Read tshiluba 2 Timote 2 Bible Online

2 Timote 2 - tshiluba bible

2 Timote 2

¹Nunku wewe muanʼanyi, ukoleshibue mu ngasa wa mu Kilisto Yesu.

²Malu awakunvua kundi munkatshi mua bamanyi ba bungi, malu â wafile kudi bantu badi mua kueyemenyibua, balua kukumbana mua kuyisha bakuabo kabidi.

³Ukenge nʼanyi bu mudi disalayi dimpe dia Kilisto Yesu.

⁴Kakuena disalayi didi dijingila ne malu a muoyo wa ha buloba henzadi mudimu wadi, bua kusankishadi wakadibuesha mu busalayi.

⁵Ne bikala muntu widikisha bualu mu manaya kabidi, kabena bamuasa tshifulu tshia buhitshi bikaleye kai muidikishe mu bualu bu mudi mikenshi ya manaya yamba.

⁶Tshidime udi wenza mudimu mukole wa mu budimi ngudi ne bua kudia bia mu budimi ku mpala kua bakuabo.

⁷Welangane meshi a malu andi nkuambila; bua Mukelenge neakuhe dijingulula mu malu onso.

⁸Uvuluke Yesu Kilisto, mubishibue ku lufu, kankanunuina ka Davidi, bu mudi lumu luimpe lunakakuambila,

⁹ne bua muanda walu ndi nkengeshibua makenga mabi a kudi bantu bu muenji wa bibi, tô ne mu nkanu minsuika; kadi dî dia Nzambi kadiena disuika.

¹⁰Nunku ndi nkankamana mu malu makole onso bua muanda wa bantu basungula, bua bobo bangate luhandu lua mu Kilisto Yesu ne butumbi bua tshiendelele.

¹¹Dî edi didi mua kueyemenyibua ne, Bituikala bamane kufua nʼandi, netuikale ne muoyo hohamue ngandi.

¹²Bituikala tuditantamika, netukokeshe nʼandi kabidi; bituamuvila, yeye neatuvile kabidi;

¹³bituikala katui bena lulamatu, yeye udi ushala muena lulamatu, yeye kena mumanye mua kudivila.

¹⁴Uvuluishe bantu malu â, ubambila bikole ku mesu kua Mukelenge bua bobo kabatandanganyi bualu bua mei adi kâi ne mudimu ne adi ahambuisha bantu badi baunvua.

¹⁵Unanukile bua kudifila mujalame, bu muena mudimu udi kai ne bua kufua bundu, uludikile bantu nshila mululame mu dî dia Nzambi dia bushua.

¹⁶Kadi ehuka ku biakulakula bia hatuhu; bualu bua benʼabi nebatambe kudiunda mu malu adi kâi anemekela Nzambi;

¹⁷ne mei abo neavulangane bu mputu wa lubangu; Humenayo ne Fileto badi munkatshi muabo;

¹⁸bobo bakamana kuhambuka mu nshila wa mei malelela, bamba ne, Kubika kua bantu ku lufu kuakumana kulua, ne badi banyanga ditabusha dia bakuabo.

¹⁹Kadi bishimikidi bikole biakateka Nzambi bidi bijalama, bidi ne tshimanyishilu etshi ne, Mukelenge udi mumanye badi bandi; ne, Muntu yonso udi utela dina dia Mukelenge ûmuke biandi ku malu mabi.

²⁰Mu nsubu munene kamuena anu bitekelu[1] bia ngolo ne bia argent, kadi mudi bia mitshi ne bia buloba kabidi; bikuabo biteka bua buneme ne bikuabo biteka kabi bua buneme.

²¹Nunku biumusha muntu malu mabi â munda muandi, yeye neikale bu tshitekelu tshiteka bua buneme, tshia tshijila, tshikumbane mudimu wa mukelenge, tshilongolola bua mudimu muimpe wonso.

²²Kadi unyeme nkuka ya bansongalume; londa ku nyima kua buakane, ditabusha, dinanga, ditalala, hohamue ne badi babikila dinu dia Mukelenge ne mitshima mitoke.

²³Kadi uhidie dikonkangana dia malu mahote ne a badi kabai bayishibua, Umanye ne adi alela matandu.

²⁴Muhika wa Mukelenge kena ne bua kutandangana, kadi ikale biandi ne kalolo kudi bantu bonso, ikale muakane mua kuyisha bantu, ikale ne lutulu;

²⁵adimushe badi badimanyika bu baluisha ne mutshima wandi muhuekele; ne bumue Nzambi neakudimune mitshima yabo ku dimanya dia bualu bulelela;

²⁶ne bobo nebahingane ku meshi mahole, bamane kudiluhula mu mateyi a diabolo, bakadi bakuatshibua kudiye bua kuenza bu mu disua diandi.