Read tshiluba Ebelu 9 Bible Online

Ebelu 9 - tshiluba bible

Ebelu 9

¹Tshihungidi tshia kumudilu mene tshiakadi ne mikenshi ya kulonda mu kutendelela kuabo ne tshitendelelu tshiatshi, tshiakadi tshitendelela tshia ha buloba ebu.

²Bua tshitendelelu tshiakadi tshilongolola; mu muaba watshi wa kumudilu muakadi tshitekelu tshia muinda ne mesa ne mitanda ya mampa yakatekabohu; muaba udibo babikila ne, Wa Tshijila.

³Ne ku nyima kua tshilulu tshikudika tshibidi kuakadi muaba wa mu tshitendelelu udibo babikila ne, Muaba mutambe tshijila;

⁴wakadi ne tshioshelu tshia mananashi tshia ngolo, ne mushete wa tshihungidi mulamika ne ngolo ku nseke yonso; munda muau muakadi tshifuadi tshia ngolo tshitekelamu mana, ne mulangala wa Alona wakela ntonga, ne mabue akadi ne mei a tshihungidi mafundahu;

⁵ne ha mutu hau bakeluba ba butumbi bavuisha dileshi ha mutu ha muaba wa kubuikidila mibi; bua bintu ebi kakuena bualu bua kuamba katataka mudi tshintu ne tshintu.

⁶Hakadi bintu ebi bilongolola nunku, bakuidi badi babuela misangu yonso mu muaba wa kumudilu, benza mudimu wabo;

⁷kadi muakuidi munene udi ubuela mu muaba muibidi, yeye nkayandi, musangu umue ku tshidimu ku tshidimu; kena ubuela kai ne mashi adiye ufila bua bualu buandi ne bua matuhakana a bantu.

⁸Nyuma Muimpe udi ulesha bualu ebu hatoke ne, Nshila wa ku muaba mutambe wa tshijila kena muanze kuleshibua hatshidi tshitendelelu tshia kumudilu ne mudimu.

⁹Etshi ntshifuanyikishi tshia ku tshikondo etshi, tshidibo balonda hafilabo bintu bihebua ne milambu mishiha bidi kabi bimanye mua kuyuisha mutendeledi muakane mujalame, mu malu a muoyo-mukese;

¹⁰bualu bua bidi anu mikenshi ya ba ha buloba, mu malu a bia kudia ne bia kunua ne bia kuvua kua mishindu ne mishindu, yakatekabo tô ne ku tshikondo tshia kubilongolola.

¹¹Kadi Kilisto, mumane kulua muakuidi munene wa mu bintu bimpe bilualua, bualu bua tshitendelelu tshitamba bunene ne buakane, katshî tshiasa ne bianza, tshidi bu kuamba ne, Katshiena tshia bifukibua ebi,

¹²kembua mashi a mbushi ne a bana ba ngombe, kadi bua mashi andi mene, wakabuela mu muaba mutambe tshijila musangu umue tshiendelele, mumane kuangatshila bantu dihikula dia tshiendelele.

¹³Bua bikala mashi a mbushi ne a balume ba ngombe, ne butue bua muana wa ngombe mukashi bumiamina ha bantu bakunyanguka, bibajidile tô ne ku dilengesha dia mubidi wa ha buloba,

¹⁴mashi a Kilisto, wakadifila kudi Nzambi kai ne ditoba, bua Nyuma wa Tshiendelele, neatambe misangu bungi munyi kulengesha muoyomukese webe ku midimu mifue bua kukuatshila Nzambi udi ne muoyo mudimu?

¹⁵Bua bualu ebu yeye udi mutuanganyi wa tshihungidi tshihia-tshihia, bua lufu lumane kulua bua dihikula diabo dia ku malu masambuka mikenshi adi munshi mua tshihungidi tshia kumudilu, babo bakubutidibua badi mua kuangata mulabi wa buhianyi bua tshiendelele.

¹⁶Bua hikalaku tshihungidi, budibo nʼabu mbua kulesha lufu lua mutshihungi.

¹⁷Bualu bua tshihungidi tshidi ne bukole bikalaku lufu lua muenʼatshi; katshiena ne bukole mu matuku atshidi mutshihungi ne muoyo.

¹⁸Nunku, tshihungidi tshia kumudia ka tshiakujadikibua katshî ne mashi.

¹⁹Bualu bua hakambilabo bantu bonso mukenshi wonso kudi Mose, bu mudi mikenshi yamba, wakangata mashi a bana ba ngombe ne a mbushi bohamue ne mai ne miosa mikunze ne hisopa, ne wakamiamina mukanda muine, ne bantu bonso,

²⁰wamba ne, Au adi mashi a tshihungidi tshiakanuelela Nzambi mukenshi bualu buatshi.

²¹Wakamiamina tshitendelelu kabidi ne mashi muomumue, ne bintu bionso biakakuatabo nʼabi mudimu wa kutendelela.

²²Ndi mua kuamba ne, Bintu bionso bidi bilengeshibua ne mashi, bu mudi mikenshi yamba, anu bikese bishala, ne bikalaku kakui kumatshisha kua mashi hanshi, kakuena kubuikidila kua mibi nasha.

²³Nunku, buakadibo nʼabo mbua kulengesha bifuanyikishi bia bintu bia mu diulu ne bintu abi binakutela; kadi bintu mene bia mu diulu biakalengeshibua ne milambu mihite ei buimpe.

²⁴Bualu bua Kilisto kakabuela mu muaba wa tshijila muasa ne bianza, mufuanangane ne muaba mulelela; kadi wakabuela mu diulu muine, bua kumuenekeye mpindiu ku mpala kua Nzambi bua bualu buetu;

²⁵ne kena ne bualu bua kudifila ku musangu ne ku musangu, bu mudi muakuidi munene ubuela mu muaba mutambe tshijila ku tshidimu ku tshidimu ne mashi adi kâi andi;

²⁶anyi buakadiye nʼabu mbua kukenga ku musangu ne ku musangu katshia buloba buajadikibua; kadi katataka musangu umue kunshikidilu kua bikondo, wakumueneshibua bua kujimisheye bubi ku kudifila kuandi bu mulambu.

²⁷Bualu bua budi busunguila bantu bua kufuabo musangu umue, ne ku nyima kua hualu ebu kulumbulula kudiku;

²⁸nunku, Kilisto kabidi, hakafidibueye musangu umue hua kutualeye mibi ya bantu ba bungi, neamueneke musangu muibidi mutahuluke ku bubi, kudi bantu badi bamuindila tô ne ku luhandu luabo.