena nuikala ne meshi makuabo; kadi udi unutatshisha neadituadile dihila diandi, ne udi nganyi ne nganyi.

¹¹Kadi meme, bana betu, bingikala ntshidi nuambila bualu bua ditengula, ntshidi nkengeshibua bua tshinyi? Nunku dilenduisha dia mutshi mutshiamakane diakumushibua.

¹²Nakadi kusua ne badi banutombuesha baditungule kabidi.

¹³Bualu bua nuenu, bana betu, nuakabikidibua bua budishikaminyi; kadi nudimuke ne budishikaminyi buenu kabulu tshia kusankisha nʼatshi mubidi, kadi bualu bua dinanga dienu nukuatshilangane mudimu.

¹⁴Bualu bua mikenshi yonso idi misangisha mu dî dimue, ndî edi ne, Sua mukuenu bu mûdi mudisue.

¹⁵Kadi binuasumangana, binuadiangana, nudimuke ne kanubutudianganyi.

¹⁶Ndi nuambila ne, Endai mu Nyuma Muimpe, nunku kanuena nulonda lukuka lua mubidi.

¹⁷Bualu bua dijinga dia malu a mubidi didi difuilangana ne dijinga dia malu a Nyuma, ne dijinga dia malu a Nyuma didi difuilangana ne dijinga dia malu a mubidi; bua malu â adi mimanyinangane, bua nuenu kanuenji malu anudi basue kuenza.

¹⁸Kadi binuikala balombodibua kudi Nyuma, kanuena munshi mua mikenshi.

¹⁹Malu mabi adi mubidi wenza adi amueneka ne, Tshiendenda tshia malunda mabi, meshi mabi, masandi,

²⁰ditendelela dia mpingu, kubaka kua manga, lukuna, kutandangana, mukau, tshishi, kutahuluka, mpata, diyoyo,

²¹mutshiaudi, bukuatshiki bua maluvu, manaya a bundu ne malu â onso; edi ndianjila kunudimusha bu munakamana kunudimusha diambedi ne, Bantu batu benza malu â kabena bahiana bukelenge bua Nzambi.

²²Kadi mamuma a Nyuma adi dinanga, disanka, ditalala, lutulu, luse, buimpe, bunanukidi bua lulamatu,

²³kudihuekesha, kudikanda; kakuena mukandu ku malu â.

²⁴Badi mu Kilisto Yesu bakamana kushiha mubidi ne milou yau ne nkuka yau ku mutshi mutshiamakane.

²⁵Bituikala ne muoyo bua Nyuma, tuende bietu bua Nyuma kabidi.

²⁶Tulekele kuditumbishatumbisha hatuhu ne kufikishangana munda ne kuvuishangana mukau.