Read tshiluba Filipoi 1 Bible Online

Filipoi 1 - tshiluba bible

Filipoi 1

¹Paulo ne Timote, bahika ba Kilisto Yesu, kudi basanto bonso ba mu Kilisto Yesu badi ku Filipoi, ne bakulu batangidi[1] ne bulami;

²ngasa kunudi ne ditalala bia kudi Nzambi Tatu wetu ne kudi Mukelenge Yesu Kilisto.

³Ndi nsakidila Nzambi wanyi bua dinuvuluka dianyi dionso;

⁴ntu nganulombela Nzambi ne disanka misangu yonso mu disengelela dianyi dionso bua bualu buenu

⁵bualu bua buobumue buenu nʼanyi mu kutangalasha kua lumu luimpe ku dituku dia kumudilu dinuakalunvua tô ne katataka.

⁶Ndi mumanye bualu ebu mene ne, Yeye nguakabanga mudimu muimpe munda muenu neaushikishe tô ne halua dituku dia Yesu Kilisto;

⁷bu mudibi bimpe bua meme kuikala ne meshi â munda muanyi bua bualu buenu, bualu bua ndi nʼenu mu mutshima wanyi; bualu bua mu nkanu yanyi ne mu kuvidila ne mu kujadika kua lumu luimpe, buonso buenu nudi bangatshi nʼanyi ba ngasa.

⁸Nzambi udi mumanyi wanyi bu mundi nujinga ne dinanga didi munda mua Kilisto Yesu.

⁹Ndi ndomba bualu ebu ne, Luse luenu lutambe kudiundadiunda mu dimanya ne mu dijingulula dia malu onso;

¹⁰bua nuenu mimanye mua kujadika malu adi makane; ne bua nuenu nuikale ne mitshima mitoke, kanui balenduishi ba bakuabo, tô ne halua dituku dia Kilisto;

¹¹ne bua nuenu nûshibue tente ne mamuma a buakane adi afuma kudi Yesu Kilisto bua butumbi ne kutumbishibua bia Nzambi.

¹²Bana betu ba mu Kilisto, ndi musue nuenu mimanye ne, Malu akunkuata akuandamuka bua kudiundisha lumu luimpe;

¹³nunku nkanu yanyi bua Kilisto yakamanyibua munkatshi mua masalayi onso a mu nsubu wa lukanu ne munkatshi mua bantu bonso bakuabo kabidi.

¹⁴Ne batambe bungi ba munkatshi mua bana betu ba mu Mukelenge bakakolesha mitshima yabo bualu bua nkanu yanyi, badi bamba dî dia Nzambi ne dikima ditambe, kabai batshina.

¹⁵Bulelela, bakuabo badi bamba Kilisto bualu bua mukau ne kutandangana; ne bakuabo kabidi badi bamuamba bualu bua disanka dimpe;

¹⁶aba badi bamuamba bua luse, bamanye ne ndi mutekibue bua kuvidia kua lumu luimpe;

¹⁷kadi bakuabo badi bamba Kilisto bua ditahuluka, kabai ne mitshima mitoke, bela meshi bua kunjudila makenga mu nkanu yanyi.

¹⁸Nunku ntshinyi? Anu bualu ebu ne, Mu tshiambilu tshionso, bikalatshi mu lubombo anyi mu bushua, Kilisto udi wambibua; ne mu bualu ebu ndi nsanka, E, bulelela, nensankemu kabidi.

¹⁹Bua ndi mumanye ne bualu ebu nebuandamuke bu luhandu luanyi bualu bua disengelela dienu ne bua dikumbasha dia Nyuma wa Yesu Kilisto.

²⁰Mbu mudi dialamina dianyi dikole ne ditekemena dianyi ne, tshiena nfuishibua bundu nasha mu bualu bumue; kadi bu munakamana kuenza misangu yonso ne dikima dionso, nunku katataka Kilisto neatumbishibue mu mubidi wanyi, nasha buikala ku muoyo Bau, nasha buikala ku lufu luau.

²¹Bualu bua kudi meme eu kuikala ne muoyo nKilisto, ne kufua kudi kuhita mushinga muimpe.

²²Bingikala ne bualu bua kuikala ne muoyo mu mubidi,—ne bikala bualu ebu mamuma a mudimu wanyi, tshiena mumanye bualu bunasungula.

²³Kadi adi mujikila hankatshi ha malu â abidi: ndi njinga bua kumuka hanu bua kuikala ne Kilisto; bua bualu ebu budi butamba buimpe;

²⁴kadi kushala mu mubidi mbualu bunudi nutamba kukengela.

²⁵Bualu bua ndi ngitabushishibua bualu ebu, ndi mumanye ne nenshaleku mu mubidi, E, bulelela, nenshale nʼenu bonso bua kudiunda kuenu ne kusanka kuenu bia mu ditabusha;

²⁶bua ditumbisha dienu dikumbane mu Kilisto Yesu mu bualu buanyi bua dikala dianyi nʼenu tshiakabidi.

²⁷Anu bualu ebu, bikadilu bienu bikale biakanangane ne lumu luimpe lua Kilisto; bua binalua kunumona anyi bingikala kukuabo, ngunvue bianyi lumu lua malu enu ne, Badi bajalama mu nyuma tunue, ne badi batshinta hohamue ne mutshima umue bua ditabusha dia lumu luimpe,

²⁸ne kabena batshinyishibua nasha ku bualu bumue kudi bena lukuna. Bualu ebu budi tshileshilu tshia dibutuka diabo, kadi ntshia luhandu kunudi, ne luolu ludi lufuma kudi Nzambi;

²⁹bualu bua nuakahebua ngasa bua bualu bua Kilisto, kena anu bua kumuitabusha, kadi bua kukenga bua bualu buandi kabidi;

³⁰nudi ne diluangana diodiumue dinuakatangila munda muanyi, ne dinudi nunyua katataka ne didi munda muanyi.