Read tshiluba Balumbuluishi 4 Bible Online

Balumbuluishi 4 - tshiluba bible

Balumbuluishi 4

¹Hakafua Ehuda, Bena Isalele bakenza malu mabi ku mesu kua Yehowa kabidi.

²Yehowa wakabahana mu bianza bia Yabina, mukelenge wa Bena Kanâna, wakadi ukokesha bantu mu Hasô; kapitene ka masalayi andi kakadi Sisela, wakadi mushikame mu Haloshete, munkatshi mua bisamba bia bende.

³Bena Isalele bakadila kudi Yehowa, bualu bua yeye wakadi ne makalu a biamu nkama tshitema, yeye wakatamba kukengesha Bena Isalele bidimu makumi abidi.

⁴Debola, muprofete wa Nzambi mukashi, mukashi wa Lapidota, wakadi ulumbuluila Bena Isalele ku tshikondo atshi.

⁵Yeye wakadi mushikame muinshi mua mabue a Debola, hankatshi ha Lama ne Betele ku mikuna ya Efelayima; Bena Isalele bakahanda kudiye bua yeye abalumbuluile.

⁶Yeye wakatuma mukenji, wakabikila Balaka, muana mulume wa Abinoama, ku Kedeshe-nafatale, wakamuambila ne, Yehowa, Nzambi wa Isalele, kakamba ne, Uye biebe ku luseke lua mukuna wa Tabô ne binunu dikumi bia bantu ba munkatshi mua Bena Nafatale ne Bena Zebulona, anyi?

⁷Meme nentume Sisela, kapitene ka masalayi a Yabina, kûdi ku musulu wa Kishona, ne makalu andi a nvita ne tshisumbu tshiandi tshinene; nemmufile mu bianza biebe.

⁸Balaka wakamukudimuna dî ne, Biwaya nganyi, nenye; kadi biwikala kuyi uya, tshiena nya.

⁹Yeye wakamba ne, Bulelela, nenye nʼebe, kadi luendu lûdi uya kaluena lukuvuisha butumbi bualu bua Yehowa neafile Sisela mu bianza bia mukashi. Debola wakabika, wakaya ne Balaka ku Kedeshe.

¹⁰Balaka wakabikila Bena Zebuluna ne Bena Nafatale ku Kedeshe; bantu binunu dikumi bakamulonda ku makasa andi; ne Debola wakaya nʼandi.

¹¹Hebe, Muena Kena, wakatabuluka kudi Bena Kena bakuabo, bana ba Hobaba, tatuʼandi-muenu wa Mose, wakashimika ntenta yandi hehi ne mitshi ya telebinta ya mu Sânanima, udi hehi ne Kedeshe.

¹²Bakambila Sisela ne, Balaka, muana wa Abinoama, wakaya ku mukuna wa Tabô.

¹³Sisela wakasangisha makalu andi a biamu onso nkama tshitema, ne bantu bonso bakadi nʼandi, ku Haloshete wa munkatshi mua bisamba bia bende, tô ne ku musulu wa Kishona.

¹⁴Debola wakambila Balaka ne, Bika biebe, bualu bua Yehowa wakafila Sisela mu bianza biebe lelu; Yehowa kena mudianjile ku mpala kuebe, anyi? Nunku Balaka wakahueka mufume ku mukuna wa Tabô, ne bantu binunu dikumi bakamulonda ku nyima.

¹⁵Yehowa wakatatshisha Sisela ne makalu andi onso ne bantu bandi bonso ku miele ya nvita ya Balaka; ne Sisela wakumuka ku dikalu diandi, wakanyema ku makasa andi.

¹⁶Kadi Balaka wakalonda ku nyima kua makalu ne kua bantu tô ne ku Haloshete wa munkatshi mua bisamba bia bende; bantu bonso ba Sisela bakafua ku miele ya nvita; nansha umue wabo wakahanduka.

¹⁷Kadi Sisela wakanyema ku makasa andi ku ntenta wa Yaele, mukashi wa Hebê, Muena Kena; bualu bua ditalala diakadi hankatshi ha Yabina, mukelenge wa Hasô, ne nsubu wa Hebê, Muena Kena.

¹⁸Yaele wakaluhuka bua kusangakena ne Sisela, wakamuambila ne, Buelamu, mukelenge wanyi, ubuele munu, kutshinyi. Yeye wakabuela muakadiye mu ntenta wandi, ne yeye wakamubuikila mu tshiata.

¹⁹Yeye wakamuambila ne, Ndi nkusengelela ne umpe tuima tukese, bualu bua ndi ne nyota. Yeye wakabutula mulondo wa mabele, wakamunuisha, wakamubuikila kabidi.

²⁰Yeye wakamuambila ne, Wimane ku mushiku wa ntenta, ne bialua muntu bua kukukonka ne, Mulume udiku, anyi? wewe umukudimune dî ne, Nansha.

²¹Hashishe Yaele, mukashi wa Hebê, wakangata mutshi wa mulondo wa ntenta, ne marteau mu tshianza tshiandi, wakaya kudiye bitekete bitekete, wakamukumina mutshi au ha luhuhu luandi; ne mutshi wakahatuka, wakabuela mu buloba; bualu bua yeye wakadi mulale tshihuka, mutambe kuhungila, nunku wakafua.

²²Monai, hakadi Balaka ulonda ku nyima kua Sisela, Yaele wakaluhuka bua kusangakena nʼandi, wakamuambila ne, Lua biebe, nenkuleshe muntu ûdi ukeba. Yeye wakaya kudiye, wakatangila Sisela mulale hanshi mufue ne mutshi wa mulondo wa ntenta ha mpuhu yandi.

²³Nunku Nzambi wakalekesha Yabina, mukelenge wa Kanâna, ku mesu kua Bena Isalele dituku adi.

²⁴Tshianza tshia Bena Isalele tshiakadia, ne tshiakahuela Yabina, mukelenge wa Kanâna, tô ne hakabutulabo Yabina, mukelenge wa mu Kanâna.