Read tshiluba Ebelu 13 Bible Online

Ebelu 13 - tshiluba bible

Ebelu 13

¹Dinangangana dia bana babo ba ma Kilisto dikaleku.

²Kanuhu muoyo bua kulesha benyi luse, bua bualu ebu bakuabo bakasangila banjelo, kabai babamanye.

³Nuvuluke badi mu nkanu, bu munudi basuika nʼabo; nuvuluke badibo benzela bibi, bua nuenu nutshidi mu mibidi.

⁴Dibaka dikale dinemekibua munkatshi mua bantu bonso, bulalu kabunyanguki; Nzambi nealumbuluishe bena masandi bajike ne bena masandi babake.

⁵Mioyo yenu kaikadi ne lukuka lua biuma, nuikale ne disanka ne bintu binudi nʼabi, bualu bua Nzambi muine wakuamba ne, Tshiena nkulekela, nasha kakese, tshiena nkushîa tshianana.

⁶Nunku, tudi tuamba ne dikima ne, Mukelenge udi mukuatshishi wanyi; tshiena ntshina; Muntu neangenzele tshinyi?

⁷Nuvuluke bantu bakanukokesha, bakanuambila dî dia Nzambi; nuela meshi a nshikidilu wa tshikadilu tshimpe tshia mioyo yabo, nuidikishe ditabusha diabo.

⁸Yesu Kilisto udi muomumue makelela ne lelu ne tshiendelele.

⁹Kanusesuishibu ku mayisha a bungi ne a bende; budi buimpe bua mutshima ujadikibue ku ngasa, kenku bia kudia biakadi kabi bikuatshisha bakadi benda nʼabi.

¹⁰Tudi ne tshioshelu, tshidi badi bakuata mudimu mu tshitendelelu kabai bamanye mua kudiaku.

¹¹Bualu bua mibidi ya nyama, miena mashi adi muakuidi mimene ulua nʼau mu muaba wa tshijila bu mulambu wa kubuikidila nʼau mibi ya bantu idi yoshibua ku butshika kua tshitudilu.

¹²Nunku, Yesu kabidi, bua kujidileye bantu ne mashi andi, wakakenga ha bule ha tshibi tshia musoko.

¹³Nunku, tuye bietu kudiye kukala kua tshitudilu, batuala bihendu bia bualu buandi.

¹⁴Bua katuena ne musoko kunoku udi wikalaku tshiendelele, kadi tudi tukeba musoko ulualua.

¹⁵Nunku bua bualu buandi, tufilafile kudi Nzambi mulambu wa kumutumbisha nʼau, udi biau mamuma a mishiku idi ijukula ditabusha dia dina diandi.

¹⁶Kadi kanuhu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku.

¹⁷Nutumikile badi banukokesha, nubakokele; bua bobo badi bikale ne tshitabala bua mioyo yenu, bu bantu balua kubadila Nzambi bintu; bua bobo benze bualu ebu ne disanka, kabai ne manunganyi, bua bualu ebu kabuena bamukuatshisha.

¹⁸Nutulombele Nzambi; bua tudi tuitabushishibua ne tudi ne mioyomikese mimpe, tudi basue kuenda bimpe mu malu onso.

¹⁹Ndi nusengelela bua nuenu kutamba kuenza bualu ebu, bua meme mpingishibue kunudi lubilu.

²⁰Nzambi wa ditalala wakabisha mulami munene wa mikoko munkatshi mua bafue kabidi ku mashi a dihungila dia tshiendelele, Mukelenge wetu Yesu mene,

²¹anuvuishe bakane tshishiki mu bualu buimpe buonso bua kuenza bu mu disua diandi, wenza munda muetu bualu budi buimpe ku mesu kuandi bita Yesu Kilisto; butumbi buikale kudiye ku bikondo ne ku bikondo. Amen.

²²Bana betu, ndi nusengelela bua kunvua dî edi dia disengelela ne lutulu; bualu bua nakunufundila mei makese.

²³Numanye bienu ne muanʼetu wa mu Kilisto Timote wakulekedibua mu lukanu; ne bialueye lubilu, nendue nʼandi kunumona.

²⁴Nuele bonso badi banukokesha muoyo, ne basanto bonso kabidi. Ba mu Italia badi banutumina muoyo.

²⁵Ngasa ikale ne buonso buenu. Amen.