Read tshiluba Balumbuluishi 15 Bible Online

Balumbuluishi 15 - tshiluba bible

Balumbuluishi 15

¹Kadi dituku dikuabo, mu tshidimu tshia kuhuolabo blé, Shimishona wakaya kutangila mukashi wandi ne kana ka mbushi; yeye wakamba ne, Nembuele kudi mukashi wanyi mu nsubu. Kadi tatu wandi wa mukashi kakitabusha bua yeye aye.

²Tatu wandi wa mukashi wakamuambila ne, Nakela ngana meji ne wewe wakadi nʼandi tshiji tshikole, nunku nakamufila kudi mulunda webe; muakunyʼandi kena umuhita bulengele kumona, anyi? Umuangate, ndi nkusengelela, mu muaba wandi.

³Shimishona wakabambila ne, Musangu eu nengikale mubingishibue kudi Bena Peleshete, hanabenzela bibi.

⁴Shimishona wakaya, wakakuata mibuabua nkama isatu, wakangata bimunyi, wakasuikakana mikila, wakasuika tshimunyi hankatshi ha mikila ibidi ibidi.

⁵Hakatemesheye bimunyi kahia, yeye wakayituma mu madimi a blé a Bena Peleshete, nunku blé yakadi misuika mu bisumbu ne yakadi mimanyike, ne mitshi ya olive kabidi biakoshibua.

⁶Hashishe Bena Peleshete bakakemangana ne, Wakuenza bualu ebu nganyi? Bakamba ne, Shimishona, muku wa Muena Timena, bualu bua yeye wakangata mukashi wandi, wakamufila kudi mulunda wandi. Bena Peleshete bakalua, bakosha mukashi au ne tatu wandi ne kahia.

⁷Shimishona wakabambila ne, Binuenza nunku, bulelela, nennusombuele, ne ku nyima nendekele.

⁸Yeye wakabakosolola bituha bituha ne kushiha kukole; wakaya, wakashikama mu lubuebue lua dibue dia Etama.

⁹Hashishe Bena Peleshete bakabanda, bakasa tshitudilu mu Yuda, bakashimika ntenta yabo mu Lehi.

¹⁰Bena Yuda bakakonka ne, Nuakulua kutuluisha bualu kai? Bakamba ne, Tuakuluila bua kusuika Shimishona, ne bua kumuenzela yeye bu muakatuenzeleye.

¹¹Hashishe Bena Yuda binunu bisatu bakaya ku lubuebue lua mu dibue dia Etama, bakambila Shimishona ne, Kuena mumanye ne, Bena Peleshete badi batukokesha, anyi? Bualu ebu buwakatuenzela budi tshinyi? Yeye wakabambila ne, Nakabenzela bu muakangenzelabo.

¹²Bakamuambila ne, Tuakuluila bua kukusuika, ne bua tuetu tukufile mu bianza bia Bena Peleshete. Shimishona wakamba ne, Nuditshihe kundi ne nuenu nkayenu kanushihi.

¹³Bobo bakamuambila ne, Nansha, kadi netukusuike bikole, ne tukufile mu bianza biabo, katuena tukushiha nansha. Bakamusuika ne mionshi mihia-mihia ibidi, bakumuka nʼandi ku dibue.

¹⁴Hakaluabo nʼandi ku Lehi, Bena Peleshete bakela tshibingu hakasangakenabo nʼandi; Nyuma wa Yehowa wakamutulukila bikole, ne mionshi yakadi ku maboko andi yakavingutuka bu nuosha mu kahia, ne nkanu yandi yakakohoka ku bianza biandi.

¹⁵Yeye wakasangana mufuba mubishi wa lubanga lua mpunda, wakolola tshianza tshiandi, wakawambula, wakashiha nʼau bantu tshinunu.

¹⁶Shimishona wakamba ne, Nakabunguisha mishila ne mishiki ne mufuba wa lubanga lua mpunda, nakashiha bantu tshinunu ne mufuba wa lubanga lua mpunda.

¹⁷Hakashikisheye kuamba mei au, yeye wakela mufuba wa lubanga wakadi mu tshianza tshiandi hanshi; bakidika muaba au ne, Lamata-lehi.

¹⁸Yeye wakadi ne nyota mikole, wakabikila Yehowa, wakamba ne, Wewe wakafila luhandu elu lunene ku tshianza tshia muena mudimu webe, ne katataka nenfue bua nyota, nempone mu bianza bia bantu badi kabayi batengula.

¹⁹Kadi Nzambi wakahanda dina diakadi mu dibue dia Lehi ne mai akahatuka; hakanueye mai, muoyo wandi wakahingana ne yeye wakasangala; nunku wakidika muaba au ne, Enehakole, udi mu Lehi tô ne lelu.

²⁰Yeye wakalumbuluila Bena Isalele mu matuku a Bena Peleshete bidimu makumi abidi.