Read tshiluba Yoshua 13 Bible Online

Yoshua 13 - tshiluba bible

Yoshua 13

¹Yoshua wakadi muntu mununu ne wa bidimu bikumbane; Yehowa wakamuambila ne, Wewe udi muntu mununu ne wa bidimu bikumbane, ne buloba bunene butshidi bushala bua nuenu kubuangata.

²Ebu mbuloba butshidi bushala: nseke yonso ya Bena Peleshete, ne ya Bena Geshû bonso;

³ku Shihô udi ku mpala kua Ejipitu tô ne ku mukalu wa Ekelona ku luseke lua nôde ludi bibadibue bu lua Bena Kanâna; bakelenge batanu ba Bena Peleshete; Bena Gaza, Bena Ashedodo, Bena Ashakalola, Bena Giti, ne Bena Ekelona; ne Bena Awa kabidi,

⁴ku luseke lua Sude; buloba buonso bua Bena Kanâna, ne Meala udi wa Bena Sidona, tô ne ku Afeke ku mukalu wa Bena Amole;

⁵buloba bua Bena Gebala ne Lebanona mujima kudi kuhatukila diba, ku Bâla-gada udi kuinshi kua mukuna wa Hêmona tô ne ku mukalu wa Hamata;

⁶bantu bonso badi bashikama ku mikuna ya Lebanona tô ne ku Miselefota-mayima ne kudi Bena Sidona bonso; meme nembihate ku mesu kua Bena Isalele; wewe wanji kubuabanyina Bena Isalele ne nshobo bu buhianyi buabo bu munakakuambila.

⁷Nunku wewe wabanyina bisamba tshitema ne tshituha tshia tshisamba tshia Manashe buloba ebu bu buhianyi buabo.

⁸Bena Lubena ne Bena Gada ne tshituha tshikuabo tshia Bena Manashe bakamana kuangata buhianyi buabo buakabahabo kudi Mose dishiya dia Yadene ku esete, bu muakabaha Mose, muntu wa Yehowa:

⁹ku Aloê udi ku muelelu wa tshibanda tshia Ânona, ne musoko udi munkatshi mua tshibanda, ne mpata mujima wa Medeba tô ne ku Dibona;

¹⁰ne misoko yonso ya Sihona, mukelenge wa Bena Amole wakadi mukokeshe mu Heshebona tô ne ku mukalu wa Bena Amona;

¹¹ne Gilada ne mukalu wa Bena Geshû ne Bena Mâka ne mukuna wonso wa Hêmona, ne buloba buonso bua Bashana tô ne ku Saleka;

¹²bukelenge buonso bua Oga bua mu Bashana, wakadi mukokeshe bantu mu Ashetalota ne mu Edelei (wakadi wa bakadi bashala ba Bena Lefa); bualu bua Mose wakataha bantu aba, wakabihata.

¹³Kadi Bena Isalele kabakihata Bena Geshû ne Bena Mâka; kadi Bena Geshû ne Bena Mâka badi bashikama munkatshi mua Bena Isalele tô ne ku dituku edi.

¹⁴Yeye kakaha tshisamba tshia Lewi buhianyi nansha; milambu idibo boshila Yehowa, Nzambi wa Isalele, ha kahia, mbuhianyi buabo, bu muakabambileye.

¹⁵Mose wakaha tshisamba tshia Lubena buhianyi bu bungi bua meku abo.

¹⁶Mukalu wabo wakadi ku Aloê udi ku muelelu wa tshibanda tshia Ânona ne musoko udi munkatshi mua tshibanda ne mpata mujima wa Medeba;

¹⁷Heshebona ne misoko yonso idi mu mpata; Dibona ne Bamota-bâla ne Bete-bâla-meona,

¹⁸ne Yahasa ne Kedemota ne Mefâta,

¹⁹Kiyatayima ne Sibema ne Selete-shaha udi munkatshi mua tshibanda,

²⁰ne Bete-peô, ne tukuna tua Pisega, ne Bete-yeshimoto,

²¹ne misoko yonso ya mu mpata ne bukelenge buonso bua Sihona, mukelenge wa Bena Amole, wakadi mukokeshe mu Heshebona, ne bakelenge ba Midiyana, Ewe ne Lekema, ne Sû ne Hula ne Leba, bana ba Sihona bakadi bashikama mu buloba bakashihabo kudi Mose.

²²Belâma kabidi, muana wa Beo, mutempi wa mbuku, Bena Isalele bakamushiha ne muele wa nvita munkatshi mua bantu bakuabo bakashihabo.

²³Mukalu wa Bena Lubena wakadi musulu wa Yadene ne mukalu wau. Ebu mbuhianyi bua Bena Lubena ku meku abo, ne bimenga ne misoko yabi.

²⁴Mose wakaha tshisamba tshia Bena Gada buhianyi bu bungi bua meku abo.

²⁵Mukalu wabo wakadi ku Yazê ne misoko yonso ya Gilada ne tshituha tshia buloba bua Bena Amona tô ne ku Aloe udi ku mpala kua Laba;

²⁶ne ku Heshebona tô ne ku Lamata-misepa ne Betonima; ne ku Mahanayima tô ne ku mukalu wa Debî;

²⁷ne mu tshibanda, Bete-halama ne Bete-nimema ne Sukota ne Safona, tshituha tshikuabo tshia bukelenge bua Sihona, mukelenge wa Heshebona, ku mukalu wa Yadene tô ne kunfudilu kua mai a Kinelete dishiya dia Yadene ku esete,

²⁸Ebu mbuhianyi bua Bena Gada ku meku abo, bimenga ne misoko yabi.

²⁹Mose wakaha tshituha tshia tshisamba tshia Manashe buhianyi: buakadi bua tshituha tshia tshisamba tshia bana ba Manashe bu bungi bua meku abo.

³⁰Mukalu wabo wakadi ku Mahanayima, Bashana mujima, bukelenge buonso bua Oga, mukelenge wa Bashana, ne misoko yonso ya Yai, idi mu Bashana, misoko makumi asambombo:

³¹ne tshituha tshia Gilada ne Ashetalota ne Edelei; misoko ya mu bukelenge bua Oga mu Bashana yakadi ya Maki, muana wa Manashe, ya tshituha tshia bana ba Maki ku meku abo.

³²Au mmahianyi akabanya Mose mu mpata ya Moaba dishiya dia Yadene ku Yeleko ku esete,

³³Kadi Mose kakaha tshisamba tshia Lewi buhianyi nansha: Yehowa, Nzambi wa Isalele, mbuhianyi buabo bu muakabambileye.