Read tshiluba 1 Tesalonike 3 Bible Online

1 Tesalonike 3 - tshiluba bible

1 Tesalonike 3

¹Nunku hatuakadi katui mua kudikanda kabidi, Nakamona ne, Mbimpe batushîe ku nyima ha nkayetu ku Atena;

²ne Nakatuma Timote, muanʼetu wa ma Kilisto ne muenu mudimu wa Nzambi mu lumu luimpe lua Kilisto, bua kunujadikeye ne bua kunusambeye mu bualu bua ditabusha dienu;

³bua muntu katekeshibu mu makenga â; bua nuenu nkayenu nudi bamanye ne Ndi tutekibua ku makenga â.

⁴Bulelela, hatuakadi nʼenu, tuakadianjila kunuambila ne, Tudi tuamba kuikala ne makenga; mbu muakaluau, ne nudi bamanye bualu ebu.

⁵Bua muanda eu meme kabidi, hanakadi tshi mua kudikanda, nakatuma Timote bua meme kumanya mudi ditabusha dienu; bua bumue muteyi wakanuteya, ne mudimu wetu mukole wakalua hatuhu.

⁶Kadi mpindiu hakalua Timote kutudi mufume kunudi, ne hakatuambileye lumu lutusankisha lua ditabusha dienu ne lua dinanga dienu, ne hakatuambileye ne nudi ne dituvuluka dimpe misangu yonso, ne nudi nujinga bua kutumona, bu mutudi tujinga bua kunumona nuenu kabidi;

⁷bua bualu ebu, bana betu, tuakasambibua bua bualu buenu mu makenga etu onso ne mu ntatu yetu bualu bua ditabusha dienu;

⁸bualu bua katataka tudi ne muoyo, binuashala bajalame mu Mukelenge.

⁹Bua tudi bamanye mua kuhingishila Nzambi kabidi disakidila kai bua bualu buenu, bua disanka dionso ditudi tusanka nʼadi bua bualu buenu ku mpala kua Nzambi wetu?

¹⁰Butuku ne munya tudi tutamba kulomba Nzambi bikole bua tuetu kunumona ku mesu, ne bua tuetu kukumbasha malu anudi nuhanga kuikala nʼau mu ditabusha dienu.

¹¹Nzambi muine udi kabidi Tatu wetu, ne Mukelenge wetu Yesu, atulongoluele nshila wetu wa kufika kunudi;

¹²ne Mukelenge anudiundishe ne anukumbashe mu dinanga dinudi nʼadi munkatshi muenu muntu ne muntu, ne kudi bantu bonso, bu mutudi nʼadi kabidi kunudi;

¹³bua yeye ajadike mitshima yenu kayi ne bualu mu malu a tshijila ku mpala kua Nzambi udi kabidi Tatu wetu, ku dilua dia Mukelenge wetu Yesu Kilisto ne basanto bandi bonso.